Rodua sabi nu Allatala
11:1-14
11
1 Naopu ee niweikaka-kumo sampua kou ewa tioko posuka, pade nitudu: “Koumo-ko mosuka Sou nu Allatala bo meja potunua penombaa. Rekemo sangkia dea nu tou to nenomba ri rara nu Sou ee. 2 Agiana nemo mu-suka karawaa mbira ri sawaliku Sou nu Allatala, apaa karawaa ee niweimo ri tou-tou to tado nanguncani i Pue. I sira kana molisa-lisa Ngata Nagasa ee rarana aopo mpulu rombula.” 3 Tempo ee, Yaku kana mantudu rodua sabi-Ku to mopasua powaru pantora tomate, pade i sira kana moparata kareba lako ri Allatala rarana sanjobu roatu aono mpulu eo kasaena.4 Rodua sabi ee rompuu kou zaitun bo rongkou paa nu poindo to naria ri ngayo ni Pue to nakuasa moparenta dunia ei. 5 Ande maria tou to madota moduasi-ra, mesuwumo apu lako ri nganga-ra mampakaropu bali-ra. Jadi, sumawee tou to madota mampaduasi-ra rapatesi ante apu ee. 6 I sira rodua ee nakuasa mowunta langi bona tado madungku uda sinungka-ra moparata kareba lako ri Allatala. I sira mbii nakuasa ri sumawee mata ue, bona mobali ue majadi raa. I sira mbii nakuasa moduasi dunia ante ngila ngaya nu kapepaa, baneipia-pia rapodota-ra.
7 Maopu-rapa mampopowole kareba-ra, binata to meonga lako ri ngemba kamatea, kana mampoiwalika-ra pade mampadagi bo mopatesi-ra. 8 Pade bata-ra rodua ee rapalambaka dodo ri dala bete, ri ngata kamatea Pue-ra ri kou salib. Ngata ee nirapaika Sodom ba Mesir. 9 Tou-tou lako sumawee ngata, mulia, samposararaa bo lako ri sumawee basa ri dunia kana mangkalio bata-ra rarana tolu eo bo santongo, pade tado nampaliu motana bata-bata ee. 10 Manusia ri dunia kana madonu sabana kamate nu sabi rodua ee. I sira kana mowia susa bete pade mombe salandoa, apaa namatemo nabi rodua ee, to nampaduasi mpuu-mpuu sumawee manusia ri dunia. 11 Naliupa tolu eo bo santongo, nesuamo inosa katuwua lako ri Allatala ri nabi rodua ee, nangkajadika-ra natuwu mpanculi. Sumawee tou to nangkalio-ra naeka mpuu. 12 Naopu ee nirongemo nu nabi rodua ee wotu narimboso to nampokio-ra lako ri suruga: “Pentodemo komi tumei!” Pade ri ngayo-ngayo nu bali-bali-ra ee, nentode-ramo ri suruga, nitalibungkuni nu gawu. 13 Ri tempo ee mbii najadimo linu bete mpuu. Sabagia lako ri sampulu bagia nu ngata ee naroga, pade papitu njobu tou namate sabana linu ee. Tou-tou ntanina najadi naeka mpuu, pade nampemabose Allatala ri suruga.
14 Suwa karongkanina naliumo. Agiana kaliomo, Suwa katoulungkanina tadomo masae marata.
Tabue kapapituna
Dodia peune nu totua-totua
11:15-19
15 Naopu ee nitawusimo nu malaeka kapapituna tabue-na, pade nirongemo wotu-wotu narimboso mpuu ri suruga nanguli:
“Poparentaa ri wongko dunia nikakamu ni Pue-ta pade Mbagou Topepakasalama to nitipa-Na. Ia kana moparenta majadi mbagou duuna masae-sae.”
16 Pade rompulu aopo totua-totua to noncunda ri poncundaa nu mbagou ri ngayo nu Allatala, notimpaluku pade nenomba ri Allatala. 17 Nanguli-ra:
“Pue, Allatala To Nakuasa mpuu, to naria, pade to naria amimo.
I kami nosukuru si-Ko sabana nipake-Mumo kuasa-Mu to nabete,
pade nopamulamo-Ko noparenta najadi mbagou.
18 Tou-tou to tado nanguncani i Pue nasodomo,
apaa naratamo tempo-Mu nopasuwu sodo-Mu, pade narata mbiimo tempo-Mu motangara tou-tou namate. Ei-mo tempo-Mu mambei tombo ri nabi-nabi to najadi batua-Mu.
Pade ri sumawee todea-Mu to nenomba si-Ko,
tou-tou nakodi pade tou nabete.
Ei-mo tempo-Mu mampakaropu tou-tou to nampakaropu dunia.”
19 Natebea Sou nu Allatala ri suruga, pade nikaliomo Peti Potipa ri rarana. Naopu ee nombesangkemo kila pade wotu nu berese noguru, pade linu bo uda mpowua to nabete mpuu.