22
1 Naopu ee nitudoka-kumo nu malaeka ee salu bete to nerangkila uena ewa watu losa. Ue nu salu bete ee nambei katuwua, pade noili lako ri poncundaa nu Allatala bo lako ri poncundaa nu Ana Bimba ee, 2 pade noili ri tongo-tongo dala ri ngata ee. Ri soso nu salu bete, ri sambotena rombira lou, naria kou-kou to nisanga kou katuwua, to nowua sampulu rongkani rarana sampae. Butu mpuu kou ee nowua sambula sangkani. Tawana nipake nampakaori tou ri sumawee dunia. 3 Ri rara ngata ee tadomo naria banuapa to nipokaranalaka nu Allatala. Poncundaa nu Allatala bo Ana Bimba ee kana maria ri rara ngata ee. Batua-batua-na kana menomba si-Ya, 4 pade mangkalio lence-Na. Sanga-Na kana ratulisi ri wingke-ra. 5 Isira tadomo mamparalou poindo ba pewanta nu eo, apaa tado naria kawengina. I Pue Allatala dodomo to kana mampakabaa-ra. Jadi isira kana moparenta majadi mbagou duuna masae-sae. Karataa ni Pue Yesus
22:6-17
6 Naopu ee nangulimo malaeka ee si yaku: “Lolita-lolita ei nakono bo mamala raparisaya. I Pue Allatala to nambei Inosa-Na ri nabi-nabi, nantudumo malaeka-Na bona mampopakalio ri batua-batua-Na nuanu to tadomo masae kana majadi.”
7 Nanguli i Yesus: “Kakono-konona, tadomo masae-Ku marata. Masanamo tou to natundu dodo ri lolita-lolita awili ri rara buku ei!”
8 Yaku, i Yohanes, namparongemo bo nangkaliomo sumaweena ee. Naopupa nironge bo nikalio-ku, notimpaluku-kumo ri ngayo nu malaeka to nantudoka-kumo sumaweena ee, madota mampenombai-ya. 9 Agiana nanguli-ya si yaku: “Nemo! Nemo mu-penombai-ku. Penombaimo Allatala! Apaa yaku ei mbii batua ewa iko, pade ewa sarara-sarara-mu nabi-nabi bo sumawee tou to natundu ri petetesi-petetesi ri rara nu buku ei!” 10 Pade nanguli mbii-ya: “Nemo rapontoliro lolita-lolita awili ri rara buku ei, apaa najungkumo tempona sumaweena ee kana majadi. 11 Tou to nowia nuanu nadaa, palambaka-yamo mowia oa nuanu nadaa; tou to narumu, palambaka-yamo mampakarumu oa koro-na, tou to nowia nuanu nakono, palambaka-yamo mowia oa nuanu nakono, tou to nagasa, palambaka-yamo mampakagasa oa koro-na!”
12 Nanguli i Yesus: “Kakono-kanona, tadomo masae-Ku kana marata ante mangkeni tombo bona mampabalasi butu dua tou mantutu nuanu to nipowia-namo. 13 Yaku-mo to Paramulana bo to Kaopuana. Yaku-mo Pue lako ri Paramulana duuna Kaopuana.”
14 Masanamo tou to notoposi powaru ndoe-na duuna narawa, apaa isira-mo to rawei loga mangkondi wua lako ri Kou Katuwua pade rawei loga mesua ri rara ngata ee modala ri wombona. 15 Agiana tou to nadaa, topedoti, tou to nogou sala, topepatesi, to nampenombai karampua, pade tou-tou naboa, ba ri lolita-na ba ri nuanu nipowia-na, sumawee tou ee pearia-ra ri sawaliku nu ngata ee.
16 “Yaku, i Yesus, nantudumo malaeka-Ku namei si komi bona moparata sumawee nuanu ei ri todea nu Allatala. Yaku ei muli ni Daud. Yaku-mo betue mataeo to nabaa mpose ee.”
17 Inosa Gasa nu Allatala pade pongante bangkele ee nanguli: “Kameimo!” Pade butu dua tou to namparonge ei kana manguli mbii: “Kameimo!” Yema nabei wuu-na, kameimo, pade yema madota, kameimo mangala ue to nambei katuwua ee ante babayangi.
Kaopuana
22:18-21
18 Ri butu dua tou to namparonge lolita-lolita awili ri rara buku ei, yaku, i Yohanes, mambei pepopatora ei: “Ande maria tou motambei banuapapa ri lolita-lolita awili ei, Allatala kana motambei suku ri tou ee ante suwa-suwa to niuli ri rara nu buku ei. 19 Pade ande maria tou mokurangi sangaya lolita-lolita awili ei, Allatala mbii kana mokurangi bagia-na to niuli ri rara buku ei, ee-mo bagia lako ri kou katuwua bo lako ri ngata nagasa ee.” 20 Ia to noparata sumawee kareba ei nanguli: “Nakono, tadomo masae-Ku marata!” Amin. Karatamo, Pue Yesus!
21 Asi rara ni Pue Yesus mamporoasi komi sumawee! Amin.