I Paulus ri Efesus
19
1 Ranca ni Apolos ri ngata Korintus-dapa, naopumo nipebutu ni Paulus soki-soki nu ngamba ee pade narata-yamo ri Efesus. Isee-ya notomu ante basangkia dua tou to neparisayamo si Yesus. 2 Nepekutana-yamo si sira: “Nitarima-mimo Inosa Gasa tempo-mi namparisayamo i Yesus?” Nesono-ra: “Tadopa. Tadopa naria nironge-ka bakote naria Inosa Gasa.” 3 Pade nangulimo i Paulus si sira: “Ande iweetu wea ante baptisan umba komi nibaptis?” Nesono-ra: “Ante baptisan ni Yohanes.” 4 Nanguli i Paulus: “I Yohanes nobaptis tou bona majadi pampetonondi bakote tou-tou ee nancoromo lako ri jeko-jeko-ra. Agiana sintou ee mbii i Yohanes nanguli ri tou-tou bakote isira kana meparisaya ri Tou to kana marata mopuri lako si-ya, Tou ee i Yesus.” 5 Pamparonge-ra nuanu ee, nibaptis-ramo ri rara sanga ni Pue Yesus. 6 Pade tempo ni Paulus nountu pale-na si sira, Inosa Gasa nokuasai-ra, pade nopamula-ramo nololita ante basa-basa nu Inosa Gasa pade noparata lolita nu Allatala. 7 Kadea-ra rapa-rapana naria sampulu rodua.8 Rarana tolu mbula i Paulus tado naeka-eka nololita oa ri tou-tou ri sou penombaa nu to Yahudi pade nombebili ante isira bona mampakaroso rara-ra nancambelai Poparenta nu Allatala majadi Mbagou. 9 Agiana basangkia dua riolo nu tou-tou ee nakoo rara-ra pade tado nadota namparisaya. Ri ngayo nu sumawee tou to notobu isee, isira nangkanene pepatuduki nancambelai i Yesus. Eemo sabana pade nipawia-ramo ni Paulus, pade ante topantutu-topantutu i Yesus nalou ri rara posikolaa Tiranus. Isee-ya butu eo-na nombepekutana ante tou-tou. 10 Iwee oamo nipowia-na rarana rompae kasaena duuna sumawee tou to natida ri propinsi Asia, ba to Yahudi iweetu mbii to Yunani, sumawee namparonge lolita ni Pue.
11 Allatala nambei kakuasa si Paulus bona mampowia kadupaa-kadupaa to neliu mpuu. 12 Ande pasapu ba bua to nipakemo ni Paulus rakeni pade rauntu ri tou-tou nadua, mabelomo dua-ra pade seta to nampesua-ra mesuwu lako si sira.
Ana-ana ni Skewa
13 Naria basangkia dua sando nu to Yahudi to nolumako nalou riumba-umba, nowura wao tuwu lako ri tou-tou. Sando-sando ee mbii nampesoba nampake sanga ni Pue Yesus bona mowura wao-wao tuwu ee. Nanguli-ra ri wao-wao tuwu ee: “Ri rara sanga ni Yesus to nipopowole ni Paulus ee, kuwura-ko.” 14 Riolo-ra to nowia nuanu ewa ee, naria papitu ana baleilo ni Skewa, tobalia nu to Yahudi ri matana. 15 Agiana nanguli wao tuwu ee si sira: “Nincani-kuda i Yesus, i Paulus mbii nincani-kuda, agiana ikomi ei yema?” 16 Pade tou to nipesua nu wao-wao tuwu ee nengkawantu bo nampawiko-ra papitu ee pade nampadagi pura-ra, nangkajadika nangani-ramo lako ri sou nu tou ee ante nabaka pura bo nolendo, apaa powaru-ra nisemparakamo lako ri koro-ra. 17 Sumawee to Yahudi bo tou-tou to tado to Yahudi to natida ri Efesus namparonge kajadia ee, pade naeka pura-ramo. Nangkajadika sanga ni Pue Yesus nantambei niune. 18 Nadea tou to najadi neparisayamo si Yesus, namei ri ngayo nu tou dea pade nampangaku bakote isira mbii naria-rada nowia parabuata-parabuata ewa ee lako ngkoulu. 19 Nadea mbii to lako riolo-ra to naria nopajala panguncani nadaa, nopasintobu buku-buku nu panguncani-ra pade nosuwe ri ngayo nu tou dea. Oli nu buku- buku ee ande rareke naria lima mpulu njobu doi salaka deana. 20 Ante dala ewa eemo, nantambeimo powole nu lolita ni Pue, nangkajadika nantambeimo kadea nu topeparisaya si Yesus.
I Demetrius nampakagesoa ri Efesus
21 Naopu kajadia-kajadia ee, nibotusimo ni Paulus malou ri propinsi Makedonia pade Akhaya pade mapola ri Yerusalem. Nanguli i Paulus: “Maopu-ku malou isee, yaku mbii kana malou ri Roma.” 22 Pade nitudu-namo rodua topantulungi-ya, i Timotius bo i Erastus, mampokoului-ya malou ri propinsi Makedonia, agiana i Paulus natida basangkia mbiipa kasaena ri propinsi Asia.
23 Rapa-rapana ri tempo eemo najadi kagesoa bete ri Efesus sabana pepatuduki nancambelai i Yesus. 24 Sabana ri ngata ee nariamo sadua pande nu salaka to nisanga i Demetrius, to nampowia sou-sou kodi penombaa lako ri salaka ri Karampua Bangkele Artemis. Lako ri bago ee nadea doi nirata nu topobago-topobago-na. 25 Eemo sabana nipasintobu-namo topobago-topobago-na noroa-roa ante topobago-topobago nu pande salaka ntanina, pade nanguli: “Sarara-sarara! Nincani dodo-mimo bakote nadea doi nirata-ta lako ri pobago-ta ei. 26 Tempo ei sarara-sarara nikalio pade nironge dodo-mimo nuapa to nipowia ni Paulus. Niuli-na karampua-karampua to nipowia nu manusia tado karampua mpuu-mpuu. Pade ia mbii nangala rara nu tou dea bona raparisaya-ra pepatuduki-na, tado kawule ri Efesus ei, agiana mapara mowolea mbiimo ri sumawee propinsi Asia. 27 Bunturuna bago-ta ei mawoumo sangana. Iwee mbii ante sou kodi nu karampua bangkele i Artemis kana rapandaente pade pampemabose-ya ratanalisa, bo ee ia-mo karampua bangkele to nipenombai nu sumawee to Asia pade sumawee dunia!” 28 Namparonge nuanu ee tou-tou ee narendemo rara-ra, pade nongare-ramo: “Raunemo i Artemis! Karampua bangkele nu to Efesus!” 29 Naopu ee nagesoamo ngata ee, pade nadombomo tou-tou nalou ri tana lapa potomua ri ngata ee pade nodisi mpokoe i Gayus bo i Aristarkhus, to Makedonia to namporoasi i Paulus ri polumakoa-na. 30 I Paulus madota mantutu-ra, mesua ri tongo-tongo nu tou dea ee, agiana tou-tou to neparisaya si Yesus isee nantagi-ya. 31 Basangkia dua pangka bete ri propinsi Asia ee mbii, to nampowega i Paulus, nantudu tou mangulikaka i Paulus bona nemo mesua-ya ri tana lapa potomua ee. 32 Bulana ee tou-tou to notobu ri tana lapa potomua ee najadi nagesoa. Naria to nongare iweei, naria mbii to nongare iweetu, apaa nadea-ra tado nanguncani nuapa sabana pade notobu-ra isee. 33 Saganta lako ri tou-tou ee nanguli i Aleksander-da najadi saba nu kagesoa ee, apaa ia-mo to nitumbanaka nu tou-tou to Yahudi ri ngayo nu tou dea. Pade noraemo i Aleksander ante pale-na nerapi bona rawei-ya loga mantunduka koro-na ri ngayo nu tou-tou ee. 34 Agiana panguncani-ra bakote to Yahudi-yada, nosangkani-ramo nongare rarana rojaa kasaena, nanguli: “Raunemo i Artemis, karampua bangkele nu to Efesus!” 35 Agiana guru tulisi ri ngata ee namala nampakalino tou dea ee. Nanguli-ya: “He, todea ri Efesus! Butu dua tou nanguncani-da bakote Efesus eimo ngata to nampiara sou penombaa karampua bangkele Artemis to nabete mpuu ee pade watu ewa lence-na to nanawu lako ri langi. 36 Tado namo saduaa tou mamala mampabili nuanu ee. Etumo sabana karoomo pade nemo mowia nuapa-pa ante mabarampapa. 37 Tou-tou to nikeni-mi namei isei tado nampangio isi ncou nu karampua baleilo ba nangkanene karampua bangkele-ta. 38 Jadi ande i Demetrius ante topobago-topobago-na naria nuanu rapangadukaka-ra tou, palambaka-ramo mangkeni kara-kara ee ri potangaraa. Naria dodo-da potangaraa to nasadia mantarima kara-kara pade gubernur mbii naria-da. 39 Agiana ande maria-dapa nuanu ntanina to mi-podota, nuanu ee kana rabotusi ri rara libu nu todea mantutu atura nu topoparenta-ta. 40 Sabana nuapa to najadi eo ei mamala mampakaweso-ta, pade ikita mamala rarei nampakagesoa ngata ei, apaa tado naria namo sangayaa noa-ta bona moparikonoi kagesoa ei.” Naopu nanguli sumawee ee, nitudumo nu guru tulisi ri ngata ee sumawee tou dea ee see manculi.