Dota rara pade powega ante dunia
4
1 Nuapa sabana pade nosisala bo nombesingki komi sadua ante ntanina? Dota rara-mi nadaa eemo nombe'ewa ri rara-mi to najadi saba nu posisala bo pombesingki-mi ee. 2 Ikomi nampodota mpuu nuanu basangkia ngaya, agiana tado nirata-mi nuanu nipodota-mi, nangkajadika komi madota mombepatesi. Ikomi nampodota nuapa-pa ante dota rara mpuu-mi, agiana tado nipakule-mi namparata nuanu ee. Nangkajadika komi nosisala pade nombesingki. Tado nirata-mi nuapa to nipodota-mi, apaa ikomi tado nerapi ri Allatala. 3 Noudamo nosambaya komi ri Allatala, tado niweikaka-Na komi nuapa-pa, apaa nasala sambaya-mi. Sabana patuju sambaya-mi ee bona mampopountu koro dodo-mi.4 Ikomi nasimbei ante topobualo apaa ikomi tado nantutu Allatala! Tado nincani-mi, bakote powega ante dunia ei ee-mo pombepobali ante Allatala? Jadi yema-yema madota majadi wega nu dunia ei, ia nopajadi koro-na bali nu Allatala. 5 Ri rara nu Buku Nagasa, naria nibasa-ta bakote: “Allatala nambolimo inosa ri rara nu koro-ta to nampopountu koro dodo-ta.” Nuanu niuli ei nakono-da pade ikomi kana mamparisaya. 6 Agiana towe rara to niwei-Na si kita neliu kabetena. Etumo sabana Ia nanguli:
“Allatala nangewa tou to nalangko rara,
agiana nampotowe tou to naede rara.”
7 Etumo sabana, katundumo ri Allatala. Pade ewamo Mbagou nu Seta, bona ia kana mangani lako si komi! 8 Kajungkumo komi ri Allatala, bona Allatala mbii majungku si komi. Pakarawamo pale-mi, ikomi to najeko! Pade pakanotomo rara-mi, ikomi to norandua rara. 9 Ikomi kana mpuu-mpuu mancosorara pade mokeo bo motumangi, sambeimo ele-mi ante keo pade sambei mbii-mo kasanaa-mi ante kasusaa! 10 Ande ikomi mampakaede rara-mi ri ngayo ni Pue, Ia mbii kana mampabila komi.
Nemo mopanawu tou
11 Sarara-sarara-ku, nemo mombepomasala ba mombepanawu. Tou to nampomasala ba nopanawu sarara-na sore to Karasitee, ia nampomasala pade nopanawu parenta nu Allatala. Pade ande ikomi mampomasala parenta nu Allatala, batuana ikomi tado nantutu parenta-parenta ee, agiana najadi topobotusi parenta nu Allatala ee-da komi. 12 Bo ee sadua ngkola-da to mamala mambei parenta ri manusia pade motangara manusia. Ia-mo Allatala to nakuasa mepakasalama pade mepakaropu. Jadi, yema gaga-da komi, nangkajadika komi nadota nampomasala singkapada manusia-mi?.
Nemo mangkalingani i Pue ri rara nu liwo-mi
13 Sarara-sarara ronge belo-belo, hei ikomi to nanguli: “Ikami kana malou ri ngata nuanu eo ei ba neile. Ikami kana meari radou sampae kasaena pade mobalu-balu bona mamparata doi madea.” 14 Bo ee tado nincani-mi nuapamo to kana majadi ri katuwu-mi neile! Ikomi ewa rambu to singoni ngkola nikalio, maopu ee malipomo. 15 Kakono-konona ikomi kana manguli: “Ande napaliuta-dapa ni Pue matuwu, ikita kana mowia ei pade etu.” 16 Ntanono nalangko-da rara-mi pade nampomole dodo koro-mi. Inggu ewa ee nasala mpuu.
17 Jadi, ande nincani-mida nuanu to nakono, agiana tado nipowia-mi, batuana najekomo komi.