Populu kapapituna
8:1-5
8
1 Tempo nu Ana Bimba ee nobolesi populu kapapituna, suruga nalino mpii rarana santongo jaa. 2 Nikalio-ku papitu malaeka nokongkore ri ngayo nu Allatala. Malaeka ee niweikaka papitu ngkou tabue.3 Naopu ee naria sadua malaeka ntanina nangkeni podupaa bulawa, namei nokongkore ri ngayo nu meja potunua penombaa. Nadea dupa niweikaka-ya ante patuju bona rapepenomba moroa-roa ante sambaya-sambaya nu sumawee todea nu Allatala. Pade nitunu-namo dupa ee ri meja potunua penombaa to nipowia lako ri bulawa, to naria ri ngayo poncundaa nu mbagou. 4 Rambu nu dupa to nitunu ri podupaa to nikakamu nu malaeka ee nolibuso ri ngayo nu Allatala pade nompandake noroa-roa ante sambaya todea nu Allatala. 5 Naopu ee nialamo nu malaeka ee podupaa ee pade nikeisini-na nu apu lako ri meja potunua dupa ee pade nitadiaka-na ri dunia, nogurumo berese narimbuku mpuu bo nebibimo kila, pade nalinuamo.
Aopo ngkou tabue paramulana
8:6-13
6 Naopu ee, papitu malaeka to nokakamu tabue ee nasadia-ramo motawusi tabue.
7 Potawusi nu malaeka paramulana tabue-na, ncamole-mole nadungkumo uda mpowua bo apu nogalo ante raa ri dunia. Sabagia lako ri tolu bagia dunia napumpu pade sabagia lako ri tolu bagia kou-kou bo kawoko mata napumpu.
8 Naopu ee nitawusimo nu malaeka karoduana tabue. Nariamo nikalio nuanu nabete mpuu ewa bulu saongu nengkalala ewa apu nitadiaka ri tasi. Sabagia lako ri tolu bagia tasi nobali najadi raa, 9 pade sabagia lako ri tolu bagia nuanu natuwu ri tasi namate pade iwee mbii sabagia lako ri tolu bagia kapala-kapala ri tasi naropu.
10 Naopu ee nitawusi mbiimo nu malaeka katotoluna tabue-na. Pade nanawumo lako ri langi saongu betue nabete to nengkalalaa ewa sulu, namparuncu sabagia lako ri tolu bagia salu-salu bo mata-mata nu ue. 11 Sanga nu betue ee “Napei”. Jadi, sabagia lako ri tolu bagia lako ri sumawee ue najadi napei, pade nadea tou namate sabana nanginu ue napei ee.
12 Naopu ee nitawusi mbiimo nu malaeka kaopona tabue-na. Ncamole-mole nariamo nuanu nonampa sabagia lako ri tolu bagia eo, wula bo betue nangkajadika narontomo sabagia lako ri tolu bagia pewanta-ra. Sabagia lako ri tolu bagia poyona tadomo nabaa, iwee mbii kawengina.
13 Pade nikalio-kumo sambaa tonci lowe neworo ri laerawa. Nironge-ku wotu nu lowe ee nongare: “Maweso, maweso, mawesomo tou ri dunia ande natawusipa nu malaeka totolupa ee ngoni tabue-ra.”