Rompulu aopo totua-totua pade aopo mbaa binata
4:1-11
4
1 Naopu ee naria mbiimo nuanu nikalio-ku. Nikalio-ku saongu wombo nateungke ri suruga, pade nironge mbii-kumo wotu ewa pomomoni nu tabue to nampololitaka-ku lombona ee. Nangulimo wotu ee: “Pembua-ko tumei. Kupopakalioka-ko nuanu to kana majadi ngoni.” 2 Ncamole-mole ee mbii-ku nikuasai nu Inosa Gasa nu Allatala. Nikalio-ku ri suruga naria sangkou poncundaa nu mbagou, pade naria sadua to noncunda ri poncundaa nu mbagou ee. 3 Lence nu tou ee newanta ewa pengkila nu watu yaspis bo watu sardis. Naria mbii marasawu ewa pengkila nu watu zamrud noliko ri poncundaa nu mbagou ee. 4 Nantoleliki poncundaa nu mbagou ee naria rompulu aopo poncundaa nu mbagou ntanina. Naria rompulu aopo totua-totua to noncunda ri wumbu nu poncundaa-poncundaa mbagou ee. Isira nowaru nabula pade nampake makota bulawa ri woo-ra. 5 Lako ri poncundaa nu mbagou ee nesuwu wanta nu kila nebibi bo gundu nu wotu berese, pade papitu ngkou sulu natuwu ri ngayo poncundaa nu mbagou ee. Batuana ee papitu Inosa Gasa nu Allatala. 6 Ri ngayo nu poncundaa mbagou ee naria mbii nikalio-ku sangaya ewa tasi, newao ewa kaca.Nantikusi poncundaa nu mbagou ee, naria aopo mbaa binata to naponu ante mata mbira ri ngayo bo mbira ri bengo-ra. 7 Binata to sambaana lencena ewa singa. Karombaana ewa japi tuama. Katolumbaana ewa lence nu manusia. Kaopombaana ewa tonci lowe rancana neworo. 8 Binata aopo mbaa ee sore-sore aono kapi-ra, pade natiku kapi-ra bo mbira ri rarana naponu ante mata. Eo bengina binata-binata ee tado naria peuntua-ra nododia:
“Nagasa, nagasa, nagasamo Pue Allatala, To Neliu Kakuasa-Na,
to naria amimo, pade to naria amimo, bo to kana maria oa.”
9 Aopo mbaa binata ee nampododia dodia-dodia peune, pebila bo posukuru si-Ya to noncunda ri poncundaa nu mbagou ee, to natuwu duuna ri kasae-saena. Bula nu binata-binata ee nododia, 10 notumbukotumo totua rompulu aopo ee ri ngayo nu Tou noncunda ri poncundaa nu mbagou ee, pade nampenombai-Ya to natuwu duuna ri kasae-saena. Naopu ee niuntu-ramo makota-ra ri ngayo nu poncundaa mbagou pade nanguli:
11 “O Pue bo Allatala-ka,
aga Iko to masipato mantarima peune, pebila bo kuasa,
apaa Iko nopajadimo ngila ngayana,
pade lako ri dota-Mu mbii ngila ngayana ee najadimo bo natuwu.”