Pangipi to nipopakalio ni Yesus Kristus si Yohanes i

Pangkalioaa

Pangkalioa ni Yohanes

Popamula

Isi nu buku ei nampololita pangkalioaa ni Yohanes. Nipopakalio-Na nuanu majadi ri koro dodo-Na bo ante nuanu majadi ri sumawee manusia ri dunia. Jadi i Yesus-mo to nampopakalio, pade Ia mbii to nipopakalio ri rara nu pangkalioaa-Na ee. Pamulana, Ia nipopakalio ewa Ana Manusia to nolumako riolo paa nu poindo (1:9-20). Naopu ee, Ia nipopakalio ewa Ana Bimba to nokongkore ri siawe poncundaa nu mbagou ri suruga (5:6-14). Naopu ee, Ia nipopakalio ewa Tadulako nencawi jara bula (19:11-16). Kaopuana Ia nipopakalio ewa Ana Bimba to noparenta noroa ante Allatala ri ngata nu Allatala to nisanga Yerusalem Bou (21:22-23; 22:1-5).

Buku ei nitulisi tempo nu topeparisaya niduasi mpuu-mpuu sabana namparisaya i Yesus. Tempo ee todea ri sumawee ngamba to niparenta nu Mbagou Bete Roma nipasa menomba ri Mbagou Bete. Naria saganta topeparisaya nipatesi sabana tado nadota-ra nenomba ri Mbagou Bete Roma. Niuli-ra i Yesus ngkolada Pue-ra, tado Mbagou Bete Roma. Agiana naria mbii saganta naora peparisaya-ra sabana naeka. Jadi patuju nu lolita ri rara buku ei bona mampakaroso rara nu topeparisaya bona tado maora peparisaya-ra si Yesus noudamo raduasi.

Isi nu buku ei niparata ante basangkia ngaya pepopakalio bo porapaika to nakaja nibatuasi-ta tempo ei, agiana ri topeparisaya tempo ee tado nakaja nibatuasi-ra. Agiana pepatuduki ri buku ei nopoko mpuu. Noudamo topeparisaya si Yesus raduasi, nemo maora peparisaya. Sabana i Yesus niwei nu Allatala kuasa, pade kaopuana Ia nampadagi sumawee bali-Na ante Mbagou Seta mbii, pade moparenta duuna masae-sae. Pade todea nu Allatala to nantutu dodo-Ya, mamparata belo ri dunia bou bo moparenta moroa-roa ante Ia.

Isi nu buku

Popamulana bo petabe (1:1-8)

Pepopakalio paramulana (1:9 - 3:22)

I Yesus nipopakalio ewa Ana Manusia to nolumako riolo nu papitu paa nu poindo (1:9-20)

Petetesi-petetesi ri todea nu Allatala ri papitu ngata (Pasal 2-3)

Pepopakalio karongayana (4:1 - 16:21)

I Yesus nipopakalio ewa Ana Bimba to nokongkore ri siawe poncundaa nu Allatala ri suruga (Pasal 4-5)

Ana Bimba nobolesi papitu mpeka karatasa poparikonoi (6:1 - 8:5)

Papitu ngkou tabue nitawusi (8:6 - 11:19)

Papitu pampetonondi to nobatuasi nuanu to kana majadi (Pasal 12-16)

Pepopakalio katolungayana (17:1 - 20:15)

I Yohanes nangkalio bangkele to nobalu koro-na to nisanga Babel (17:1 - 19:10)

I Yesus nipopakalio ewa Tadulako nencawi jara bula nampadagi bali-Na (19:11 - 21:8)

Pepopakalio kaopongayana: I Yohanes nangkalio pongante bangkele nasadiamo napobangkele nu Ana Bimba, sanga-na Yerusalam Bou (21:9 - 22:5)

Lolita kaopuana (22:6-21)