Ezayi
Ezayi sagɩ tə yuu wa sʋgʋ
Ezayi yɩn Yɩɩ nii sʋ̀sʋ̀nʋ̀ nəfarʋ, Yɩzərayɛlə lʋʋ nii wa. Ʋ jìgə̀ Yɩɩ nii sʋ̀sʋ̀nʋ̀ máŋá wa, vaŋʋ yà nə wulə tɩa yuu payun tə pwə́rə́ wa, yá ʋ swɩ̀n Yɩɩ nii sʋ̀ràn, kʋ yí bɩna sapwɩlə. Yìə̀n tə ʋ nə swɩ̀n tə yoo sagɩ tə wa, tʋn máŋá wa, ka nə dara zənzən: Kʋ yí bɩna biələ. Ezayi yɩrɩ tə də̀ń də Hebərə-ba sʋgʋ nə yɩ Ba-Yígúrə́-Jə-Tiu joŋə. Yá jonu tə Yɩɩ nə pɩn tə dàń ləzoni pɩ̀à. Kʋ mʋ̀ nə pɩn sagɩ tə wa yìə̀n tə dɩ̀ ləzoni yuu máŋá mama.
Ezayi sagɩ tə jə swapitərə 66, yá tə pwɛ̀ púlə́ nəfaran batwa. Púlí mama bɩrɩ Yɩɩ lalʋʋ tə mɩɩ yoo nə yɩn nətʋ, máŋá wa, ka nə ba nyən də ka don.
TƏNTƏN BWALƖ tə wa (swapitərə 1—39), Ezayi swɩ̀n lalʋʋ tə con, də Ba-Yígúrə́-Jə-Tiu lɩŋa zaŋa ba yuu wa, wʋlʋŋʋ tə, də kʋ̀nkʋ̀n tə, də gɩgɩra tə yɩrɩ, tə nə tʋŋa lʋʋ nii tə wa. Ba-Yígúrə́-Jə-Tiu yɩ parɩ, yá ʋ yɩ lʋʋ mama pɩ̀ʋ́. Kʋ mʋ̀ yɩrɩ, ʋ wá kə ʋ lɩ̀à tə càn wa, ba cʋna tə yɩrɩ, yá ʋ wá kə dwíə́ nəkaran tə də càn wa, ba də cʋna yɩrɩ. Yɩɩ wá sugu Asiiri tɩ̀án də Babɩlɔnə tɩ̀án, ʋ kə ʋ lɩ̀à tə nə. Yá də càn təntə mɛ, Yɩɩ swɩ̀n də ʋ lɩ̀à tə tə wàá ʋ con, ba pìí ba twi. Cɩ́gá, máŋá wá bà, lìù mama nə wá ya lʋʋ nii tə wa də bɩcan sìə́.
BƏLƏ NII BWALƖ tə (swapitərə 40—55) swɩ̀n kòrù yoo. Kʋ mʋ̀ nə pɩn ba boŋə kʋ YƖZƏRAYƐLƏ LƖA KORU SAGƖ. Kʋ máŋá təntə wa, də Zwida lʋʋ lɩ̀à tə zʋ̀nɩ̀ mama wulə yongaʋ wa, Babɩlɔnə nə. Ba pwìí yá cʋ̀gʋ̀, ba ga ba yala mama jə. Yá Ezayi swɩ̀n ba con də, Yɩɩ wá lɩ ʋ lɩ̀à tə yongaʋ tə wa, ʋ ja pìí ʋ bà Zwerizalɛmə wa.
Bələ nii bwálɩ́ təntə swɩ̀n «Ba-Yígúrə́-Jə-Tiu tʋtʋnʋ» tə yoo (42.1-4; 49.1-6; 50.4-9; 52.13—53.12). Ezayi bɩrɩ də ʋ yɩ Ba-Yígúrə́-Jə-Tiu siŋu tə nə tʋn wá, «sə ʋ swɩ̀n Yɩɩ sʋywáŋʋ́ tə ʋ bɩrɩ labwana nə, sə ʋ zuri lɩ̀à tə bɩcanɩ, pucʋnɩ nə yí ba...» (swapitərə 61).
Zwezi lwarɩ də ʋ mʋ̀ Zwezi tətə yɩ ʋ twi ʋ pa Yɩɩ nii sʋ̀sʋ̀nʋ̀ Ezayi tʋtʋŋɩ tə nii sú (Lukə 4.16-21).
BATWA NII BWALƖ tə (swapitərə 56—66) yìə̀n tə máŋá wa, də ywə́ŋə́ tə zʋ̀nɩ̀ mama dàń pìí ba nan yongaʋ tə ba bà. Bwálɩ́ təntə wa, Ezayi swɩ̀n Sìə́ dɩɩn tə, də jwəŋə tə ba nə fwa ba pɩn Yɩɩ nə, də yɩjʋnɩ yoo zənzən. Ʋ bɩrɩ də tə jə funə zənzən tə pa Yɩɩ nə, kʋ máŋá tə wa. Yɩɩ bɩrɩ də, ʋ wá fwa zəni ʋ lɩ̀à tə yɩra, də ba nə yɩ pùə́ nədʋ tɩ̀án də wá. Yá Yɩɩ nii sʋ̀sʋ̀nʋ̀ tə tà Zwida lʋʋ nii lɩ̀à tə cɩcɩ yɩrɩ, kʋ yɩ dwíə́ nəkaran tə də mama yɩrɩ. Dwíə́ nəkaran tə də wá də́ lanworu nədʋn də tɩa nədʋn tə nywarɩ, Ba-Yígúrə́-Jə-Tiu nə wá fwa:
«Candʋan mama, də sìə́ dɩɩn mama,
lʋʋ ləzoni mama wá bà,
ba tʋ ba nadwana yuu à yáá con,
ba pa nə dun.
À mʋ̀ Ba-Yígúrə́-Jə-Tiu nə swɩ̀n kʋ!» (66.23)
Sagɩ tə sʋyun
Təntən bwálɩ́ (1—39)
Yɩɩ bɩrɩ də Zwida lʋʋ lɩ̀à tə də Yɩzərayɛlə lɩ̀à tʋn cʋna (1—5)
Yɩɩ bɩrɩ yoo Ezayi nə, nɩʋn wa (swapitərə 6)
Yɩɩ nii sʋ̀ràn duən Zwida də Yɩzərayɛlə payun tə yuu wa (7—12)
Yɩɩ bʋ̀rɩ̀ dwíə́ nəkaran tə bʋra, sə ʋ cʋ̀gʋ̀ ba (13—23)
Yɩɩ wá də́ dɩ̀àn (24—27)
Yɩɩ wá bʋ̀rɩ̀ ʋ lɩ̀à tə bʋra (28—31)
Yɩɩ wá kə Edomə tɩ̀án càn wa, ʋ ga fwa zəni Zwerizalɛmə tɩ̀án yɩra (32—35)
Ezekɩasə jìgə̀ pɩ̀ʋ́ (36—39)
Bələ nii bwálɩ́ (40—55)
Yɩɩ wá jon ʋ lɩ̀à tə (40—48)
Yɩɩ tʋn ʋ tʋtʋnʋ (49—53)
Yɩɩ wá tʋn yoo tə, ʋ nə kàn nii sə ʋ tʋn (54—55)
Batwa nii bwálɩ́ (56—66)
Dwíə́ nəkaran tə wá twá ba ya Yɩɩ lɩ̀à tə wa (56.1-8)
Yɩɩ wá kə yáá tɩ̀án tə càn wa (56.9-59)
Yɩɩ wá pa Zwerizalɛmə ja dun (60—62)
Yɩɩ wá fwa lʋʋ nədʋn (63—66)