Buku natebuka
10:1-11
10
1 Naopu ee nikalio-kumo sadua malaeka ntanina to naroso nesompo lako ri suruga, nitalibungkuni nu gawu, pade naria marasawu ri wongko nu woo-na. Lence-na newanta ewa eo, pade paa-na noriri ewa apu. 2 Ri pale-na naria salikoa buku kodi natebuka. Paa ngkana-na nentida ri tasi, pade paa ngkabeo-na nentida ri lorena. 3 Pade nongare-yamo ante wotu narimboso ewa wotu nu singa. Naopupa malaeka ee nongare, nogurumo wotu nu papitu berese nanconoi-ya. 4 Kaopu nu papitu berese ee nowotu, madota ku-tulisi nuanu niuli nu berese ee, agiana nironge-kumo wotu lako ri suruga nanguli: “Pontoliromo nuanu niuli nu berese papitu etu, nemo mu-tulisi!”5 Naopu ee malaeka to nikalio-ku nentida ri tasi bo ri lorena ee no'ongko pale ngkana-na nantudo langi. 6 Pade nosumpa-yamo ante nangkasangai sanga nu Allatala to natuwu duuna masae-sae, to nopajadi langi, dunia pade tasi ante sumawee nuanu naria ri rarana. Nanguli malaeka ee: “Tadomo ratento-tento oa tempona! 7 Ande ratawusidamo nu malaeka kapapituna tabue-na, ee-mo tempo nu Allatala mowia liwo to nipontoliro-Na, ewa to niuli-Namo ri nabi-nabi to najadi batua-Na.”
8 Naopu ee wotu to nironge-ku lako ri suruga ee, nololita mbiimo si yaku. Nanguli-ya: “Koumo-ko mangala buku niliko to natebuka ri pale nu malaeka to nentida ri tasi bo ri lorena emei.” 9 Nalou mpuu-kumo ri malaeka ee pade nerapi bona na-weikaka-ku buku kodi niliko ee. Nanguli-ya si yaku: “Alamo pade kondimo buku ei. Ri rara ntei-mu ia kana mu-rasai mapei, agiana ri rara nganga-mu ia namomi ewa manisa nu oani.” 10 Niala-kumo buku ee lako ri pale nu malaeka ee, pade nikondi-ku. Ri rara nganga-ku nirasai-ku namomi ewa manisa nu oani. Agiana niome-kupa, napeimo nirasai-ku ri rara ntei-ku. 11 Naopu ee nitudu-na ku-mo: “Iko kana mampopowoleki mbiipa kareba lako ri Allatala ri sumawee ngata bo mulia, pade ri ngila nu basa bo ri mbagou-mbagou-ra.”