Jeko to nipowia nu dila
3
1 Sarara-sarara-ku! Nemo gaga madea lako riolo-mi madota majadi topopatuduki todea nu Allatala. Sabana nincani dodo-mida Allatala kana motangara topepatuduki melabi ntomona lako ri tou ntani, ande masala pepatuduki-na. 2 Sabana ikita sumawee ei naoso nowia nuanu nasala, agiana ande maria sadua tou to tado naria nanguli nuanu nasala, iamo to natoualu to nampakule nokuasai sumawee woto-na. 3 Ande ikita mopasa samaku ri ngudu nu saongu jara bona mamalaya mantutu dota-ta, ikita kana mokuasai sumawee koro nu jara ee. 4 Pade kaliomo kapala-kapala ntasi. Noudamo kapala-kapala ntasi ee nabete pade nipopokale nu ngolu narimboso, agiana namala niguli nampake sampua kou kodi nantutu dota nu topoguli. 5 Iweetu mbii-mo ante dila-ta, noudamo dila-ta ei nakodi, agiana namala nampakalangko koro nancambelai kara-kara to nabete.Pekirimo, noudamo santibe kodi riri apu, namala-ya nosuwe rara ngkakou to nabete. 6 Dila nasimbei ante apu. Iamo puu nuanu nadaa to nampakarumu sumawee koro-ta ante nuanu nadaa. Ia nosuwe sumawee katuwua-ta ante nampake apu to narata lako ri naraka.
7 Manusia namala nampakanara sumawee binata naila, tonci, binata nendolo pade bou. Sumaweena ee nariamo nipanara nu manusia. 8 Agiana tado-namo saduaa tou namala nopanara dila nu manusia. Dila ee nadaa pade tado namala nikuasai, naponu ante rasu to nepatesi.
9 Ikita nampake dila-ta nanguli posukuru pade peune-ta ri Allatala Tuama-ta. Agiana nipake mbii-ta nampokaranalaka singkapada manusia, to nipajadi nasimbei ewa Allatala. 10 Lako ri saongu ngudu nesuwu lolita to nangkeni rasi pade nesuwu mbii lolita-lolita nepokaranalaka. Kakono-konona nemo ewa ee. 11 Natantumo tado naria mata ue nampopoili ue belo ante ue napei lako ri saongu mata ue. 12 Sarara-sarara-ku, natantumo tado naria kou ara mamala mowua zaitun, pade tado naria kou anggur mamala mowua ara. Mata ue to napaga tado mbii mamala mampopesuwu ue belo.
Kabijaa lako si Pue Allatala
13 Ande maria riolo-mi tou to manguli koro-na napande pade nabija, ia kana mampopakalio ante matuwu mabelo pade ante mowia nuanu to nabelo mbii, nantutu nu kaede nu rara pade kabija. 14 Agiana ande rara-mi maponu ante siri, singki rara pade madota melabi lako ri tou ntani, nemo mipomole koro-mi bakote ikomimo tou to nabija. Ande ikomi mowia nuanu ewa ee ikomi nobali nuanu to nakono najadi boa. 15 Kabijaa ewa ee tado lako ri Allatala, agiana lako ri dunia to nadaa ei, lako ri dota rara-ta to nadaa, pade lako ri seta-seta. 16 Ande tou-tou nakuasai nu singki rara pade madota mampopountu koro dodo, natantumo kana maria posisala pade ngila ngaya parabuata to nadaa. 17 Agiana tou-tou to nancosora kabijaa to niwei nu Allatala, paramula ntotona mancosora rara to tado narumu ante jeko. Isira nangkeni posingkabelo, natowe rara ri tou ntani, nadole pade natundu. Rara-ra naponu ante asi rara ri tou ntani, pade nuanu ei nampopesuwu wua-wua nu parabuata to nabelo. Isira tado namparei tou ntani, pade isira tado nabelo wongko. 18 Parabuata nabelo ewa sawua to nisawu nu tou. Tou-tou to natuwu nosingkabelo ante tou ntani notuda sawua ee pade isira kana mamparata bundu lako ri sawua ee, eemo parabuata to nabelo riolo-ra.