Sura to nitulisi ni Yakobus
Tabe
1
1 Tabe lako si Yakobus, batua nu Allatala pade batua ni Pue Yesus Kristus. Sura ei nipakatu ri sumawee tou to Karasitee to nowolea ri sumawee dunia. Kaparisayaa pade kapandea
2 Sarara-sarara-ku to saongu kaparisayaa, kasana dodomo komi ande ikomi mamparata ngila ngaya nu pesori, to mampesori peparisaya-mi. 3 Sabana nincani-mida: Ande ikomi mamparisaya dodo i Pue Yesus ri rara nu kapepaa, ikomi kana maroso dododa rara-mi mampadagi ngila ngaya nu pesori ee. 4 Jagaimo bona karoso nu rara-mi ee mantahangi oa duuna maroso mpuu, bona ikomi majadi tou-tou to natoualu to tado naria kakerutana namo saodia. 5 Ande maria riolo-mi to nakura kapandea-na, ia kana merapi ri Allatala, bona Allatala kana mambeikaka-ya kapandea, sabana ri butu dua tou, Allatala nambei ante doli rara pade ante towe rara. 6 Agiana tou to merapi, kana meparisaya, tado mamala-ya morandua rara-na. Sabana tou to norandua rara-na ewa balumba ri tasi to niwuru nu ngolu welou tumei. 7 Tou ewa ei nemo mancarumaka, bakote ia kana mantarima banuapapa lako si Pue. 8 Sabana tou to norandua rara-na tado maroo ri rara ngkatuwu-na.
Petowei pade kasugia
9 Sarara-sarara to Karasitee to netowei kana madonu, apaa Allatala nampakalangko-ya. 10 Pade sarara-sarara to Karasitee to nasugi mbii kana masana, apaa Allatala nampakaede-ya. Sabana to nasugi ngoni maundu ewa sese nu kawoko. 11 Tempo nu eo nembere ante kapanena nededa, kawoko ee kana malele nangkajadika naundumo sesena pade narontomo kagayana. Iwee mbii-mo ante tou to nasugi, ia kana mamate bula-na mowia bago-na eo-eona.
Suwa pade pampesori
12 Masanamo tou to natatapu dodo peparisaya-na tempo-na nipesori. Apaa ande mantahangi-ya mantodosaka kapepaa pade pesori, Allatala kana mambei-ya katuwu liu-liu ee-mo majadi tombo-na, ewa tombo to nitipa-Na ri butu dua tou to nampotowe-Ya. 13 Ande maria sadua rapesori, nemo nauli: “Pesori ei narata lako ri Allatala!” Sabana Allatala tado namala nipesori nuanu nadaa, pade Ia dodo tado nampesori bayema-yema. 14 Agiana butu dua tou nipesori nu dota rara dodo-na, apaa ia nidisi pade nibagiu nu dota rara-na to nadaa ee. 15 Pade ande dota rara-na to nadaa ee natutu, ia kana majeko pade ande ia mowia oa jeko, jeko eemo mowia tou ee mamate pade matepatani lako ri Allatala duuna masae-sae.
16 Sarara-sarara to nipotowe-ku, nemo mapusa komi! 17 Sumawee pewei to nabelo pade to nagana mpuu narata lako ri suruga niwei nu Allatala, Topopajadi sumawee nuanu newanta ri langi. Ia-mo Allatala to tado nobali, pade tado mbii nowia kadedia. 18 Nantutu dota dodo-Na, Ia nopajadi-ta ana-ana-Na ante nampopowole si kita lolita-Na to nakono. Ia nowia ewa ee bona ikita mamparata pearia to nipemabose riolo nu sumawee nuanu to nipajadi-Na.
Mamparonge pade mampowia
19 Peiraramo ei belo-belo, sarara-sarara to nipotowe-ku! Butu dua tou kana masadia mamparonge, nemo makalowa-lowa mololita pade nemo magasi masodo. 20 Sabana ande sadua tou masodo, sodo-na ee-mo mantolawani tou ee mowia nuapapa nabelo to nipodota nu Allatala napowia. 21 Etumo sabana, tadiakamo sumawee inggu to tado naowo pade nadaa. Tarimamo ante kaede nu rara lolita to nituda nu Allatala ri rara-mi, apaa lolita ee nakuasa bona mampakasalama komi.
22 Ikomi kana mowia nuapa to niuli nu Allatala, nemo kawule raronge ngkola, apaa ande kawule raronge ngkola batuana ikomi nampabagiu dodo koro-mi. 23 Sabana ande sadua tou kawule namparonge lolita nu Allatala, agiana tado nipowia-na, ia ewa sadua tou to nampenoto mpuu lence-na ri ngayo nu padoma. 24 Naopuya-pa nopadoma, nalou-yamo pade tadomo nitora-na beiwa lence-na. 25 Etumo pade kana tapeirara belo pepatuduki ni Pue pade tapowia oa ante rara mpuu-ta. Apaa pepatuduki ee nakono mpuu pade nakuasa nampakabebasi-ta lako ri jeko. Jadi nemo kawule taronge dodowee pade takalingani. Kana tatutu pepatuduki-Na ee. Apaa tou ewa ee-mo to natiroi nu Allatala ri rara nu sumawee to nipowia-na.
26 Ande ikomi manguli bakote nakono penomba-mi ri Allatala, agiana ikomi kalowa-lowa nololita, kakono-konona ikomi nampabagiu dodo koro-mi, pade sumawee penomba-mi ee tado naria lotuna. 27 Penomba to nakono, to tado nasalai nu Allatala Tuama-ta, mantulungi anailu pade tobalu-tobalu to netowei, pade nemo mampalambaka nuanu nadaa ri rara dunia ei mampakarumu komi.