Buku to niparikonoi pade Ana Bimba
5:1-14
5
1 Naopu ee nikalio-ku sampeka buku niliko ri pale ngkana nu Tou noncunda ri poncundaa nu mbagou ee. Buku ee nitulisi ntimali-mali pade nipulu bona tado mamala nabolesi nu bayema-yema. 2 Pade nikaliou-ku naria sadua malaeka to naroso mpuu nongare ante wotu narimbuku nanguli: “Yema to masipato molali populu buku ei pade mowente buku ei?” 3 Agiana tado namo saduaa to naria ri suruga, ri dunia, ba riunde nu dunia mamala mobuka buku ee bona mamala mobasa isina. 4 Nangkalio ee, nokeo-kumo ncipu-ncipuna apaa tado namo saduaa tou masipato mobuka bo mobasa isi nu buku ee. 5 Pade nangulimo sadua to lako ri olo nu totua-totua ee si yaku: “Nemo mokeo-ko! Kalio, singa lako ri Yehuda, muli ni Daud nedagimo. Namala-Yamo nobolesi populu nu buku to tado namala nibolesi nu bayema-yema ee.” 6 Naopu ee nikalio-ku sambaa Ana Bimba nokongkore ri tongo-tongo poncundaa nu mbagou ee, nitoleliki nu binata aopo mbaa bo sumawee totua ee. Ana Bimba ee kalioaana ewa to nisambalemo, notondu papitu pade nomata papitu. Batuana, ee-mo papitu Inosa Gasa nu Allatala to nitudu namei ri sumawee dunia. 7 Narapamo Ana Bimba ee pade nangala buku niliko ee lako ri pale ngkana nu Tou to noncunda ri poncundaa nu mbagou ee. 8 Ranca-Na nangala buku ee, notumbukotumo aopo mbaa binata bo totua rompulu aopo ee ri ngayo-Na. Ri pale-ra sore-sore nokakamu kasapi bo sangkiri bulawa naponu ante dupa. Dupa ee nirapaika sambaya todea nu Allatala. 9 Pade nipododia-ramo sangaya dodia bou ewa ei:
“Iko masipato mangala buku etu pade motangka populu-populuna, apaa Iko nipatesimo pade ante raa lako kamate-Mu ee, sumawee manusia lako ri ngila ngaya nu mulia, basa bo lako ri sumawee ngata nioli-Mumo pade niwei ri Allatala. 10 Isira nipajadi-Mu mbagou-mbagou, tobalia-tobalia, bona isira mampobagoka Allatala-ta, pade moparenta ri wongko nu dunia.”
11 Naopu ee nikalio mbii-ku pade nironge-ku wotu nu malaeka ri njobuna pade ri jutana kadeana, nokongkore nantoleliki poncundaa nu mbagou pade aopo mbaa binata bo totua-totua ee. 12 Pade nododia-ramo ante wotu narimbuku ewa ei:
“Ana Bimba to nisambalemo ee, masipato mantarima kuasa, kasugia, kapandea bo karosoa. Ia masipato rabila, rapemabose bo raune!”
13 Pade nironge mbii-ku sumawee nuanu natuwu ri suruga, ri dunia, ri unde nu dunia, ri tasi pade sumawee nuanu natuwu nododia ewa ei:
“Ia to noncunda ri poncundaa nu mbagou pade Ana Bimba ee, masipato raune bo rabila bo rapemabose, pade nakuasa duuna ri masae-sae.”
14 Aopo mbaa binata ee nanguli, “Amin.” Pade totua-totua ee notumbukotu pade nenomba.