Langi bou pade dunia bou
21:1-8
21
1 Naopu ee nikalio mbii-kumo langi bou pade dunia bou. Langi paramulana bo dunia paramulana nalipomo, tasi mbii nalipomo. 2 Pade nikalio-kumo ngata nagasa, ee-mo Yerusalem bou, niwei nu Allatala nasompo lako ri suruga. Ngata ee nipasadia amimo ewa sadua pongante bangkele to niparikaka ramba-ramba bona mantomunaka pongante baleilo. 3 Pade nironge-kumo wotu narimboso mpuu nongare lako ri poncundaa nu mbagou ee nanguli: “Tempo ei Allatala meari moroa-roa ante manusia. Ia kana matuwu moroa ante isira, pade isira kana majadi todea-Na. Allatala dodo kana matida riolo-ra pade majadi Allatala-ra. 4 Ia kana moparisi sumawee ue mata lako ri mata-ra. Tadomo maria oa kamatea, susa rara, keo, ba tudumbuku. Sumawee nuanu nasae nalipomo.” 5 Naopu ee nangulimo Tou noncunda ri wongko poncundaa nu mbagou ee: “Tempo ei sumaweena nipowia-Ku najadi nabou!” Pade niuli mbii-Na si yaku: “Tulisimo ei, apaa lolita-lolita ei nakono bo mamala raparisaya.” 6 Pade niuli mbii-Na si yaku: “Naopu puramo. Yakumo to Paramulana bo Kaopuana. Yakumo Pue lako ri Paramulana duuna Kaopuana. Butu dua tou nabei wuu-na, kana Ku-panginui ante babayangi lako ri mata ue to nambei katuwua. 7 Tou-tou to nedagi kana mantarima sumawee nuanu ee lako si Yaku. Yaku kana majadi Allatala-na, pade ia kana majadi ana-Ku. 8 Agiana tou-tou to naeka nantutu-Ku, tou-tou to tado namparisaya-Ku, tou nadaa inggu-na, topepatesi, tou nogou sala, topedoti, to nampenombai karampua, pade sumawee to naboa, kana ratadiaka ri rara nu tasi apu bo watu mporiri to nengkalalaa. Ee-mo to niuli kamatea karongkanina.”
Yerusalem bou
21:9-22:5
9 Naopu ee naratamo sadua lako riolo nu malaeka papitu to nangkakamu papitu ngkou panginua to naponu ante papitu ngaya suwa kaopuana ee namei si yaku pade nanguli: “Tumei-ko isei, ku-tudoka-ko pongante bangkele to napobangkele nu Ana Bimba.” 10 Jadi nikuasai-kumo nu Inosa Gasa nu Allata, pade nikeni-kumo nu malaeka ee ri wumbu bulu to nalangko mpuu. Nitudoka-na ku-mo Yerusalem, ngata nagasa ee. Ngata ee nesompo lako ri suruga, niwei nu Allatala. 11 Ngata to naponu ante pewanta nu pampemabose Allatala pade nerangkila ewa watu permata, ewa watu yaspis to newao ewa watu losa. 12 Ngata ee niwala ntiku ante wala betoo nalangko bo nakumba. Wala betoo ee sampulu rongkou wombona, to nijaga nu sampulu rodua malaeka. Ri butu ngkou wombona nitulisi sanga nu sampulu rodua ana ni Israel ngkoulu, to nampomulika sampulu rontina to Yahudi. 13 Wala betoo ee aopo nculapa, pade ri butu nculapana tolu ngkou wombona. Tolu ngkou wombo mbira mataeo, tolu ngkou mbira ri utara, tolu ngkou mbira ri selatan, pade tolu ngkou mbira ri kasoloa. 14 Wala betoo ee nipatinda ri wumbu nu sampulu rongu parawatu. Pade ri parawatu-parawatu ee nitulisi sanga nu sampulu rodua suro nu Ana Bimba ee.
15 Malaeka to nampololitaka-ku ee nangkakamu sangkou tioko posuka lako ri bulawa, rapoposuka ngata ee, wombo-wombona pade wala betoona. 16 Ngata ee aopo nculapa, langana bo weana nasimbei. Pade nisukamo nu malaeka ee ngata ee, jadi langana ronjobu aopoatu kilo, wea bo kalangkona nasimbei ewa langana. 17 Pade nisuka mbii-na wala betoo nu ngata ee, jadi langko nu wala betoo ee aono mpulu mete. Posuka to nipake nu malaeka ee nasimbei ante posuka to nipake nu manusia. 18 Wala betoo nu ngata ee nipowia lako ri watu yaspis, pade ngata ee nipowia lako ri bulawa to tado naria galona, nerangkila ewa kaca. 19 Parawatu-parawatu nu ngata ee nipakaramba ante ngila ngaya nu watu permata. Parawatu paramulana nipakaramba ante watu yaspis, karonguna ante watu nilam, katoluonguna ante watu mirah, kaopona ante watu zamrud, 20 parawatu ka'alimana nipakaramba ante watu unam, ka'aonona ante watu sardis, kapapituna ante watu ratna cempaka, kauwaluna ante watu beril, kasasiona ante watu krisolit, kasampuluna ante watu krisopras, kasampulu saonguna ante watu lazuardi, pade kasampulu ronguna ante watu kecubung. 21 Pade wombona sampulu rongkou ee nipowia lako ri mutiara, sangkou wombo, saongu mutiarana. Dala ri ngata ee nipowia lako ri bulawa to tado naria galona, newao ewa kaca nerangkila.
22 Tado naria nikalio-ku Sou nu Allatala ri rara ngata ee, apaa Allatala To Nakuasa mpuu bo Ana Bimba ee dodomo to najadi Sou nu Allatala ri ngata ee. 23 Ngata ee tado namparaluu eo bo wula mampawanta-ya, apaa pampemabose Allatala dodomo to nampawanta-ya, pade Ana Bimba ee najadi poindo-na. 24 Sumawee ngata ri dunia kana molumako ri rara mpewantana, pade mbagou-mbagou mbii kana mangkeni kasugia-ra ri rara ngata ee. 25 Wombo-wombo nu ngata kana matebea dodo saeyo ntua, tado maria rawunta, apaa tado naria kawengina isee. 26 Sumawee ngata ri dunia kana mamei menomba bo mangkeni kasugia-ra ri ngata ee. 27 Agiana tou to nowia nuanu nerungkuti, ba tou to naboa, banuapa-pa mpuumo nuanu narumu, tado mpuu mamala mesua ri rara ngata ee. To mamala mesua kawule tou to naria sanga-na nitulisi ri rara Buku Katuwua, buku nu Ana Bimba ee.