Tabue ka'alimana
9:1-12
9
1 Nitawusi mbiimo nu malaeka ka'alimana tabue-na. Nikalio-ku saongu betue lako ri langi nanawu i dunia. Betue ee niwei gunci wombo nu ngemba pearia tomate to nandala mpuu. 2 Poungke nu betue ee wombo nu ngembana ee, nesuwumo rambu lako ri rarana ewa rambu nu powengkoa bete. Eo bo laerawa najadi nadedi nipowia nu rambu lako ri ngembana ee. 3 Pade lako ri rara nu rambu ee nesuwumo bati-bati nasompo ri dunia. Bati-bati ee niwei kuasa mancii manusia ewa topesupi. 4 Bati-bati ee nitetesi bona tado mopatesi kawoko, ba tinuda-tinuda, ba puu-puu ngkou. Isira kawule mamala mancii tou-tou to tado naria pampetonondi lako ri Allatala ri wingke-ra. 5 Pade tado mbii nipaliu-ra mopatesi tou-tou ee, agiana aga moduasi-ra rarana alima mbula. Kadua mpeduasi nu bati-bati ee nasimbei ewa kadua nu pesii ntopesupi. 6 Rarana alima mbula ee, tou-tou ee nampesimbukui bona mamate, agiana tado namala-ra namate. Isira madota mamate, agiana kamatea nakawao lako si sira. 7 Tari nu bati-bati ee masimbei ewa jara to nasagena moiwali. Ri woo-ra naria sangaya nuanu ewa makota bulawa topangkeni. Lence-ra nasimbei ewa lence nu manusia. 8 Wulua-ra ewa wulua nu bangkele, pade ngisi-ra nasimbei ewa ngisi nu singa. 9 Bambara-ra nilowi nuanu noruke ewa powaru ase. Pomomoni nu kapi-ra ewa wotu nu goroba-goroba to nadea mpuu to nidisi nu jara nokumbeno nalou noiwali. 10 Lelo-ra nasimbei ewa lelo nu topesupi to naria bisana. Bisa ri lelo-ra ee-mo to namala noduasi manusia rarana alima mbula kasaena. 11 Pade naria sadua mbagou to noparenta-ra, ia-mo malaeka to nokuasai ngemba pearia ntomate. Sanga-na ri rara basa Ibrani i Abadon, pade ri rara basa Yunani i Apolion. Batuana Toperopui. 12 Suwa paramulana naliumo. Maopu ee nariapa rongaya suwa ntanina to kana marata.
Tabue ka'aonona
9:13-21
13 Naopu ee nitawusimo nu malaeka ka'aonona tabue-na. Pade nironge-kumo wotu lako ri aopo suno nu meja potunua penombaa lako ri bulawa to naria ri ngayo nu Allatala. 14 Nanguli wotu ee ri malaeka ka'aonona: “Palosomo aopo malaeka to nitaka ri Ue Efrat ee.” 15 Pade nipalosomo aopo malaeka to nipakasadia amimo bona ri jaa bo eo, ri wula bo mpae to nipakatantumo mopatesi sabagia lako ri tolu bagia manusia ri dunia. 16 Niulikaka-ku bakote surodado-surodado nojara ee roatu juta kadeana. 17 Pade ri rara pangkalioaa-ku ee, nikalio-ku jara-jara pade sumawee topencawi jara ee, nampake powaru ase nalei jore, nakeli ewa watu nilam pade nakuni ewa watu mporiri. Woo nu jara-jara ee ewa woo nu singa, pade lako ri nganga-ra nesuwu apu, rambu bo watu mporiri. 18 Sabagia lako ri tolu bagia nu sumawee manusia nipatesi nu apu, rambu bo watu mporiri to nesuwu lako ri nganga nu jara-jara ee. 19 Apaa ri nganga bo ri lelo nu jara ee-mo karosoa mampaduasi manusia. Lelo-ra ewa ule nowoo. Ante lelo-ra ee-mo jara-jara ee noduasi manusia. 20 Agiana labi nu manusia to tado namate sabana peduasi ee, tado mbii nadota neuntu nowia inggu nadaa. Tado nadota-ra neuntu nampenombai wao-wao tuwu pade karampua-karampua bulawa, salaka, ngkala, watu bo kou to tado namala nekalio ba neronge, ba nolumako. 21 Tado mbii nadota-ra nampawia inggu-ra to nadaa ewa nepatesi, panguncani-panguncani nadaa, nogou sala bo nangio.