Petetesi ri todea nu Allatala ri Efesus
2:1-7
2
1 Naopu ee niuli-Namo si yaku: “Tulisikamo malaeka nu todea nu Allatala ri Efesus ewa ei:Ei-mo petetesi lako si-Ya to nokakamu papitu ngkou betue ri pale ngkana-Na, pade nolumako ri olo nu papitu ngkou paa nu poindo lako ri bulawa ee. 2 Nincani-Kuda sumawee nuanu to nipowia-mi. I komi nobago ntomo pade nancabara mpuu tempo-mi niduasi. Nincani-Kuda bakote i komi tado nopasitujui inggu nu tou nadaa. Tou to nangaku bakote i sira suro-Ku ntanono tado nakono, niparesa mpuu-mpuu-mi, duuna nincani-mi bakote i sira naboa. 3 I komi nancabara mpuu pade nantodosaka kapepaa sabana i Yaku, pade tado naopu rara-mi nantutu-Ku. 4 Agiana kana Ku ontika komi, apaa tadomo nipotowe-mi sarara-mi saongu kaparisayaa ewa to nipowia-mi impia tempo-mi nopamula namparisaya-Ku. 5 Jadi toramo, nandala mpuumo kanawua-mi. Pancoromo komi lako ri jeko-jeko-mi, pade powiamo nuanu to nipowia-mi impia. Ande tado, kana marata-Ku si komi pade mowuka paa nu poindo-mi lako ri peariana. 6 Agiana naria sangaya nuanu nabelo si komi. I komi nampodaa inggu nu topantutu pepatuduki ni Nikolaus, to nipodaa mbii-Ku.
7 Yema notalinga, kana na-ronge nuapa to niuli nu Inosa Gasa nu Allatala ri todea nu Allatala:
Yema to medagi, kana Ku paliu mangkondi wua nu kou katuwua to natuwu ri bonde nu Allatala.”
Petetesi ri todea nu Allatala ri Smirna
2:8-11
8 “Pade tulisika ri malaeka nu todea nu Allatala ri Smirna:
Ei-mo petetesi lako si-Ya To Paramulana bo Kaopuana, to namatemo pade natuwu mpanculi. 9 Nincani-Kuda kasusaa-kasusaa to nirasai-mi. Nincani-Kuda bakote i komi natuwu netowei, agiana kakono-konona nasugi-da komi. Nincani-Kuda sumawee nuanu nadaa to niulikaka komi nu tou-tou to nangaku bakote i sira to Yahudi, ntanono tado. I sira ee todea nu Mbagou Seta. 10 Nemo maeka komi mampongayo kapepaa to tadomo masae kana mi-todosaka. Kakono-konona basangkia dua lako ri olo-mi kana napasua nu Mbagou Seta ri rara ntarungku bona mampesori komi. I komi kana mantodosaka kapepaa rarana sampulu eo. I komi kana matundu dodo si Yaku duuna mamate, mangkajadika kana Ku weikaka komi tuwu liu-liu majadi tombo nu pedagi-mi.
11 Yema to notalinga, kana na-ronge nuapa to niuli nu Inosa Gasa nu Allatala ri todea nu Allatala:
Yema-yema medagi, tado kana mantarima suku to niuli kamatea karongkanina.”
Petetesi ri todea nu Allatala ri Pergamus
2:12-17
12 “Tulisikamo malaeka nu todea nu Allatala ri Pergamus ewa ei:
Ei-mo petesi lako si-Ya Topokakamu guma natada nomata ntimali.
13 Nincani-Kuda riumba pearia-mi. I komi natida ri poparentaa nu Mbagou Seta. Agiana ikomi natundu dodo si-Yaku. Tempo ni Antipas to najadi sabi-Ku natundu ee, nipatesi ri ngayo-mi ri pearia nu Mbagou Seta noparenta, tado nipesapuka-mi bakote i komi to namparisaya-Ku. 14 Noudamo ewa ee, naria basangkia ngaya nuanu to tado nipobelo-ku si komi. Naria saganta tou lako ri olo-mi nantutu nuanu nipepatudukii ni Bileam. I Bileam ei nopatuduki i Balak beiwa mopanawu todea to Israel ri rara nu jeko ante dala nambawei-ra mangkondi kondia to nipopenombamo ri karampua pade mogou sala. 15 Naria mbii ri olo-mi tou-tou to nangkakamu pepatuduki nu topantutu i Nikolaus. 16 Jadi, pancoromo komi lako ri jeko-jeko-mi. Ande tado, tadomo masae-Ku mamei si komi pade mampoiwalika tou-tou ee ante guma to naria ri rara nganga-Ku.
17 Yema notalinga, kana na-ronge nuapa to niuli nu Inosa Gasa nu Allatala ri todea nu Allatala:
Yema-yema medagi, kana Ku paliu mangkondi manna to niwunika, pade butu dua-ra kana mantarima lako si Yaku saongu watu bula. Ri watu ee nitulisi sanga bou, to tado nincani nu bayema-yema mpuumo, kawule tou to nantarima watu bula ngkola ee manguncani.”
Petetesi ri todea nu Allatala ri Tiatira
2:18-29
18 “Tulisikamo malaeka nu todea nu Allatala ri Tiatira ewa ei:
Ei-mo petetesi lako ri Ana nu Allatala, to ewa apu natuwu mata-Na, pade paa-Na noriri ewa ngkala nitunu. 19 Nincani-kuda sumawee nuanu to nipowia-mi. Nincani-Ku i komi nampotowe singkapada manusia-mi, i komi natundu si Yaku, i komi nampobagoka-Ku, pade i komi nancabara nantodosaka kapepaa. Nincani-Ku bakote neliupa kadea nu bago-mi tempo ei pade lako ri lombona. 20 Agiana naria nuanu Ku ontikaka komi, apaa i komi nampalambaka i Izebel, bangkele to nangaku najadi nabi ee, nepatuduki bo nampabagiu batua-batua-Ku bona mogou sala pade mangkondi kondia to nipopenombamo ri karampua. 21 Niwei-Kumo loga bona mancoro-ya lako ri jeko-jeko-na, agiana tado nadota-ya neuntu nowia gou sala ee. 22 Jadi, Yaku kana mampakadua ntomo-ya, mangkajadika-ya kawule maleta ri paletaa-nadamo dodo. Pade tou to nantutu inggu-na nogou sala ee, Ku weikaka kapepaa bete ande tado meuntu-ra mantutu inggu-na nadaa ee. 23 Pade ana-ana-na Ku patesi mbii, bona sumawee todea nu Allatala manguncani bakote Yaku-mo to nanguncani pekiri bo rara nu manusia, pade Yaku-mo to mobalasi komi sadua-sadua mantutu nuanu nipowia-mi. 24 Agiana i komi tou-tou ntanina ri Tiatira, to tado nantutu pepatuduki to nadaa ee, pade tado nampeguru panguncani nu Mbagou Seta, tadomo Ku tambei kantomo nu kenia-mi. 25 Agiana i komi kana maroso dodo peparisaya-mi bo matundu si Yaku, duuna ri tempo karata mpanculi-Ku. 26 Yema-yema medagi pade mantutu dota-Ku duuna ri kaopuana, kana Ku weikaka-ya kuasa bona moparenta sumawee manusia ri dunia. 27 Ia kana Ku weikaka kuasa to nasimbei ante kuasa to nitarima-ku lako ri Tuama-Ku. Ia kana moparenta sumawee manusia ri dunia ante tioko ase, pade mampakaropu-ra ewa kura tana. 28 Pade bona mampopakalio bakote ia-mo topedagi, kana Ku weikaka-ya betue mataeyo.
29 Yema notalinga, kana na-ronge nuapa to niuli nu Inosa Gasa nu Allatala ri todea nu Allatala.”