Pangkalioaa
Pangkalioa ni Yohanes
Popamulana
1:1-3
1
1 Isi nu buku ei nampololita nuanu to nipopakalio ni Yesus Kristus nancambelai kajadia-kajadia to kana majadi. Allatala nampopanguncanika i Kristus bona Ia mampopakalio ri sumawee batua nu Allatala kajadia to tadomo masae kana majadi. I Kristus nantudu malaeka-Na bona mampopanguncanika kajadia-kajadia ee ri batua-Na i Yohanes. 2 Jadi, nipatuntumo ni Yohanes sumawee nuanu to nikalio-na ee, nuanu ee lolita lako ri Allatala pade nuanu to nipopanguncanika-ya ni Yesus Kristus. 3 Masanamo tou to nobasaka bo tou to namparonge lolita petetesi pade nantutu nuanu to nitulisi ri rarana. Apaa tadomo masae sumaweena ei kana majadi.Petabe ri todea nu Allatala ri papitu ngata
1:4-8
4 Sarara-sarara todea nu Allatala to natida ri papitu ngata ri ngamba Asia. Yaku, i Yohanes, nancarumaka ikomi kana mantarima towe rara bo kasanaa lako ri Allatala to nariamo lako ri paramulana, ngkapuri ei, bo duuna masae-sae. Pade lako ri papitu Inosa Gasa nu Allatala to naria ri ngayo poncundaa nu mbagou, 5 pade lako si Yesus Kristus, sabi to mamala raparisaya. Ia-mo to paramula ntotona nipatuwu mpanculi lako ri kamatea pade Ia-mo to nokuasai mbagou-mbagou ri dunia.
I Yesus nampotowe-ta pade nampakabebasi-ta lako ri jeko-ta ante raa-Na. 6 Ikita nipajadi-Na todea ri rara nu poparentaa-Na, ikita nipajadi-Na tobalia bona mangkeni penomba ri Allatala. I Yesus Kristus ee-mo to nipemabose pade nakuasa duuna masae-sae. Amin.
7 Kaliomo, Ia marata nitalubungkuni nu gawu. Sumawee tou, iwee mbii isira to notosu-Ya ante tawala kana mangkalio-Ya. Pade sumawee manusia kana mantumangisi-Ya. Iyo nakono. Amin.
8 I Pue Allatala nanguli: “Yaku-mo to Paramulana bo Kaopuana. Yaku naria amimo lako ri paramulana, Yaku naria tempo ei, pade kana maria oa duuna masae-sae, pade To Neliu Kuasana.”
Pangkalioaa ni Yohanes ri lewuto Patmos
1:9-20
9 Yaku i Yohanes, sarara-mi saoungu kaparisayaa to nasimbei ante ikomi namparasai kapepaa to nitodosaka nu butu dua topantutu i Yesus. Yaku mbii najadi todea ri rara poparentaa-Na nasimbei ante sumawee topantutu i Yesus, yaku nancabara tempo-ku niduasi nasimbei ante sumawee topantutu i Yesus. Yaku nitadiaka ri lewuto Patmos, sabana nampopowole lolita nu Allatala bo pepatuduki ni Yesus. 10 Ri tempo eo ni Pue, yaku nikuasai Inosa Gasa nu Allatala, pade nironge-kumo wotu narimbuku ewa pomomoni nu tabue nololita ri bengo-ku. 11 Wotu nololita ee nanguli ewa ei: “Tulisimo ri rara buku nuapa to nikalio-mu, pade pakatumo ri todea nu Allatala to natida ri papitu ngata ei: Ri Efesus, Smirna, Pergamus, Tiatira, Sardis, Filadelfia, bo ri Laodikia.”
12 Nipeili-kumo bengo-ku bona mangkalio yema to nampololitaka-ku ee. Pade nikalio-kumo papitu ngkou paa nu poindo to nipowia lako ri bulawa. 13 Ri tongo-tongo paa nu poindo ee naria sadua ewa ana manusia. Powaru to nipasua-Na nandoe tudu ri paa, pade bambara-Na niwewesi nu bulawa. 14 Wulua-Na nabula ewa wulu nu bimba, ewa kabula nu kangkawu. Mata-Na natuwu ewa apu. 15 Paa-Na nerangkila ewa riri nu ngkala to nitunu ri apu, pade wotu-Na ewa gundu nu ue ri ponawuka bete. 16 Pale ngkana-Na nangkakamu papitu ngkou betue, lako ri nganga-Na nesuwu samata guma no mata ntimala to natada mpuu. Pade lence-Na newanta ewa peindo nu eo poeyo latu.
17 Pangkalio-ku Ya, nateturobo-kumo ewa tomate ri ngayo-Na. Agiana niuntu-Namo pale ngkana-Na ri woto-ku pade nanguli: “Nemo maeka, Yaku-mo to Paramulana bo Kaopuana, 18 pade to natuwu. Yaku ei namatemo, agiana kaliomo, Yaku natuwu duuna masae-sae. Yaku nakuasa ri kamatea bo nakuasa ri pearia ntomate. 19 Ee-mo sabana, tulisimo nuanu nikalio-mu tempo ei, bo nuanu to kana majadi ngoni. 20 Tadopa nincani-mu batua nu papitu ngkou betue to nikalio-mu ri pale ngkana-Ku bo papitu ngkou paa nu poindo to nipowia lako ri bulawa ee. Jadi kupopanguncanikamo-ko batuana: Betue papitu ngkou ee, ee-mo papitu malaeka nu todea nu Allatala to natida ri papitu ngata, pade papitu ngkou paa nu poindo to nipowia lako ri bulawa ee, ee-mo todea nu Allatala to natida ri papitu ngata.”