Kagero nu ngata Babel
18:1-20
18
1 Naopu ee nikalio-kumo sadua malaeka ntanina nesompo lako ri suruga. Nabete mpuu kuasa-na, pade pewanta-na nampakabaa sumaweee dunia. 2 Ante wotu narimboso nongare-yamo:“Nageromo! Nageromo ngata Babel to nabete ee.
Nopamula eo ei ngata ee nipearii nu wao-wao tuwumo.
Nipentabongoi nu sumawee nuanu nadaa to nepakarumu,
pade pentabongoa nu ngila ngaya nu tonci to nepakarumu bo nipodaa nu tou.
3 Nageromo ngata Babel, apaa sumawee manusia ri dunia nanginumo anggur mpogou sala-na,
pade mbagou-mbagou ri dunia nogou salamo ante ia,
pade sumawee topopagoli nipakasugi nu dota rara-na to tado namala nipopeuntu ee.”
4 Naopu ee nironge mbii-ku wotu ntanina lako ri suruga nanguli:
“Pesuwumo komi, todea-Ku. Panganimo komi lako ri ngata etu.
Nemo mi-tutu jeko-jeko-ra,
pade metutu mangkolo suku-ra.
5 Apaa jeko-jeko-ra notunda-tundamo narata ri langi,
pade nitoramo nu Allatala sumawee inggu-ra to nadaa.
6 Pesawai-yamo mantutu ewa nuanu to nipowia-namo si komi.
Pesawai-yamo rongkani kadeana lako ri sumawee nuanu to nipowia-namo.
Keisinimo panginua-na ante inua to rongkani peliu ngkapeina lako ri inua to niweikaka-na komi.
7 Weikaka-yamo kapepaa bo dua rara,
to nasimbei ante kalangko nu rara bo pampakasana-na koro-na.
Sabana ia nanguli oa ri koro dodona:
Yaku ei mbagou bangkele to noparenta.
Tado tobalu-ku,
pade tado maria-ku mamparasai dua rara.
8 Ee-mo sabana, rarana saeyo ngkola ia kana naruncu sumawee suwa,
dua lele, dua rara, pade oro mpei.
Pade ia kana rapakapumpu ante apu,
apaa nakuasa mpuu i Pue Allatala to nantagara-ra ee.”
9 Mbagou-mbagou ri dunia to nantutu inggu-ra nogou sala pade natuwu nantutu dota rara nu bangkele ee, kana mampokeosi bo mantumangisi ngata ee ande rakalio-ra potumambusa rambu nu apu to nampakapumpu-ya. 10 Isira kana mokongkore makawao apaa naeka-ra mambela kapepaa nu ngata ee. Nanguli-ra:
“Oo, nangepemia suwa nu ngata ei,
Ngata Babel to naroso.
Rarana sajaa ngkola suku nu Allatala nipambela si komi!”
11 Pade topopagoli-topopagoli ri dunia mbii nokeo bo nasusa rara-ra nantora ngata Babel ee, apaa tado mpuumo maria to mangoli balu-balu-ra. 12 Tadomo maria to mangoli bulawa, salaka, watu permata, bo mutiara-ra. Iwee mbii kae linen, kae nakamumu, sutra bo kae kasaeja-ra. Parewa to nipowia lako ri kou wongi, parewa to nipowia lako ri ngisi nu gaja pade to nipowia lako ri kou to nasuli olina, to nipowia lako ri ngkala, ase, bo watu pualam. 13 Kuli nu kou momi, rampa-rampa, wongi-wongi, mur bo dupa, anggur bo lana, topu bo gando, japi bo bimba, jara bo goroba, batua-batua, pade inosa nu manusia mbii. 14 Sumawee topopagoli ee kana manguli:
“Sumawee nuanu to nipodota nu rara-mu tadomo naria,
pade sumawee kasugia to nampakasana katuwu-mu nalipo puramo.
Tado mu-rataki mpanculi.”
15 Topopagoli-topopagoli to najadi nasugimo sabana nobalu-balu ri ngata ee, kana mokongkore ri kakawaosana, apaa naeka-ra mambele suwa nu ngata ee. Isira kana mokeo pade motumangi, 16 pade manguli:
“Oo, nangepe mia suwa nu ngata ei,
to nampake powaru kae linen,
kae nakamumu bo kae nakasaeja,
bo to nampake ramba-ramba bulawa,
watu permata bo mutiara.
Agiana rarana sajaa ngkola, sumawee kasugiana ee nalipo puraa.”
17 Sumawee topangkeni kapala, topencawi kapala, bo sumawee tonopaelo ri tasi, nokongkore ri kakawaosana, 18 pade nongare tempo-ra nangkalio rambu nu apu to nosuwe ngata ee. Nangulira: “Tadopa naria ngata ntanina to nampasimbei ngata ei.” 19 Pade nikamburaka-ramo rambu ntana ri woo-ra sabana kasusa nu rara-ra pade nongare, ante nokeo lako bo notumangi. Nanguli-ra:
“Oo, nangepe mia suwa nu ngata ei.
Kasugia-na nampowiamo sumawee tou to naria kapala ntasi-na, najadi nasugi.
Agiana rarana sajaa ngkola sumaweena ee nalipo.
20 Kadonumo komi to naria ri suruga sabana karogaa nu ngata etu.
Pade i komi todea nu Allatala, suro-suro, bo nabi-nabi, kadonumo komi.
Apaa Allatala nosuku-yamo najadi balasia nu sumawee nuanu to nipowia-namo si komi.”
Ngata Babel tadomo meumbaki
18:21-24
21 Naopu ee, sadua malaeka to naroso mpuu no'ongko saongu watu ewa bete nu watu pogilia, pade nitadiaka-na ri rara ntasi. Nanguli-ya:
“Iweimo dalana ngata Babel to naroso ee,
kana ratadiaka mpuu-mpuu,
nangkajadika tadomo rarataki mpanculi-ya.
22 Oni kasapi nu topokasapi bo topododia-topododia,
pade topotawusi-topotawusi lalowe bo tabue,
tadomo maria ra ronge lako ri rara ngata-mu.
Tado mbiimo maria ra rata pande nu ngila ngayana
ri rara ngata-mu,
pade wotu nu pogilia
tadomo maria ra ronge ri rara ngata-mu.
23 Pewanta nu poindo,
tadomo maria ra kalio nu tou ri rara ngata-mu,
pade karamea susa ponikaa
tadomo maria ra ronge ri rara ngata-mu.
Topopagoli-topopagoli-mu, isiramo tou-tou panakoulu ntotona ri dunia,
pade ante panguncani-panguncani-mu nadaa, iko nampabagiu sumawee manusia ri dunia.”
24 Pade ri rara ngata ee nirata raa nu nabi-nabi bo todea nu Allatala,
pade raa nu sumawee tou, to nipatesi ri dunia.