Nemo mangkalio lence
2
1 Sarara-sararaku, tou to namparisaya i Yesus Kristus, i Pue to nakuasa, ikomi nemo mampepetolo tou ante mangkalio tou lako ri powaru pade lence-na. 2 Sabana ande maria sadua to nasugi nampake sinci bulawa pade powaru nasuli mamei ri potobua-mi, pade marata mbii sadua to netowei nampake powaru nasempa, 3 tantu kana mibila-pa tou to nowaru nabelo ee, pade mangulikaka-ya: “Poncunda-mo maradika ri poncunda to nabelo mpuu ei!” Agiana ri tou netowei ee niulikaka-mi: “Pokongkoremo isemei,” ba “poncundamo ri doula ei.” 4 Ante nowia ewa ee, ikomi nampowia tou sore nontani riolo nu singkapada manusia pade nangkalio tou ante pekiri to nadaa.5 Toramo, sarara-sarara to nipotoweku! Tou to netowei ri dunia ei, nipelisi nu Allatala bona majadi tou to nasugi ri rara nu kaparisaya. Tou-tou ee majadi todea nu Allatala ewa to nitipaka nu Allatala ri tou to nampotowe-Ya. 6 Agiana ikomi nangkanene tou to netowei, bo ee tou-tou to nasugi-da to naseke si komi pade nodisi komi ri potangaraa. 7 Pade isira ee mbiimo to nangkanene sanga to nibila-ta. Ee-mo sanga ni Yesus Kristus to najadi Pue-ta.
8 Parenta to niparalou ntoto ri rara nu Buku Nagasa to niwei nu Allatala: “Potowemo singkapada manusia ewa pampotowe-mi koro dodo-mi.” Ande ikomi matundu ri parenta ei, batuana ikomi nowia nuanu nakono. 9 Agiana ande ikomi mampepetolo tou ante mangkalio lako ri powaru pade polencena, ikomi nowia jeko, batuana ikomi nangewa parenta nu Allatala.
10 Ande ikomi tado nampowia sangaya ngkola atura nu Allatala, batuana ikomi nangewa sumawee parenta nu Allatala to niwei ni nabi Musa. 11 Sabana, Allatala nanguli: “Nemo mobualo,” pade Ia mbii nanguli: “Nemo mepatesi.” Jadi, noudamo ikomi tado nobualo agiana nepatesi, batuana ikomi nangewa-dapa parenta nu Allatala. 12 Ri rara nu ngila ngayana ikomi kana mololita bo moinggu ewa tou-tou to nanguncani bakote Allatala kana mantangara manusia. Allatala kana mantangara manusia mantutu atura to mampakabebasi tou lako ri jeko pade kamatea. 13 Sabana ri eo kaopuana tempo nu Allatala mobotusi tou nasala ba tado, tadomo naria asi rara-Na ri tou to tado naria asi rara-na ri singkapada manusia-na, agiana Allatala tado mosuku tou to na'asi rara-na ri singkapada manusia-na.
Kaparisaya tado ante parabuata kakono-konona namate
14 Sarara-sarara-ku! Ande maria sadua riolo-mi manguli bakote ia namparisaya i Yesus Kristus, agiana tado nowia parabuata-parabuata to nabelo, kaparisayaa-na ee tado naria lotuna. Ande ewa ee kaparisayaa-na, Allatala tado mpuu mampakasalama-ya ri eo ngkapurina. 15 Mbelakana maria sadua sarara baleilo ba bangkele mamparalou powaru pade nakapuncia kondia eo-eona, 16 nemo kawule miuli: “Allatala namporoasi-ko! Kusarumaka iko kana maomu pade mamparata kondia magana.” Nuapamo lotuna si sira ande ikomi kawule manguli ewa elou ria, ande tado miwei-ra nuapa to niparalou-ra bona mopiara katuwu-ra? 17 Jadi, ande ikomi kawule meparisaya pade tado mowia parabuata-parabuata to nabelo, batuana kaparisayaa-mi ee tado naria lotuna.
18 Agiana mbelakana maria tou manguli: “Yaku kawule namparisaya i Kristus ngkola, pade tou ntani to nowia parabuata-parabuata to nabelo ngkola-da.” Agiana yaku kana manguli ri tou ee: “Iko tado namala mopadupa bakote iko namparisaya i Kristus ande tado nowia parabuata-parabuata to nabelo, agiana yaku mamala mopadupa bakote yaku namparisaya i Kristus ante parabuata-parabuata-ku to nabelo.” 19 Niparisaya-mida bakote Allatala ee sadua ngkola-da? Nabelo-da wea! Agiana seta-seta mbii namparisaya bakote sadua ngkola-da Allatala, nangkajadika-ra nokasiridi apaa naeka mpuu-ra.
20 Agiana ikomi manusia to nambinga. Ba rapopakalioka ntoto-da komi bakote tado naria lotuna ande ikomi kawule meparisaya ngkola, agiana tado mowia parabuata-parabuata to nabelo? 21 Kaliomo i Abraham tumpu-ta. Ia niparikonoi nu Allatala apaa nowia parabuata to nabelo, tempo ee i Abraham nambei i Ishak, ana dodo-na, nipopenomba-na ri Allatala, niboli-na ri wongko nu penombaa. 22 Eimo noparikonoi kaparisaya kana rapopakalio ante parabuata bona majadi magana. 23 Eimo patuju nuanu to nitulisi ri rara Buku Nagasa nu Allatala to niuli: “I Abraham neparisaya ri Allatala, pade lako ri peparisaya-na ee ia niuli nakono ri pangkalioaa nu Allatala.” Etumo sabana i Abraham niuli “wega nu Allatala.” 24 Jadi nikaliomi-mo, bakote Allatala noparikonoi sadua tou apaa nuanu to nipowiana, tado kawule peparisaya ngkolana.
25 Kalio mbii i Rahab, bangkele to nadea jekona. Allatala noparikonoi-ya, apaa nowia parabuata-parabuata to nabelo, sabana ia nantarima tou-tou to Israel to nangkamata bongo-bongo ngata ee, pade nantulungira nangani nantutu dala ntani. 26 Jadi, ewa woto namate ande tadomo naria inosa ri rarana, iwee mbii-mo ande tou tado nowia parabuata-parabuata to nabelo, peparisaya nu tou ee tado naria lotuna.