Lako ri propinsi Makedonia malou ri ngata Troas
20
1 Neuntu-pa kagesoaa ri ngata Efesus, nipasiromumo ni Paulus tou-tou to neparisaya pade nampakaroso rara-ra. Naopu ee nanguli-yamo iseimo-komiulu, pade nipapola-namo polumakoana nalou ri propinsi Makedonia. 2 Pade nipebutu-namo ngamba-ngamba ri propinsi Makedonia, pade nadea pedederi niwei-na ri tou-tou to namparisaya i Yesus radou bona mampakaroso rara-ra. Naopu ee nalou-yamo ri Yunani. 3 Tolu mbula kasae-na neari radou. Naopu ee bula-na nasasadia mewote malou ri propinsi Siria, nironge-na naria kareba bakote tou-tou to Yahudi nasintundu mopatesi-ya. Eemo sabana nibotusi-namo manculi moliu ri propinsi Makedonia. 4 Naria basangkia dua tou namporoasi-ya nolumako. Isira ee i Sopater ana ni Pirus lako ri Berea, i Aristarkhus pade i Sekundus to Tesalonika, pade i Gayus to Derbe, i Timotius, i Tikhikus pade i Trofimus to lako ri propinsi Asia. 5 Nipokoului-ra kamoa pade nopea ri Troas. 6 Kaopu nu Eo Bete Roti Tado Nampake Ragi, newote-kamo nampawia Filipi. Ri eo ka'alimana, narata-kamo ri Troas pade nosintobu ante isira isee. Isee-ka neari papitu eo. 7 Ri eo minggu ee notobu-kamo nangkondi sangkani, pade notibe-tibe roti bona mantora i Pue Yesus. Nipololitakamo ni Paulus tou-tou isee duuna ntongo bengi, apaa kaneilena moliwo-yamo meongko. 8 Ri rara ngkamara ri wumbuna, ri sou potubua-ka ee, nadea poindo nipatuwu. 9 Sadua kabilasa nisanga i Eutikhus noncunda ri kumbeo. Apaa nasae gaga i Paulus nololita, kabilasa ee nangantu mpuu nangkajadika naleta ri kumbeo ee, pade nanawu-yamo ri lempena lako ri wumbu nu sou katolu'uncuna. Tempo-ra no'ongko-ya, namate-yamo. 10 Agiana nesompomo i Paulus ri lempena, pade nengkadampa ri wongko nu kabilasa ee pade nikalipui-na. Nanguli i Paulus: “Nemo masusa rara-mi, natuwuya-dapa.” 11 Naopu ee nembua nculimo i Paulus ri wumbuna, pade nibagi-bagi-namo roti pade nikondi sangkani-ra. Pade nipepola-namo nampololitaka-ra duuna parabaa. Naopu ee neongkomo i Paulus. 12 Tou-tou nangkeni mpanculi kabilasa to natuwu nculi ee ri sou-na. Pade isira sumawee ee nadonu mpuu.Lako ri Troas nalou ri Miletus
13 Mantutu liwo ni Paulus to niatoro-na ante ikami, nalou-kamo ri kapala ntasi pade newote nokoulu malou ri Asos bona mantomunaka i Paulus radou, apaa ia modala ntana-yada. 14 Notomuka-pa ante i Paulus ri Asos, nikeni-ka yamo ri kapala ntasi pade nopapola polumakoa-ka nalou ri ngata Metilene. 15 Lako isee newote mbii-kamo, pade kaneilena narata-kamo ri ngata to nombe ngayosi ante lewuto Khios. Katuloeona narata-kamo ri lewuto Samos pade ka'aopoeona narata-kamo ri ngata Miletus. 16 Nibotusimo ni Paulus tadomo mesei ri ngata Efesus, bona nemo masae gaga meari ri propinsi Asia. Apaa dota-na, ande mamala, magasi-ya marata ri ngata Yerusalem ri eo bete Pentakosta.
Pogaa ni Paulus ante topangkeni todea nu Allatala ri ngata Efesus
17 Lako ri ngata Miletus i Paulus nopakatu petetesi ri Efesus nerapi bona topangkeni todea nu Allatala radou mamei mampomberataka-ya. 18 Naratara-pa, nangulimo i Paulus si sira: “Sarara-sarara nincani-mida beiwa katuwu-ku sinungka ei riolo-mi, nopamula lako ri eo paramulana karata-ku ri propinsi Asia. 19 Ante kaede nu rara, pade ante ue mata-ku, yaku nobago si Pue ri tongo-tongo nu kapepaa to nitodosaka-ku lako ri liwo nadaa nu to Yahudi. 20 Noudamo iwee, nincani-mida tado makaki-ku mangulikaka komi nuapa to tado nolotu si komi. Yaku nopatuduki komi ri potomua-potomua ntou dea pade ri sou-sou. 21 Baa ri tou-tou to Yahudi pade ri tou-tou to tado to Yahudi, nipopatoraka oa ku-ra bona mancoromo mowia jeko-jeko pade mamei ri Allatala, pade mamparisaya i Yesus Kristus, Pue-ta. 22 Tempo ei apaa natundu ri parenta Inosa Gasa, yaku malou ri ngata Yerusalem. Pade tado nincani-ku nuapa to kana majadi si yaku radou. 23 To nincani-ku ri butu-butu ngata, niulikaka-kumo nu Inosa Gasa Allatala, bakote yaku ngoni kana mesua ri tarungku pade kana mantodosaka kapepa. 24 Agiana tado kutapari katuwu-ku ei, asala mamala-ku marata ri to nitujui-ku pade mampakaopu bago to niparisayaka-ku ni Pue Yesus, mampopowole Kareba Belo nancambelai towe nu Allatala. 25 Naopumo komi nipebutu-ku sarara-sarara sumawee noparata kareba nancambelai Poparenta nu Allatala majadi Mbagou. Pade bulawee ei nincani-ku kana tadomo maria-ta motomu. 26 Eemo sabana ante mpuu-mpuu-ku manguli si komi eo ei, ande maria riolo-mi ei ngoni mamate ante tado meparisaya si Yesus, tadomo sala-ku. 27 Tado naria-ku nampanganika bago-ku, nopanotosi si komi sumawee liwo nu Allatala. 28 Eemo sabana jagai-da koro-mu pade jagai mbii sumawee todea nu Allatala, apaa niongkomo komi nu Inosa Gasa majadi topangkeni todea nu Allatala. Kakono-konona ikomi kana mojagai todea nu Allatala ee ewa topoewu nojagai bimba-na, apaa Allatala nopajadimo todea ee najadi todea-Na to nitolosi-Na ante kamatea nu Ana-Na dodo, i Yesus. 29 Maloukupa, kana marata serigala-serigala to nabia mesua ri tongo-tongo-mi, pade isira kana mampesimbukui mampakaropu tou-tou nijagai-mi. 30 Lako riolo dodo-mi ei mbii kana meumba basangkia dua tou to kana mampololita pepatuduki to tado nakono. Pade nipowia-ra ewa ee, bona tou-tou to namparisayamo i Yesus majadi mapusa pade mantutu dota-radamo. 31 Eemo sabana mainga-da! Toramo rarana tolu mpae-ku, eo bengina, tado naria-ku neuntu nopatuduki butu dua to lako riolo-mi ante nampandiu ue mata. 32 Bulawee ei ku-wei ri Allatalamo komi, bona Ia-damo mojagai komi. Kareba towe rara nu Allatala ee nakuasa mampakaroso komi, pade mambei komi gagu to nipasadia nu Allatala ri sumawee tou to nipatani-Na bona rapakagasa. 33 Tadopa naria-ku nampemei salaka ba bulawa ba powaru lako ba siyema-yema. 34 Nincani dodo-mi, ante kente dodo-ku nobago bona moparia kaparaloua-ku pade kaparaloua nu roa-roaku to nantutu-ku. 35 Ri rara nu sumawee kara-kara nipopakalio-kumo si komi, ante nobago ntomo ewa ei, ikita kana mantulungi tou-tou to tado nampakule. Apaa ikita kana mantora nuapa to niuli dodo ni Pue Yesus: ‘Neliu-pa kadonu ande mambei, pade mantarima.’ ” 36 Naopu-pa i Paulus nololita, notumbukotu-yamo ante isira sumawee pade nosambaya. 37 Pade nokeo-ramo pura, nokalipui lako i Paulus pade noeki-ya. 38 Nasusa mpuu rara-ra, apaa niuli ni Paulus tadomo maria-ra mangkalio-ya. Pade nibawa-ramo i Paulus narata ri kapala ntasi.