8
1 Agiana i Yesus nalou ri bulu Zaitun. 2 Kaneilena, sangkabaa-baa mpisi, nalou mbii-Yamo ri sou nu Allatala, pade nadea tou namei si-Ya. Noncunda-Yamo pade nopatuduki-ra. 3 Ranca-Na nepatuduki, naratamo topande-topande ri Buku Taurat bo to Farisi nangkeni si-Ya sadua bangkele to niratapongko nobualo. Nitudu-ramo bangkele ee mokongkore ri tongo-tongona, 4 pade nanguli ramo si Yesus: “Guru, bangkele ei niratapongko nobualo. 5 Ande mantutu parenta Taurat, tou ewa ei kana rawunu ante watu duuna mamate. Jadi beiwa pamparata-Mu nancambelai nuanu ee?” 6 Isira nampekutana i Yesus ewa ee, bona mamala-ra mampomasala-Ya.a Agiana i Yesus notumpa pade notulisi ante karawe-Na ri tana. 7 Apaa tado naria peuntua-ra nampekutana-Ya, nibao-Namo woo-Na pade nanguli si sira: “Yema to tado naria jeko-na riolo-mi ei, ia-mo to mokoulu mowunu bangkele etu ante watu.” 8 Naopu ee notumpaki mbiimo i Yesus pade notulisi ri tana. 9 Nironge-rapa sono ni Yesus ee, nangkosu-ramo sadua-sadua lako isee, nopamula lako ri to natotuana. Kaopuana to naboli isee i Yesus bo bangkele to nokongkore ri tongo-tongona ee-damo. 10 Jadi, nibaomo ni Yesus woo-Na pade nampekutana bangkele ee: “Riumba puramo see tou ee? Tado naria-ra nosuku-ko?” 11 Nesono bangkele ee, “Tado naria, Tuama.” Pade nangulimo i Yesus si-ya: “Yaku mbii tado mosuku-ko. Panculimo-ko, pade mopamula lako ri eo ei, nemo oa mowia jeko.”]I Yesus-mo kabaasa nu dunia
8:12-20
12 Naopu ee nololita mbiimo i Yesus ri tou dea ee. Nanguli-Ya: “Yaku-mo kabaasa nu dunia. Yema to mantutu-Ku tado molumako ri rara nu kadedia, agiana mantarima kabaasa to nambei katuwua.” 13 Nangulimo to Farisi-to Farisi ee si-Ya: “Iko nosabiti dodo koro-Mu, tado nakono posabiti-Mu etu.” 14 Nesono i Yesus: “Noudamo nosabiti dodo koro-Ku, agiana posabiti-Ku ee nakono, apaa nincani-Kuda lako riumba peumbaa-Ku, pade riumba kalouaa-Ku. I komi tado nanguncani lako riumba peumbaa-Ku, pade riumba-Ku malou. 15 I komi netangara nantutu posuka nu manusia ri dunia, agiana Yaku tado notangara bayema-yema. 16 Pade ande rapana Yaku metangara, pobotusi-Ku kana manoa, apaa tado sadua-Ku netangara, agiana noroa ante Tuama-Ku to nantudu-Ku. 17 Ri rara parenta Taurat naria nitulisi: Ande maria rodua sabi to masimbei posabiti-ra, posabiti-ra ee mamala raparisaya. 18 To nambei posabiti nancambelai-Ku naria rodua sabi, Yaku dodo pade Tuama-Ku to nantudu-Ku.” 19 Pade nanguli-ramo si Yesus: “Riumbawea Tuama-Mu ee?” Nesono i Yesus: “I komi tado nanguncani-Ku pade tado mbii nincani-mi Tuama-Ku. Ande rapana nincani-mi Ku, kana mi-ncani mbii Tuama-Ku.”
20 Sumaweena ee niuli ni Yesus tempo-Na nepatuduki ri Sou nu Allatala, najungku peti pambolia doi penomba. Agiana tado namo saduaa to nosoko-Ya, apaa tadopa narata tempona.
I Yesus tado lako ri dunia ei
8:21-29
21 Nanguli mbii mo i Yesus ri tou dea ee: “Yaku kana malou, pade i komi kana mangonco-Ku, agiana i komi kana mamate ri rara nu jeko-mi. Ri pearia kalouaa-Ku ee, tado mamala komi mamei.” 22 Pade nanguli puramo topangkeni to Yahudi ee: “Ba madota mopatesi koro-Nada, apaa niuli-Na: Ri pearia kalouaa-Ku ee, tado mamala komi mamei.” 23 Agiana niulikaka-ra ni Yesus: “I komi neumba lako riundena, Yaku neumba lako ri wumbuna. I komi neumba lako ri dunia ei, Yaku tado lako ri dunia ei. 24 Ee-mo sabana see pade niuli-Ku si komi bakote i komi kana mamate ri rara nu jeko-mi. Ande tado mi-parisaya bakote Yaku-mo Ia ee, i komi mpuu-mpuu kana mamate ri rara nu jeko-mi.” 25 Pade nepekutana-ramo: “Yema-Ko wea?” Nisonoi-ra ni Yesus: “Tadomo naria lotuna mololita ante i komi. 26 Nadeadapa nuanu nancambelai komi to madota Ku'uli bo Ku tangara, agiana tado Ku'uli. Kawule nuanu to nironge-Ku lako si-Ya to nantudu-Ku, ee-mo to kana Ku'ulikaka manusia ri dunia. Ia mamala raparisaya.” 27 Tado nincani-ra bakote i Yesus nololitaka-ra nancambelai Tuama-Na. 28 Ee-mo sabana pade niulimo ni Yesus si sira: “Ande mi-pakalangkodamo ngoni Ana Manusia ri kou salib, kana mi-ncanimo bakote Yaku-mo Ia ee, pade mi-ncani mbii bakote tado naria sangayaa nuanu to nipowia-Ku nantutu dota dodo-Ku. Yaku aga nanguli nuanu to nipatudukika-Ku nu Tuama-Ku. 29 Pade Ia to nantudu-Kumo, namporoasi oa-Ku. Tado nipalambaka-Na Ku sadudua-Ku, apaa Yaku nowia oa nuanu to nampakawoe rara-Na.”
Kakonoa to mepakabebasi
8:30-36
30 Naopupa i Yesus nanguli sumaweena ee, nadeamo to namparisaya-Ya. 31 Pade nangulimo i Yesus ri tou-tou to Yahudi to namparisaya-Yamo ee: “Ande matatapu dodo komi mantutu pepatuduki-Ku, i komi mpuu-mpuu majadi ana guru-Ku. 32 Ante ee-mo komi manguncani pepatuduki to nakono to mampakabebasi komi.” 33 Nesono-ramo: “I kami ei muli ni Abraham. Tadopa naria-ka nipobatua nu bayema-yema. Beiwa pade niuli-Mu: I kami rapakabebasi?” 34 Nanguli i Yesus si sira: “Kakono-konona Ku'ulikaka komi, butu dua tou to nowia jeko, ia nipobatua nu jeko. 35 Pade batua tado matatapu-ya ri rara ncou, agiana ana matatapu dodo meari ri rara ncou. 36 Jadi ande rapakabebasidamo komi nu Ana ee, i komi mpuu-mpuu nabebasimo.”
Muli ni Abraham to tado neumba lako ri Allatala
8:37-47
37 “Nincani-Kuda bakote i komi muli ni Abraham. Agiana i komi nampesimbukui madota mopatesi-Ku, apaa tado nadota komi nantarima pepatuduki-Ku. 38 Nuanu to nikalio-Ku ri Tuama-Ku, ee-mo to niuli-Ku si komi. Agiana i komi nowia nuanu to nipatudukika komi nu tuama-mi.” 39 Nesono-ra: “Tuama-ka i Abraham.” Pade nesonomo i Yesus: “Ande rapana nakono mpuu komi ana ni Abraham, i komi kana mantutu nuanu to nipowia ni Abraham. 40 Yaku noparata pepatuduki nakono to nironge-Ku lako ri Allatala si komi, agiana i komi madota mopatesi-Ku. Tado ewa ee inggu ni Abraham. 41 I komi nowia nuanu to nipowia nu tuama dodo-mi.” Nesono-ra: “I kami ei tado ngana-ngana to nipoanaka lako ri pobualo. Tuama-ka sadua ngkola, aga Allatala.” 42 Pade nanguli-mo i Yesus si sira: “Ande nakono Allatala ee Tuama-mi, tantu i komi mampotowe-Ku, apaa Yaku narata lako ri Allatala. Yaku narata tado nantutu dota dodo-Ku, agiana nantutu dota nu Allatala to nantudu-Ku. 43 Nuapa sabana pade tado nincani-mi nuanu niuli-Ku? Sabana tado nipakule-mi nantarima pepatuduki-Ku. 44 Tuama-mi Mbagou Seta-da, apaa i komi nadota nowia nuanu nipodota-na. Lako ri paramulana Mbagou Seta ee topepatesi. Tado nadota-ya namposambira kakonoa, apaa tado naria nuanu nakono ri rara-na. Ande maboa-ya, ee masipato ami-da, apaa ia to naboa ami pade tuama nu sumawee boa. 45 Agiana apaa Yaku nanguli kakonoana, ee-mo sabana pade tado niparisaya-mi Ku. 46 Yema riolo-mi ei mamala mopanotosi bakote Yaku nowia jeko? Ande Yaku manguli nuanu to nakono, nuapa pade tadso niparisaya-mi Ku? 47 Tou to neumba lako ri Allatala, ia kana mamparonge lolita nu Allatala. Agiana i komi tado to neumba lako ri Allatala, ee-mo sabana pade tado nadota komi namparonge lolita-Na.”
Tadopa naria i Abraham nariamo i Yesus
8:48-59
48 Pade nangulimo tou-tou to Yahudi ee si Yesus: “Nakono mpuuda nuanu niuli-ka bakote Iko to Samaria to nipesua nu wao tuwu.” 49 Nesonomo i Yesus: “Tado nipesua nu wao tuwu Ku. Yaku nampabila Tuama-Ku, agiana i komi nangkanene-Ku. 50 Yaku tado nangonco pampabila koro-Ku. Nariada To nampesimbukui bona rabila-Ku, pade Ia mbiimo to metangara. 51 Kakono-konona Ku'ulikaka komi, yema mantutu lolita-Ku, tado mamparasai kamatea-ya duuna masae-sae.” 52 Pade niulikaka-Yamo nu tou-tou Yahudi ee: “Nincani-kamo bakote Iko ei mpuu-mpuu nipesua nu wao tuwu. I Abraham namate yamo, pade nabi-nabi mbii namatemo. Agiana Iko nanguli: Yema mantutu lolita-Ku, ia tado mamparasai kamatea duuna masae-sae. 53 Ande namatemo i Abraham, pade nabi-nabi mbii namate puramo, yema-Ko ei? Maria mbii neliupa bete-Mu lako ri tuama-ka i Abraham.” 54 Nesono i Yesus: “Ande rapana Yaku nampabila dodo koro-Ku, tado naria lotu nu pebila ee. To nampabila-Ku aga Tuama-Ku to niuli-mi najadi Allatala-mi, 55 bo ee tado nincani-mi Ya. Agiana Yaku nanguncani-Ya. Ande rapana Ku'uli bakote tado nincani-Ku Ya, natantumo Yaku to naboa, nasimbei ewa i komi. Yaku nanguncani-Ya, pade natundu ri lolita-Na. 56 Tuama-mi i Abraham nadonu mpuu apaa ia mangkalio eo karata-Ku ri dunia. Nikalio-namo pade nadonu mpuu-ya.” 57 Pade nanguli mbiimo tou-tou to Yahudi ee si Yesus: “Umuru-Mu tadopa niratana alima mpulu mpae, mala-mala niuli-Mu nikalio-Mumo i Abraham.” 58 Nesono i Yesus: “Kakono-konona Ku'ulikaka komi, tadopa nipoanaka i Abraham, naria ami-Kumo.” 59 Namparonge lolita ni Yesus ee, niala-ramo watu bona mampawunu-Ya, agiana nekilipomo i Yesus, pade nangkosu lako ri Sou nu Allatala ee.