Pepopatora ri tou nasugi
5
1 Sarara-sarara to nasugi! Rongemo pepatuduki-ku ei. Ikomi kana mokeo pade motumangi apaa ikomi kana mantodosaka kapepaa mpuu! 2 Gagu-mi to nasuli mpuu etu narontomo pade powaru-mi nikikiri nu ipemo. 3 Bulawa pade salaka-mi natagaraamo, pade tagaraana ee majadi popadupa nancambelai komi, bo majadi ewa apu to kana mampakapumpu koro-mi, apaa ikomi notobu oa gagu duuna ri eo-eo to moliwo maopumo. 4 Ikomi tado nobayari tombo nu tou-tou to nobago ri bonde-mi. Jadi rongemo pekakae-ra. Tou-tou to nobago ri bonde-mi, nongare nerapi tulungi pade pongare-ra ee nirongemo nu Allatala, i Pue Tonakuasa Mpuu. 5 Sinungka ngkatuwu-mi ri dunia ei, ikomi kawule nampekiri bona mokeisini tei-mi pade masana-sana mantutu dota rara dodo. Ikomi nowia koro-mi najadi narudu agiana ikomi kana rasuku, nasimbei ewa binata nipakarudu to nipasadia bona rasambale. 6 Ikomi nosuku pade nopatesi tou-tou to tado nasala, pade tado namala-ra nangewa komi.Mancabara ri rara nu kapepaa
7 Etumo sabana, pancabaramo sarara-sarara-ku duuna karata ni Pue. Kaliomo beiwa pancabara nu sadua topolio nampopea wua nu tinuda-na to nisarumaka mpuu-na. Ante nancabara-ya nampopea uda ri tempona mantuda, pade mbii ri tempona mowua. 8 Ikomi kana mancabara mbii pade pakaroso rara-mi, sabana eo karataa ni Pue majungkumo. 9 Nemo mokangua pade mombepomasala, bona Allatala tado mosuku komi. Kaliomo, Allatala Topetangara ee, najungkumo, mapara marata-Yamo.
10 Sarara-sarara, toramo nabi-nabi to nololita ri rara sanga ni Pue. Isira nancabara ri rara nu kapepaa. Jadi powiamo ewa isira. 11 Isira nikasangai-ta tou to nadonu mpuu, sabana isira nancabara. Nirongemi-mo nancambelai pancabara ni Ayub, pade nincani-mida beiwa i Pue ri kaopuana nantiroi i Ayub. Apaa i Pue na'asi mpuu rara-Na pade nabelo mpuu rara-Na.
Nancambelai sumpa, pade sambaya nu tou to nakono
12 Sarara-sarara-ku, nuanu ei kana rapeirara belo-belo: Nemo mosumpa mangkasangai sanga nu Allatala ba suruga ba dunia, ba ntani-ntani mpuu-namo bona majadi sabi to mopadupa bakote nuanu niuli-mi nakono mpuu. Ande io, ikomi kana manguli io. Ande tado, ikomi kana manguli tado, bona Allatala tado mosuku komi.
13 Ande maria riolo-mi to mantodosaka kapepaa, ia kana mosambaya ri Allatala. Ande maria to masana katuwu-na, ia kana mododia mangune Allatala. 14 Ande maria riolo-mi to nadua, ia kana mamperapi topangkeni-topangkeni todea nu Allatala mamei mangkalio-ya, bona isira mosambayani-ya pade moela-ya ante lana ri rara sanga ni Pue. 15 Ande sambaya-ra ee niuli-ra ante peparisaya mpuu-ra si Pue, to dua ee kana maori lako ri dua-na. I Pue Allatala kana mowia to dua ee maori. Pade ande naria-ya nowia jeko, Allatala kana moampungi jeko-jeko-na. 16 Etumo sabana, ikomi kana sore mampangaku jeko-mi bona Allatala madota mampakaori komi.
Sabana sambaya nu tou to nakono, nabete mpuu kuasana. 17 I nabi Elia ee mbii manusia ewa ikita-yada. Nosambaya-yamo ri Allatala ante peparisaya mpuu-mpuuna bona nemo maria uda. Nironge nu Allatala sambayana, tado mpuumo naria uda rarana tolu mpae bo santongo. 18 Naopu ee nosambaya mbii-yamo, pade nesompomo uda lako ri langi nangkajadika nentumbumo ngkojo-ngkojo pade kou-kou nowua nculimo.
19 Sarara-sarara-ku! Ande riolo-mi maria sadua to tadomo nantutu pepatuduki lako ri Allatala, pade sadua tou ntani mowia tou ee manculiki ri Allatala, 20 kana mitorada bakote yema-yema riolo-mi, to mangkeni nculi tou to najeko ee lako ri dala ngkatuwu-na to tado nakono ee, batuana ia nampakasalama tou ee lako ri kamatea liu-liu pade mowia nadea jeko nu tou ee ra'ampungi.