I Paulus ri Korintus
18
1 Naopu ee i Paulus nampawia Atena, pade nalou ri ngata Korintus. 2 Isee-ya notomu ante sadua to Yahudi to nisanga i Akwila, lako ri propinsi Pontus. I Akwila ei lako karatana lako ri propinsi Italia noroa ante bangkele-na i Priskila. Isira ei namei ri ngata Korintus apaa Mbagou Bete Klaudius nantudu sumawee to Yahudi kana mesuwu lako ri ngata Roma. I Paulus nalou nosaroa si sira, 3 pade natida isee ante isira pade nobago noroa-roa ante isira, apaa bago-ra nasimbei ante i Paulus, bago nowia tenda lako ri kuli nu binata. 4 Agiana ri butu Eo Peuntua nu to Yahudi, i Paulus nalou nololita ri sou penombaa nu to Yahudi pade nampesimbukui bona tou-tou to Yahudi bo tou-tou to Yunani, mamparisaya i Yesus.5 Naratapa i Silas pade i Timotius lako ri propinsi Makedonia, tadomo nowia tenda i Paulus, agiana kawule nampopowole oa lolita lako ri Allatala-yadamo ri tou-tou to Yahudi bakote i Yesus ee-mo Mbagou Topepakasalama to nitipa nu Allatala. 6 Agiana apaa tou-tou samata nangewa oa-ya pade nokanene-ya, nangkajadika i Paulus notampeasi rambu ntana lako ri powaru-na bona majadi pampetonondi pampopatoraka-ra. Nanguli-ya: “Ande nasuku komi nu Allatala, tadomo kasalaa-ku! Sala dodo-mi! Mopamula lako bulawee ei yaku kana malou ri tou-tou to tado to Yahudi.” 7 Pade nipaleisi-ramo ni Paulus nalou ri sou to notongki ante sou penombaa ee. Sou ee sou ni Titius Yustus, sadua tou to tado to Yahudi, agiana ia ee nenomba ri Allatala. 8 Naria mbii sadua to nisanga i Krispus, woo nu sou penombaa nu to Yahudi ee. Ia ante sumawee tou ri rara ncou-na namparisaya i Pue Yesus. Pade nadea mbii tou-tou to Korintus ntanina namparonge kareba to nipololita ni Paulus, nangkajadika-ra namparisaya i Yesus pade nibaptis.
9 Ri sauatu bengina ri rara nu pangkalioa ni Paulus, i Pue nanguli: “Nemo maeka! Pololita oamo lolita lako ri Allatala pade nemo malino, 10 apaa Yaku namporoasi-ko. Tado namo saduaa to mamala mampakaweso bo moduasi-ko, apaa nadea tou ri ngata ei najadi todea-Ku.” 11 Eemo sabana i Paulus natida ri Korintus sampae santongo kasaena pade nopatudukika-ra lolita nu Allatala.
12 Agiana ri tempo ni Galio newali gubernur ri Akhaya, nosaongu raramo tou-tou to Yahudi nangewa i Paulus pade nangkeni-ya ri potangaraa. 13 Pade niuli-ramo pangadua ewa ei: “Tou ei nopatuduki tou dea bona menomba ri Allatala ante dala to nangewa parenta Taurat to nitulisi ni Musa.”
14 Lako nasonoi-dapa ni Paulus pangadua-ra ee, nanguli mo i Galio ri tou-tou to Yahudi ee: “He tou-tou to Yahudi! Ande rapana nuanu nipangaduka-mi ei nancambelai waya ba nuanu nadaa, masipatoku-da mancabara mamparonge pangadua-mi ei. 15 Bo ei pombebili dodo-mi to Yahudi-da nancambelai lolita-lolita pade sanga-sanga bo parenta-parenta dodo-mi, jadi ikomi dodomo to kana mobotusi. Tado madota-ku motangara nuanu ewa ei!” 16 Pade niwura-ramo ni Galio mesuwu lako ri potangaraa ee. 17 Pade nisoko-ramo i Sostenes woo nu sou penombaa ee, pade nonampa-ya ri ngayo nu potangaraa ee. Agiana tado-namo nipeili ni Galio nuanu ee.
I Paulus nanculi ri Antiokhia
18 Naopu ee nasae-dapa i Paulus natida ri Korintus. Pade nopalakana-yamo ri tou-tou to neparisaya isee, pade newote ante i Priskila bo i Akwila ri propinsi Siria. Sintou tadopa narata-ra ri Siria, ri Kengkrea i Paulus nokurori wulua-na bona majadi pampetonondi bakote nipeponui-namo potipa-na si Pue. 19 Narata-pa ri Efesus, nipawiamo ni Paulus i Priskila bo i Akwila, pade nesua ri sou penombaa nu to Yahudi nombepepekutana ante tou-tou to Yahudi isee. 20 Niperapi-ra bona masaeya-dapa matida ante isira, agiana tadomo nadota-ya. 21 Noudamo iwee, tempo ni Paulus meongkomo, nanguli-yamo: “Ande napodota nu Allatala, mamalaku-dapa manculiki mbii isei.” Naopu-ya nanguli iwee, neongko-yamo lako ri Efesus.
22 Nesompo-yapa ri Kaisarea, nalou-yamo ri Yerusalem bona mantabe todea isee, pade napola-yada ri Antiokhia. 23 Natida-yapa isee basangkia eo saena, neongko mbii-yamo nangkaloui sumawee propinsi Galatia pade Frigia bona mampakaroso rara nu tou-tou to neparisaya.
I Apolos ri Efesus
24 Tempo ee nameimo ri Efesus sadua to Yahudi to nipoanaka ri Aleksandria, sanga-na i Apolos. Napande-ya nololita pade nanguncani mpuu isi Buku Nagasa, 25 pade nipatuduki-yamo bona manguncani pepatuduki nancambelai i Pue Yesus. Pade ante rara mpuu-mpuu-na nololita bo nepatuduki nancambelai i Yesus, noudamo kawule baptisan ni Yohanes ngkola dapa nincani-na. 26 Ante tado naeka-eka nopamulamo i Apolos nololita ri sou penombaa nu to Yahudi, pade pamparonge ni Priskila bo i Akwila pepatuduki-na ee, nikeni-ra yamo ri sou-ra, pade nopanotosi si Apolos beiwa ntoto kakono nuanu nancambelai liwo nu Allatala bona mampakasalama manusia ri rara sanga ni Yesus. 27 Naopu ee i Apolos madota malou ri ngamba Akhaya. Etumo sabana tou-tou to namparisaya i Yesus ri Efesus notulisi sura ri sarara-sarara to neparisaya ri ngamba Akhaya bona madota-ra mantarima i Apolos. Karata ni Apolos ri ngamba Akhaya, pepatuduki-na mpuu-mpuu nantulungi tou-tou to neparisayamo si Yesus sabana towe rara nu Allatala. 28 Apaa nopasu mpuu i Apolos nololita, nangkajadika nidagi-na tou-tou to Yahudi ri rara nu pombebili-pombebili ri ngayo nu tou dea. Pade nipadupa-na ante isi Buku Nagasa bakote i Yesus eemo Mbagou Topepakasalama to nitipa nu Allatala.