I Yesus nalou ri Yerusalem bona mantutu posusa Pobambaru Tawa
7:1-13
7
1 Naopu ee naloumo i Yesus nampebutu ngata ri ngamba Galilea. Tado nadota-Ya nalou ri Yudea apaa topangkeni-topangkeni to Yahudi ri Yudea madota mopatesi-Ya. 2 Tempo ee najungku-mo eo bete to Yahudi to niuli Susa Pobambaru Tawa. 3 Jadi nanguli-mo sarara-sarara ni Yesus si-Ya: “Koumo-Ko ri Yudea bona sumawee topantutu-Ko radou mamala mangkalio kaduaa-kadupaa to Mu-powia. 4 Apaa ande sadua tou madota matolele sangana, tado mamala-ya mowunika nuapa to nipowia-na. Ande Iko mowia kadupa-kadupaa, popakalio-mo ri-sumawee tou ri dunia.” 5 Apaa sarara-sarara dodo ni Yesus mbii tado namparisaya-Ya. 6 Nisonoi-ramo ni Yesus: “Tadopa narata tempo-Ku malou. Agiana ande i komi, naria oa-da tempo-mi malou. 7 I komi tado nipodaa nu dunia. Agiana Yaku nipodaa nu dunia, apaa Yaku nangulikaka dunia bakote pokainggu-ra nadaa. 8 Koumo komi dodo ri posusaa ee, Yaku tadopa malou-Ku apaa tadopa narata tempo-Ku malou.” 9 Iweemo lolita ni Yesus ri sarara-sarara-Na, pade natida-Yamo dodo ri Galilea.10 Agiana neongkopa sarara-sarara-Na nalou ri posusaa ee, Ia mbii nalou bongo-bongo ri posusaa ee. 11 Sinungka nu posusaa ee, topangkeni-topangkeni to Yahudi nangonco-Ya pade nepekutana: “Riumba-Yamo ei?” 12 Nadeamo tou nampombekanobisii-Ya. Naria to nanguli: “Ia tou nabelo.” Naria mbii to nanguli: “Tado, Ia nampakapusa tou dea.” 13 Agiana tado namo saduaa to nabia nololita ri ngayo nu tou dea nancambelai-Ya, apaa naeka-ra ri topangkeni-topangkeni to Yahudi.
Posabiti ni Yesus nancambelai koro-Na
7:14-24
14 Ranca kantomosa nu susa ee, nesuamo i Yesus ri Sou nu Allatala pade nepatuduki isee. 15 Namoleara mpuu topangkeni-topangkeni to Yahudi namparonge pepatuduki-Na. Pade nanguli-ra: “Beiwa pade nincani pura nu tou ei ngila ngayana, bo ee tado naria-Ya nipatuduki.” 16 Nisonoi-ramo ni Yesus: “Nuanu to nipepatudukii-Ku ei tado papatuduki dodo-Ku, agiana pepatuduki lako ri Allatala to nantudu-Ku. 17 Tou to nadota nantutu dota nu Allatala kana manguncani ba pepatuduki lako ri Allatala-da, ba pepatuduki dodo-Kuda. 18 Tou to nambei pepatuduki dodo-na, tou ee nangonco pampabila koro dodo-na. Agiana to nangonco pampabila Allatala, tou ee nanoa, pade tado naria-ya nebagiu. 19 Niweikakamo komi ni Musa parenta Taurat. Agiana riolo-mi, tado naria to nantutu parenta ee. Nuapa pade madota mi-patesi Ku?” 20 Nesono-mo tou dea ee: “Nipesua nu wao tuwu-Ko. Yemada madota mopatesi-Ko?” 21 Nisonoi-ramo ni Yesus: “Sangaya ngkola nuanu nipowia-Ku ri eo Peuntua, namoleara puramo komi. 22 I Musa nambeikaka komi atura bona ratindi. Kakono-konona atura petindi ee tado lako si Musa, agiana lako ri totua-mi impia. Ee-mo sabana i komi netindi dodo ri eo Peuntua. 23 Ande i komi nowia nuanu ee bona tado mangewa atura ni Musa nancambelai petindi, nuapa pade niposodo-mi Ku nampakaori sumangkoro nu sadua tou ri eo Peuntua? 24 Nemo mantangara tou mantutu nuanu nikalio, agiana tangaramo ante kanoaa.”
Pombebili nancambelai peumba ni Yesus
7:25-36
25 Naopu ee naria basangkia dua to Yerusalem nanguli: “Apa tado ei-mo tou nionco nu topangkeni-ta bona rapatesi-ra ee? 26 Kalio, nabebasi dodo-Ya nololita ri ngayo nu tou dea, pade tado naria to nangulikaka-Ya banuapa-pa. Ba nincanimo ngoni nu topangkeni-ta bakote Ia ei-mo Mbagou Topepakasalama ee? 27 Agiana ande Mbagou Topepakasalama ee marata, tado namo saduaa to manguncani lako riumba peumbaa-Na. Bo ee tou ei nincani-tada lako riumba peumbaa-Na.” 28 Tempo ni Yesus nepatuduki ri Sou nu Allatala, nongare-Yamo ante wotu narimbuku: “Jadi nincani-mida yema-Ku ei, pade lako riumba peumbaa-Ku? Yaku narata tado nantutu dota dodo-Ku. Yaku narata nantutu dota nu Allatala to nantudu-Ku, pade mamala-Ya raparisaya. Agiana i komi tado nanguncani-Ya. 29 Yaku nanguncani-Ya, apaa Yaku neumba lako si-Ya. Ia-mo to nantudu-Ku.”
30 Namparonge lolita ni Yesus ee, nipesimbukui-ramo mosoko i Yesus, agiana tado naria to namala nokakamu-Ya, apaa tadopa narata tempona.
31 Agiana lako riolo nu tou dea ee nadeamo to namparisaya-Ya. Nanguli-ra: “Ande Mbagou Topepakasalama ee marata, mamala-Yada mowia kadupaa madea ntotopa lako ri nuanu to nipowiamo nu tou ei?” 32 To Farisi-to Farisi namparonge tou dea ee nombekanobisi nampombeteweii i Yesus. Ee-mo sabana to Farisi bo tobalia-tobalia ri matana nantudu basangkia dua topojaga Sou nu Allatala malou mosoko i Yesus. 33 Nanguli-mo i Yesus ri tou dea ri rara Sou nu Allatala ee: “Tado-mo masae-Ku mamporoa komi. Maopu ee Yaku kana manculi ri to nantudu-Ku. 34 I komi kana mangonco-Ku, agiana tado mamala komi mampotomuka-Ku, pade tado mamala komi mamei ri pearia to Ku-pearii ngoni.” 35 Pade nombepololitakamo topangkeni to Yahudi ee: “Malou riumba-Yamo pade tadomo mamala-ta motomu ante Ia? Ba malou ri to Yahudi to natida ri ngata ntani riolo nu to Yunani, pade mopatuduki to Yunani-Yada? 36 Nuapa patuju nu lolita-Na nanguli: I komi kana mangonco-Ku, agiana tado mamala komi motomu ante i Yaku, pade tado mamala komi mamei ri pearia to Ku pearii ngoni?”
Ue to nambei katuwua
7:37-44
37 Ri eo kaopua nu susa ee, ri eo matana, nokongkoremo i Yesus ri Sou nu Allatala pade nopangara: “Yema-yema nabei wuu-na, ia kana mamei si Yaku bona manginu. 38 Ri rara Buku Nagasa nitulisimo: Yema to namparisaya-Ku, lako ri rara-na kana moili ue to nambei katuwua.” 39 To najadi patuju nu lolita ni Yesus ee, Inosa Gasa to kana ratarima nu tou to namparisaya-Ya. Sabana tempo ee tadopa niwei Inosa Gasa, apaa tadopa nipamabose i Yesus.
40 Nadea tou namparonge nuanu to niuli ni Yesus ee, pade lako riolo-ra naria to nanguli: “Ia ei mpuumo nabi to kana marata ee.” 41 Tou ntani mbii-na nanguli: “Ia ei-mo Mbagou Topepakasalama.” Agiana naria mbii tou nanguli: “Tado. Mbagou Topepakasalama tado marata lako ri Galilea. 42 Apaa ri rara Buku Nagasa nitulisi bakote Mbagou Topepakasalama kana meumba lako ri muli ni Daud, lako ri ngata Betlehem pearia ni Daud impia.” 43 Jadi nombebilimo tou dea ee nancambelai i Yesus. 44 Basangkia dua-ra madota mosoko-Ya, agiana tado namo saduaa to nangkakamu-Ya.
I Yesus nitunduka ni Nikodemus
7:45-52
45 Nanculipa topojaga-topojaga Sou nu Allatala to nitudu malou mosoko i Yesus ee ri tobalia-tobalia ri matana bo to Farisi-to Farisi ee, nipekutana-ramo: “Nuapa pade tado nikeni-mi Ya tumei?” 46 Nesono-ra: “Tadopa naria nironge-ka tou nololita ewa Ia!” 47 Nisonoi-ramo nu to Farisi-to Farisi ee: “Ba ante i komi mbiimo ngoni nipakapusa-Na? 48 Tadopa ngoni naria topangkeni to Yahudi ba to Farisi to namparisaya-Ya. 49 Kawule tou dea etu, apaa tado nincani-ra isi nu parenta Taurat. Masilaka mpuu-ra!” 50 Naopu ee nololita mbiimo sadua to Farisi to nisanga i Nikodemus to nariamo namei si Yesus. Nanguli-ya si sira: 51 “Mantutu parenta Taurat, tado mamala-ta mosuku tou ande tadopa raronge noa-na bo raparesa inggu-na.” 52 Nesono-ra: “Ba to Galilea mbiida-ko? Paresamo Buku Nagasa. Kana mu-ncanimo bakote tado naria nabi meumba lako ri Galilea.”
Bangkele to nobualo
7:53 - 8:11