Aono populu paramulana nibolesi
6:1-17
6
1 Naopu ee nikalio-ku Ana Bimba ee nobolesi populu kasaonguna lako ri olo nu papitu populu ee. Pade nironge-ku sambaa lako ri aopo mbaa binata ee nanguli: “Kameimo!” Wotuna ewa guru nu berese. 2 Nikalio-ku, naria sambaa jara bula. Topencawi jara ee nangkakamu pana pade niweikaka mahkota nu nipake-na. Pade nalou-yamo ewa tadulako to nampadagi bali-na.3 Naopu ee nibolesi mbiimo nu Ana Bimba ee populu karompekana, pade nironge-ku binata karombaana nanguli: “Kameimo!” 4 Pade nesuwu mbiimo saongu jara ntanina to nalei jore. Topencawi jara ee niwei kuasa mampakagero posingkabelo ri wongko dunia, bona mombepatesi manusia. Niweika mbii-ya samata guma bete.
5 Tempo nu Ana Bimba ee nobelesi populu katolumpekana, nironge-ku binata katolumbaana nanguli: “Kameimo!” Nikalio-ku naria mbiimo saongu jara wuri, topencawi jara ee nokakamu timbanga ri pale-na. 6 Pade nironge-ku ewa naria wotu nongare lako ri tongo-tongo nu binata aopo mbaa ee nanguli: “Salite gando nabelo, olina nasimbei ante tombo mobago saeyo, pade tolu lite gando ntanina olina nasimbei ante tombo mobago saeyo mbii. Agiana nemo rarusaka puu nu kou zaitun pade bonde anggur.”
7 Naopu ee nibolesi mbiimo nu Ana Bimba ee populu ka'aopona. Pade nironge-ku binata ka'aopona nanguli: “Tumeimo!” 8 Nikalio-ku sambaa jara nakuni kotu. Topencawi jara ee nosanga Kamatea, pade to nantutumi-ya lako ri bengo nosanga Pearia Ntomate. Isira ei niweikaka kuasa mopatesi mampelei santongo manusia ri dunia ante poiwali, ante orompei, ante ngila ngaya nu dua bo napatesi nu binata naila.
9 Naopu ee nibolesi mbiimo nu Ana Bimba ee populu ka'alimana. Nikalio-ku ri unde nu meja potonua penomba naria inosa-inosa nu tou-tou to namate nipatesi sabana nampopowole lolita nu Allatala ante posabiti-ra. 10 Isira nongare ante wotu narimbuku nanguli: “Oo Pue To Neliu Kuasa-Na, to nagasa bo nanoa. Sangkia ntotopa saena pade Mu tangarada todea nu dunia pade mosuku-ra sabana nopatesi-ka?” 11 Isira sore-sore niwei santonga powaru ndoe bula. Pade nitudu-ramo meuntu ulu singonipa, duuna magana pura kadea nu roa-ra sampobagoa to kana rapatesi ewa isira.
12 Naopu ee nikalio-ku Ana Bimba ee nobolesi populu ka'aonona. Katebolesina, najadimo linu nabete mpuu. Eo najadi nawuri tigi pade wula najadi nalei ewa raa. 13 Betue-betue ri langi nanawu ri dunia ewa wua nu kou ara to tadopa natasa nanawu tempona niwuru nu ngolu mpamburu. 14 Langi nekonco ewa karatasa niwilulu, pade sumawee bulu bo lewuto nate'encu lako ri peariana. 15 Pade mbagou-mbagou ri dunia, pangka-pangka bete, tadulako-tadulako, tou-tou nasugi, tou-tou nakuasa, pade tou-tou ntanina, to najadi batua bo tou tado nipobatua, sumawee nangani nentabongo ri kamboa-kamboa nu bulu pade ri olo-olo nu watu ri bulu. 16 Nongare-ramo ri bulu-bulu bo ri watu-watu ee: “Iwu-kamo. Wuni-ka bona tado rakalio-ka nu Tou to noncunda ri poncundaa nu mbagou ee, pade lako ri sodo nu Ana Bimba ee.” 17 Apaa naratamo eo to nipowulunga, tempo nu Allatala bo Ana Bimba nampopakalio sodo-ra, pade tado namo saduaa to mampakule mokongkore ri ngayo-ra.