Petetesi ri todea nu Allatala ri Sardis
3:1-6
3
1 “Tulisikamo malaeka nu todea nu Allatala ri Sardis ewa ei:Ei-mo petetesi lako ri to naria papitu Inosa Gasa nu Allatala pade papitu betue si-Ya ee. Nincani-Kuda nuapa to nipowia-mi. Niuli nu tou ntani natuwuda komi, ntanono namatemo komi! 2 Ee-mo sabana, pembaomo komi, pade pakarosomo nuanu to nariadapa si komi, kambatu tadopa namate pura. Apaa nirata-Ku sumawee nuanu nipowia-mi, tadopa namo sangayaa nagana ri pangkalioaa nu Allatala. 3 Jadi, tora mpanculimo nuanu to nipatudukikamo komi impia pade nuanu to nironge-mimo. Powiamo ee pade pancoromo komi lako ri jeko-jeko-mi. Ande tado membao komi, Yaku kana mamei si komi ewa topangio, pade tado mi-ncani neipia tempo-Ku mamei si komi. 4 Agiana nariadapa ri Sardis tou to nojagai bona marawa dodo powaru-na. I sira ee-mo to kana mamporoasi-Ku molumako ante powaru bula, apaa i siramo to masipato molumako mamporoa-Ku. 5 Yema-yema medagi kana rapasuaka powaru bula. Sanga-ra tado ragempu lako ri Buku Katuwua. Pade ri ngayo nu Tuama-Ku bo malaeka-malaeka-Na Yaku kana mampangaku bakote i sira topantutu-Ku. 6 Yema notalinga, kana na-ronge nuapa to niuli nu Inosa Gasa nu Allatala ri todea nu Allatala.”
Petetesi ri todea nu Allatala ri Filadelfia
3:7-13
7 “Tulisakamo malaeka nu todea nu Allatala ri Filadelfia ewa ei:
Ei-mo petetesi lako si-Ya To Nagasa bo To Nanoa. Ia-mo to nangkakamu gunci to nikakamu ni mbagou Daud. Ande Na-ungkedamo, tado namo saduaa to mamala mowunta, pade ande Na-wuntadamo, tado namo saduaa to mamala moungke.
8 Nincani-Kuda nuanu to nipowia-mi. Noudamo iwee nincani mbii-Kuda bakote tado naroso gaga komi, agiana nitutu-mimo pepatuduki-Ku pade natundu si Yaku. Eemo sabana niungkeka-Kumo komi saongu wombo to tado mamala nawunta ni bayema-yema. 9 Tou to najadi todea nu Mbagou Seta, to nangaku bakote i sira to Yahudi, ntanono tado, kana Ku popotumbukotu ri ngayo-mi. Pade i sira kana manguncani bakote Yaku mpuu-mpuu nampotowe komi. 10 Sabana nitutu-mimo parenta-Ku bona mancabara, Yaku mbii kana motalendusi komi lako ri kasusaa to kana mamparumpa sumawee dunia. Nuanu ee kana majadi bona mampesori sumawee manusia ri dunia. 11 Tadomo masae-Ku marata. Jadi tutumo dodo nuapa to nariamo si komi, bona tado namo saduaa to mamala mangago tombo nu pedagi-mi.
12 Yema-yema medagi, kana Ku pajadi tinja ri rara Sou Gasa nu Allatala-Ku, pade ia kana matida ri pearia ee duuna masae-sae. Sanga nu Allatala-Ku, pade sanga ngata nu Allatala-Ku, Yerusalem bou to kana masompo lako ri suruga, lako ri Allatala-Ku, kana Ku tulisi ri woto nu butu dua tou ee. Sanga-Ku to nabou mbii kana Ku tulisi ri woto-na.
13 Yema notalinga, kana naronge nuapa to niuli nu Inosa Gasa nu Allatala ri todea nu Allatala.”
Petetesi ri todea nu Allatala ri Laodikia
3:14-22
14 “Tulisikamo malaeka nu todea nu Allatala ri Laodikia ewa ei:
Ei-mo petetesi lako si Yaku to nikasangai Amin, Sabi to mamala raparisaya bo nakono, puu nu sumawee nuanu to nipajadi nu Allatala. 15 Nincani-Kuda sumawee nuanu to nipowia-mi. Nincani-Kuda i komi tado nalengi pade tado mbii napane. Nabeloloupa ande i komi malengi, ba mapane. 16 Agiana i komi aga naomu eo, tado napane, tado mbii nalengi. Jadi, i komi kana Ku lua lako ri rara nganga-Ku. 17 Niuli-mi: “I kami ei nasugimo, nagana puramo katuwu-ka, tadomo ka-paralou nuapapa.” Agiana tado nincani-mi petowei ngkatuwu-mi. I komi netowei, nolendo, bo naburo. 18 Ee-mo sabana Ku dederi komi bona mangoli bulawa to nipagasa ante apu lako si Yaku, bona majadi masugi komi. Olimo mbii powaru bula lako si Yaku bona mowaru komi, bona tadomo molendo komi bo mepakaeya. Pade oli mbii pakuli mi-popoela mata-mi, bona mamala komi mekalio mpanculi. 19 Butu dua tou to nipotowe-Ku, ia kana Ku ontika bo Ku salapea. Ee-mo sabana kana masagena rara-mi, pade pancoromo komi lako ri jeko-jeko-mi.
20 Kalio, Yaku nokongkore ri mata wombo pade nokado wombo. Ande maria tou to mamparonge wotu-Ku, pade moungke wombo, Yaku kana mesua mampotomuka-ya bo mangkondi moroa-roa ante ia, pade ia mbii moroa-roa ante i Yaku. 21 Yema-yema to medagi, ia kana Ku paliu moparenta moroa ante i Yaku, nasimbei ewa Yaku mbii to nedagimo pade tempo ei noparenta noroa ante Tuama-Ku. 22 Yema notalinga, kana na-ronge nuapa to niuli nu Inosa Gasa nu Allatala ri todea nu Allatala.”