Tou-tou to niparikonoi lako ri todea Israel
7:1-8
7
1 Naopu ee, nikalio-ku aopo malaeka nokongkore ri aopo suno nu dunia. I sira ei notahangi ngolu lako ri aopo suno nu dunia bona nemo mewuru ri lorena ba ri tasi ba ri kou-kou. 2 Pade nikalio-ku sadua malaeka ntanina neonga lako ri mata eo. Ia nangkeni poparikonoi lako ri Allatala to natuwu. Nongare ya-mo ante wotu narimbuku nampokio aopo malaeka ee to nantarima kuasa lako ri Allatala bona mampakagero lorena bo tasi. 3 Nanguli malaeka ee: “Nemo ulu rapakagero lorena ba tasi ba kou-kou, ande tadopa ka-wei pampetonondi ante poparikonoi lako ri Allatala ri wingke batua-batua nu Allatala-ta.”4 Pade niulikaka-kumo bakote naria saatu aopo mpulu aopo njobu kadea nu tou to niwei pampetonondi poparikonoi lako ri Allatala ri wingke-ra. I sira ee niala lako ri sampulu rodua ana ni Yakub to nampomulika to Israel.
5 Lako ri muli ni Yehuda sampulu ronjobu kadeana to niparikonoi.
Lako ri muli ni Ruben sampulu ronjobu.
Lako ri muli ni Gad sampulu ronjobu.
6 Lako ri muli ni Asyer sampulu ronjobu.
Lako ri muli ni Naftali sampulu ronjobu.
Lako ri muli ni Manasye sampulu ronjobu.
7 Lako ri muli ni Simeon sampulu ronjobu.
Lako ri muli ni Lewi sampulu ronjobu.
Lako ri muli ni Isakhar sampulu ronjobu.
8 Lako ri muli ni Zebulon sampulu ronjobu.
Lako ri muli ni Yusuf sampulu ronjobu.
Lako ri muli ni Benyamin sampulu ronjobu.
Tou dea to tado namala nireke kadeana
7:9-17
9 Naopu ee nikalio mbii-ku nadea mpuu manusia notobu. Tado namo saduaa to nampakule noreke kadea-ra. I sira ei tou lako ri sumawee ngata, mulia, samposarara bo lako ri sumawee basa ri dunia. I sira nokongkore ri ngayo poncundaa nu Allatala bo ri ngayo nu Ana Bimba ee. I sira nopasua powaru ndoe nabula, pade butu dua-ra nokakamu raa nu kou palem ri pale-ra. 10 Pade ante wotu narimboso nongare-ramo:
“Allatala-ta to noncunda
ri poncundaa-Na
pade Ana Bimba ee-mo to
nampakasalama-ta.”
11 Sumawee malaeka nokongkore nantikusi poncundaa nu Mbagou pade sumawee totua bo aopo mbaa binata ee. Malaeka-malaeka, totua-totua bo aopo mbaa binata ee notumbukotu ri ngayo nu poncunda ee nenomba ri Allatala. 12 Nanguli-ra:
“Amin!
Raunemo Allatala-ta
to nipemabose bo nabija.
Ia masipato mantarima posukuru pade pebila.
Ia nakuasa bo naroso duuna masae-sae!
Amin!”
13 Sadua lako ri olo nu totua-totua ee nampekutana-ku: “Tou-tou to nowaru ndoe nabula ei, yema-ra sira ei pade lako rimba-ra?” 14 Nesono-ku: “Tado nincani-ku Maradika. Iko-da to nanguncani.” Pade nanguli-yamo si yaku: “I sira ei-mo tou-tou to nipakasalama lako ri peduasi to nadaa mpuu. Nitoposi-ramo powaru ndoe-ra pade nipakabula ante raa nu Ana Bimba ee. 15 Ee-mo sabana pade nokongkore-ramo ri ngayo poncundaa nu Allatala pade nenomba si-Ya eo bengina ri rara Sou nu Allatala. Pade Ia to noncunda ri poncundaa nu mbagou ee kana mamporoasi-ra bo mantalendusi-ra. 16 I sira tadomo mamparasai oro ntei ba bei wuu. Tadomo ra rasai-ra kapane nu eo, 17 apaa Ana Bimba to noncunda ri tongo-tongo nu poncundaa nu mbagou ee kana moewu-ra, pade mangkeni-ra ri mata nu ue to nambei katuwua. Pade Allatala kana moparisi sumawee ue mata lako ri mata-ra.”