Dodia sabana kagero nu ngata Babel
19:1-5
19
1 Naopu ee naria sangaya nironge-ku ewa wotu nu tou dea narimbuku mpuu lako ri suruga to nongare. Nanguli-ra:“Raunemo Allatala!
Allatala-ta ee-mo Allatala to nepakasalama. Ia-mo Allatala to nipemabose bo nakuasa.
2 Petangara-Na nanoa bo nabija.
Apaa nipanawu-Namo suku ri bangkele to natolele nobalu koro-na ee,
to nampakagero dunia ante pogou sala-na.
Nisukumo nu Allatala bangkele ee, apaa nopatesi batua-batua nu Allatala.”
3 Pade nongare mbiimo tou dea karongkanina nanguli:
“Raunemo Allatala!
Rambu nu apu to mampaka pumpu ngata ee motumambusa oa duuna masae-sae.”
4 Jadi, rompulu aopo totua pade aopo mbaa binata to nantikusi poncundaa nu mbagou ee notimpaluku nenomba ri Allatala to noncunda ri wongko poncundaa-Na. Nanguli-ra:
“Amin, Raunemo Allatala.”
5 Naopu ee nirongemo wotu lako ri poncunda nu mbagou ee nanguli:
“Unemo Allatala,
i komi sumawee batua nu Allatala,
pade ikomi to naeka si-Ya,
lako ri kodina bo betena!”
Susa ponikaa nu Ana Bimba
19:6-10
6 Naopu ee nironge-ku wotu narimboso mpuu ewa wotu nu tou dea ewa soro nu balumba bo ewa guru nu berese. Nironge-ku isira nanguli:
“Raunemo Allatala!
Sabana i Pue, Allatala-ta, To Nakuasa mpuu, noparentamo.
7 Kamei-tamo masana-sana bo madonu-donu,
bo mampemabose-Ya!
Apaa eo susa ponikaa nu Ana Bimba naratamo,
pade pongante-Na nasadiamo monika.
8 Ia niweikaka powaru
kae linen nalusu to nerangkila bo nabula ngea bona Na-pasua!”
[Powaru linen nalusu ee nirapaika inggu-inggu nabelo to nipowia nu todea nu Allatala.]
9 Pade nangulimo malaeka ee si yaku: “Tulisimo ei: Masanamo tou to nikasowei malou ri susa ponikaa nu Ana Bimba ee.” Niuli mbii-na si yaku: “Ei-mo kareba nakono lako ri Allatala.” 10 Namparonge lolita ee, notimpaluku-kumo ri ngayo nu malaeka madota mampenombai-ya, agiana nanguli-ya si yaku: “Nemo! Nemo mu-penombai-ku, penombaimo Allatala! Apaa yaku ei mbii batua nasimbei ewa iko bo ewa sumawee sarara-mu to nekakamu mpuu ri posabiti ni Yesus. Apaa posabiti ni Yesus ee-mo poko nu awili nu tou-tou to noawili.”
Lolita nu Allatala
19:11-16
11 Naopu ee nikalio-ku suruga natebea, pade nikalio-kumo sambaa jara bula. Topencawi jara ee nisanga “To Natundu bo To Nakono”. Iamo topetangara bo topoiwali ante kanoa. 12 Mata-Na noriri ewa apu pade ri woo-Na nadea makota. Ri koro-Na naria sanga nitulisi, agiana Ia ngkola to nanguncani sanga ee. 13 Powaru ndoe to nipasua-Na nilolo ri rara nu raa. Pade Ia nikasangai “Lolita nu Allatala.” 14 Surodado-surodado nu suruga to nantuntumi-Ya nencawi jara bula pura, pade nopasua powaru lako ri kae linen nalusu to nabula ngea. 15 Lako ri nganga-Na nesuwu samata guma to natada. Ante guma ee-ya mampadagi manusia ri dunia, pade Ia kana moparenta-ra ante tioko ase. Ia kana mopie anggur ri rara mpopieaa anggur to nampoparapaika sodo nu Allatala To Nakuasa mpuu. 16 Ri powaru ndoe-Na bo ri timpu-Na nitulisi sanga ei: “Mbagou nu sumawee mbagou, pade Pue nu sumawee maradika.”
Binata pade nabi-na nidagi
19:17-21
17 Naopu ee nikalio-kumo sadua malaeka nokongkore ri wongku nu eo. Ante wotu narimboso nongare-yamo ri sumawee tonci to neworo ri laerawa. Nanguli-ya: “Kameimo motobu bona mantutu susa bete to nipowia nu Allatala! 18 Kameimo mangkondi isi nu mbagou-mbagou, isi nu tadulako-tadulako, mangkondi isi nu surodado-sorudado to nabia. Kameimo mangkondi isi nu sumawee topencawi jara ante isi nu jara-ra pade isi nu sumawee manusia, betena bo kodina, batua bo tou nabebasi.”
19 Naopu ee nikalio-ku binata ee, pade mbagou-mbagou nu dunia ante sourodado-surodado-ra, notobu bona moiwali mangewa Tou to nencawi jara bula ee ante surodado-surodado-Na. 20 Agiana binata ee namala nisoko noroa ante nabi to tado nakono to nampowiamo kadupaa-kadupaa ri ngayo nu binata ee. ante kadupaa-kadupaa ee-mo binata ee nampabagiu tou-tou to nantarima pampetonondi nu binata ee, pade tou-tou to nampenombai pinotou nu binata ee. Naopu ee binata bo nabi to tado nakono ee nitadiaka tuwu-tuwu ri rara nu tasi apu to nengkalala ante watu mporiri. 21 Naopu ee sumawee surodado-ra nipatesi ante guma to nesuwu lako ri nganga nu Tou nencawi jara bula ee. Pade narata mpuumo tonci-tonci nangkondi isi nu tou-tou to nipatesi ee duuna nabosu.