Poparentaa sanjobu mpae
20:1-6
20
1 Naopu ee nikalio-ku sadua malaeka nesompo lako ri suruga, nangkakamu gunci nu ngemba kamatea bo rante bete ri pale-na. 2 Nisoko-namo ule naga ee, to niuli ule tua, ia-mo Mbagou nu Seta ba Wao Tuwu, pade nisilu-na rarana sanjobu mpae kasaena. 3 Naopu ee nitadiaka-namo ule naga ee ri rara nu ngemba kamatea, pade nogunci wombo nu ngemba ee ante populu-na, bona tadomo nabagiu nu naga ee sumawee dunia ande tadopa maopu tempo sanjobu mpae ee. Maopu ee-da ia kana rapalosoki mpanculi singoni ngkola.4 Pade nikalio-kumo poncunda-poncundaa nu Mbagoo, pade tou-tou to noncunda ri poncundaa ee, niwei kuasa bona metangara. Nikalio mbii-ku wao-wao nu tou to nisambalemo sabana isira nambei posabiti nancambelai i Yesus, pade nampopowole lolita nu Allatala. Tou-tou ee tado nenomba ri binata ba ri pinotou-na. Isira mbii tado naria nantarima pampetonondi nu binata ee ri wingke ba ri pale-ra. Jadi isira nipatuwu mpanculi pade noparenta najadi mbaagou noroa ante i Kristus rarana sanjobu mpae. 5 Ei-mo paramulana tomate nipatuwu mpanculi. Agiana tomate-tomate ntanina tadopa rapatuwu mpanculi ande tadopa maopu tempo sanjobu mpae ee. 6 Masanamo tou-tou to nipatuwu mpanculi ri tempo pamulana ee. Isira masipato majadi todea nu Allatala. Kamatea karongkanina tadomo mokuasai-ra. Isira kana majadi tobalia-tobalia nu Allatala bo tobalia-tobalia ni Kristus. Pade isira mbii kana moparenta moroa ante i Kristus rarana sanjobu mpae kasaena.
Mbagou Seta nisuku
20:7-10
7 Naopupa tempo sanjobu mpae ee, Mbagou Seta kana rapaloso lako ri tarungku-na, 8 pade malou-yamo mampabagiu sumawe manusia ri dunia, to niuli Gog pade Magog. Mbagou Seta mopasintobu-ra bona moiwali, kadea-ra nasimbei ante kadea nu bone ri tasi. 9 Jadi, nopalagara-ramo ri sumawee dunia, pade nantikusi pearia nu todea nu Allatala bo ngata to nipotowe nu Allatala. Agiana nesompomo apu lako ri langi pade nampakaropu-ra. 10 Naopu ee Mbagou Seta to nampabagiu-ra ee nitadiaka ri rara tasi apu bo watu mporiri. Iseemo pearia to nipotadiakai binata bo nabi to tado nakono nokoulu. Isee-ramo raduasi eo bengina duuna masae-sae.
Suku kaopuana
20:11-15
11 Naopu ee nikalio-ku sangkou poncundaa nu mbagou nabula to nabete pade Sadua to noncunda ri wongkona. Langi bo dunia nalipo lako ri ngayo-Na, nangkajadika tadomo naria nikalio. 12 Pade nikalio-ku tou-tou to namatemo, betena bo kodina, nokongkore ri ngayo nu poncundaa nu Mbagou ee. Naopu ee niwilemo sumawee buku. Naria saungu buku ntanina niwile, ee-mo Buku Katuwua. Naopu ee niweimo suku ri tou namate, nasimbei ante nuanu to nipowia-ra nantutu nuanu nitulisi ri rara buku-buku ee. 13 Naopu ee tou-tou namate nalome ri tasi mbii nikeni ri ngayo nu Allatala, apaa Ia kana mantangara-ra. Kamatea bo Pearia nu Tomate mbii nambei tou-tou namate to neari ri rarana, pade Allatala mbii nantangara-ra sumawee nuanu to nipowia-ra butu-butu dua. 14 Naopu ee nitadiakamo Kamatea bo Pearia nu Tomate ri rara nu tasi apu. Ri tasi apuu ee-mo kamatea karongkanina. 15 Tou-tou to tado nitulisi sanga-na ri rara Buku Katuwua, ratadiaka ri rara nu tasi apu.