Sura ni Yudas
Tabe
1:1-16
1
1 Lako si Yudas, batua ni Pue Yesus pade sarara ni Yakobus. Yaku notulisi sura ei si komi sumawee, tou to nipokio nu Allatala bona meparisaya si Kristus, to nipotowe nu Allatala Tuama-ta, pade ri tou to nitalendusi ni Yesus Kristus. 2 Asi rara, kasanaa pade towe rara lako ri Allatala mampeponui komi.Suku ri topepatuduki-topepatuduki to tado nakono
3 Sarara-sarara to nipotowe-ku! Impia yaku madota motulisi sura si komi nancambelai beiwa Allatala mampakasalama-ta. Agiana najadi kara-kara, nangkajadika yaku notulisi nuanu to nontani. Allatala nambeimo tuwu nabou si kita, tou-tou to neparisaya si-Ya. Ia nambei sangkani ngkola duuna masae-sae, pade tado kana mobali. Jadi, kuperapi si komi kana mampesimbukui mpuu bona mampakaroso tuwu nabou ee pade nemo mobaliki. 4 Sabana, basangkia dua tou to nangewa Allatala nesuamo ri tongo-tongo-ta pade tado nincani-ncani-ta. Nasaemo Allatala nanguli ri rara nu Buku Nagasa bakote Ia kana mosuku-ra. Isira nampopogoli-goli kareba nancambelai towe rara nu Allatala bona i sira mabebasi matuwu mantutu dota rara-ra, pade isira mbii nampesapuka i Yesus Kristus Pue-ta, bo ee Ia ngkolada to nakuasa.
5 Sumaweena ee nincani-mimo. Noudamo iwee yaku madota mampopatora komi mancambelai beiwa i Pue mampakasalama to Israel lako ri tana Mesir, agiana noropui to Israel to tado neparisaya. 6 Mi-tora mbiida nuanu nancambelai malaeka-malaeka to niwei nu Allatala posundaa, agiana tado nadota-ra nampajagai. Agiana nangani lou-rada lako ri pearia to nipakatatapuka-ra. Ee-mo sabana, Allatala nosilu malaeka-malaeka ee ante rante ase duu masae-sae, ri rara pearia to nadedi. Allatala notarungku-ra isee, apaa Allatala kana motangara-ra ri Eo bete ee. 7 Tora mbiida ngata Sodom pade Gomora ante ngata-ngata ri siawena. Tou-tou to natida isee nasimbei ewa malaeka-malaeka ee, nampobelo nowia nuanu nadaa. Isira nampobelo nogou sala pade nadaa, nangkajadika isira niduasi ante apu duuna masae-sae, bona majadi pepopatora ri sumawee tou.
8 Noudamo nipopatora ewa ee, tou-tou ei nowia oa ewa todea ri ngata-ngata ee. Isira tado nampangaku kuasa nu Allatala pade nangkanene malaeka to nipemabose ri suruga. Bunturuna isira mbii nampakarumu koro-ra ante nogou sala. 9 I Mikhael dodo tado nowia ewa ee. Bo ee ia-mo tadulako nu malaeka-malaeka nu Allatala. Tempo kamate bou ni Musa, i Mikhael nombebili ante Mbagou nu Seta nancambelai yema to kana mamparata bata ni Musa. I Mikhael tado nabia nosalai Mbagou nu Seta. Agiana i Mikhael kawule nanguli: “I Pue dodo to kana mosuku-ko!” 10 Agiana tou-tou to tado nenomba ri Allatala nololita ante pekanene-pekanene to nampasesaki ngila ngaya nuanu to tado nincani-ra. Isira kawule nantutu dota-ra to nadaa pade nowia dota-dotana, nasimbei ewa binata naila. Bunturu nu sumaweena ee, Allatala kana mosuku pade mampakaropu-ra. 11 Maweso-ra, apa isira nantutumo dala to nipolumakoi ni Kain. Isira mbii nantutu dala ngkatuwu ni Bileam, to madota mowia banuapa-pa bona mamparata doi. Pade isira mbii nantutu i Korah to nangewa Allatala. Bunturu nu parabuata-parabuata to nadaa ee, Allatala kana mosuku-ra. 12 Tempo-mi nosintobu nangkondi noroa-roa, topepatuduki-topepatuduki to tado nakono ee tado naeya nampebasa nangkondi pade kawule nampekiri koro dodo-ra. Isira nasimbei ewa gawu to niwuru nu ngolu, agiana tado nampopesompo uda. Isira ewa kou to tado nowua noudamo tempo nu kou mowua. Isira namate ewa kou to niwuka ante lari-larina. 13 Isira nasimbei ewa balumba to nabete mpuu ri tasi to niwuru nu ngolu, pade inggu-ra to nepakaeya ee nasimbei ewa rumpu bo wura nu ue to narampe ri talinti. Isira ewa betue-betue nolalako. Ee-mo sabana Allatala nopasadia posukua-ra to nadedi mpuu. Isira kana meari isee duuna masae-sae.
14 I Henokh, mulia kapapitu lako si Adam. Impia naria-ya nampopokareba bakote Allatala kana mosuku tou-tou ee. Nanguli-ya: “Ronge, i Pue kana marata ante naporoasi nu malaeka-Na to nagasa ri njobu-njobuna kadea-ra, 15 bona motangara sumawee tou. I Pue kana mosuku tou-tou nadaa sabana parabuata-parabuata-ra to nadaa. Pade Ia kana mosuku tou-tou to najeko pade tou to nasilaka, sabana lolita mpekanene to niuli-na.”
16 Tou-tou ee nanguli oa lolita to nangewa Allatala. Isira mbii nampobelo nangonco-ngonco kasalaa ri tou ntani. Isira natuwu nantutu dota-dota dodo-ra to najeko. Isira nampobelo mampakalangko rara-ra pade mangune tou bona mamparata kauntua.
Pepatuduki-pepatuduki bona mampakaroso kaparisayaa
1:17-23
17 Agiana sarara-sarara-ku to nipotowe-ku, torada nuapa impia to niuli nu suro-suro ni Pue-ta i Yesus Kristus. 18 Isira nampopokareba ncalamo si komi bakote mapara kaopua nu dunia, kana meonga tou-tou to kana mokanene komi. Tou-tou ee to natuwu nantutu dota-dota dodo-ra to najeko. 19 Isira eimo tou-tou to mampopeumba posimpogara. Isira ei tado nikuasai nu Inosa Gasa, agiana nantutu dota rara-ra to nadaa. 20 Agiana ikomi sarara-sarara-ku, ikomi kana mombetulungi oa bona matuwu ri rara pepatuduki to nagasa mpuu to niweimo nu Allatala si komi. Tempo mosambaya, ikomi kana merapi bona kuasa Inosa Gasa monini-komi. 21 Katuwumo majadi tou to mpuu-mpuu nipotowe nu Allatala. Popea oamo duuna ri tempona i Pue-ta, Yesus Kristus marata mpanculi. Ante ee-mo ikita kana matuwu moroa ante Ia duuna masae-sae, apaa Ia mpuu-mpuu nampotowe-ta. 22 Ri tou-tou to norandua rara-na, ikomi kana mampopakalio towe rara-mi. 23 Pakasalama-ramo ante dala mangago-ra lako ri apu. Ri tou-tou ntanina mbii ikomi kana mampopakalio towe rara ante eka rara, pade podaa-mo powaru-ra to nipakarumu nu dota-dota rara-ra to najeko.
Tabe kaopuana
1:24-25
24 Allatala-da to nakuasa mojagai komi bona ikomi tado manawu. Ia mbii mamala mogempu sumawee kasalaa-mi pade mangkeni mpesua komi ri suruga mantingayosi-Ya ri rara pampemabose-Ya ante donu rara pade tado naria kasalaa. 25 Ia-mo ngkola Allatala, Tomampakasalama-ta ri rara ni Yesus Kristus Pue-ta. Ia-mo Allatala to nipemabose, nakuasa bo nopasu lako impia, ngkapuri ei, pade duuna masae-sae. Amin.