Ba-Yígúrə́-Jə-Tiu tʋtʋnʋ tə yoo
42
1 Nə̀ń à tʋtʋnʋ tə à nə kúrí!À swə ʋ yáá yoo zənzən,
ʋ ga twá à fɩra nə.
À ken à Siŋu* tə ʋ yuu wa,
yá ʋ wá bɩrɩ cɩ́gá cwəŋə lʋʋ dwíə́ tə nə.
2 Ʋ bá cə̀rí ʋ kə yɩɩ nə,
ʋ bá zɩ̀n ʋ kori yɩɩ nə,
ʋ bá bòrì coŋi yuu.
3 Ʋ bá kɛ́n mɩncanɩ tə nə gori,
ʋ bá də̀ŋə̀ cànʋ́ tə nə pɩ̀à kʋ də̀ŋə̀.
Ʋ wá tʋn yoo mama, kʋ twá cɩ́gá nə,
ndə kʋ nə mɛ nətʋ.
4 Ʋ dɩ̀àn bá mun,
ʋ jɩɩn bá gwàrɩ̀,
kʋ va kʋ yí máŋá tə,
ʋ nə wá pa yoo mama tʋn tɩa yuu wa,
kʋ twá cɩ́gá nə, ndə kʋ nə mɛ nətʋ.
Mʋʋ titəŋi wa lʋʋ níə́ tə dànɩ̀ ʋ nii yìə̀n tə.
5 Nə̀ń kʋ tə Yɩɩ tə nə yɩ Ba-Yígúrə́-Jə-Tiu nə swɩ̀n.
Ʋ mʋ̀ nə fwa lanworu tə, ʋ ga larɩ kʋ,
ʋ mʋ̀ nə tún tɩa tə, də ka yuu tɩ̀án tə də gaʋ tə,
ʋ mʋ̀ nə pɩn siŋu tɩa yuu ləzoni mama nə,
ʋ ga pɩn vʋʋ kʋ nə pɩn mɩɩ
wiən tə mama nə, tə nə vəli tɩa yuu:
6 «À mʋ̀ Ba-Yígúrə́-Jə-Tiu bon mʋ́,
à kə cɩ́gá cwəŋə wa,
yá à jə n jɩɩn nə,
à ywàŋá n yuu,
sə kʋ twá də mʋ́,
à ma tún nimarʋ də lalʋʋ tə,
sə n ga ya dwíə́ nəkaran tə poni.
7 Sə n súrí lilirən yɩ́á,
sə n lɩ bandiə lɩ̀à bandiə wa,
n ga lɩ lɩ̀à tə nə wulə yongaʋ wa, yikunu wa.
8 À mʋ̀ nə yɩ Ba-Yígúrə́-Jə-Tiu,
mə à yɩrɩ nə nətʋ.
À bá pa à dun tə lìù don nə,
à ma bá sɛ̀ à pa woŋwanan
jon bʋra tə ba nə pɩn nə.
9 Təntən yìə̀n tə tʋn, tə kɛ̀ń,
yá à dàń swɩ̀n yìə̀n nədʋra yoo, à bɩrɩ.
À swɩ̀n tə yoo à bɩrɩ aba, də tə tə wà pɛ́n.
Nuŋə nədʋn
10 Á nuŋə nundʋn,
á ma bʋ Ba-Yígúrə́-Jə-Tiu nə!
Á sinti tɩa nii yígúrə́ nə, á bʋ ʋ nə,
á mʋ̀ mʋʋ yuu cwəvələ tə,
də á mʋ̀ mʋʋ wa wiən tə,
də mʋʋ titəŋi wa lʋʋ níə́ tə, də tə lɩ̀à tə!
11 Kasɔɔ lanworu tə də kʋ tɩan tə wa lɩ̀à tə,
zɩan ba kwərə yɩɩ nə,
sə Kedarəa tibii tə wa lɩ̀à tə də zɩ̀n ba kwərə yɩɩ nə!
Selab tɩ̀án maga pupwən cə̀rí!
Ba zɩga pɛɛn tə yuparɩ wa,
ba mà babarɩ cə̀rí!
12 Ba pɩan dun Ba-Yígúrə́-Jə-Tiu nə,
ba bwɩa ʋ nə, mʋʋ titəŋi wa lʋʋ níə́ tə wa!
13 Ba-Yígúrə́-Jə-Tiu naŋa ndə ladɩa nə,
kʋ̀ʋ̀ tɛgʋ fɩra ga jə wá, ndə kwatarʋ babɩʋ nə.
Ʋ mà kʋ̀ʋ̀ cə̀rə́, ʋ cə̀rí ʋ kə yɩɩ nə,
ʋ dí dɩ̀àn ʋ dʋŋa yuu wa.
Yoo tə Ba-Yígúrə́-Jə-Tiu nə tanɩ, sə ʋ tʋn
14 À púə́ à nii, kʋ dán zənzən,
à cɩ́nɩ́, à jə à tɩ̀àn.
Yá sɩ́ʋ́n nə, à dàń wá bubwi ndə kan nə,
ʋ pùə́ nə yɩ̀ sə ʋ lɩra,
à ga fʋrɩ, à siŋu nə jə yɩrɩ.
15 À wá cʋ̀gʋ̀ pɛɛn tə də dədwələn tə,
à ga pa tə yuu galɩʋ tə mama kʋ̀.
À wá pa mʋnɛɛ lwàń
tə jì mʋʋ titəŋi wa lʋʋ níə́,
à ga pa bun tə kʋ̀.
16 À wá pa lilirən va cwəŋə wa,
ba yà nə yəri.
À wá kə ba coŋi wa,
ba nə wà dí yáá ba tì.
À wá pa yikunu lwàń
kʋ jì poni, ba yáá con,
à ga pa bwálɩ́ tə nə jə gwàlán
jì tɩtalʋ, kʋ mɛ duən.
Mə yoo təntə nə à wá tʋn,
yá à bá vɩ ba à dʋgʋ.
17 Ba wá pìí ba kə ba kwa,
ba ga wá də́ cavɩra,
ba mʋ̀ lɩ̀à tə nə vwə ba tɩ̀àn woŋwanan nə,
ba mʋ̀ lɩ̀à tə nə swɩ̀n lugu con,
ba nə nyɩan, ba ma fwa woŋwanan,
ba wʋ́: «Á mʋ̀ nə yɩ nə yɩa!»
Lalʋʋ tə nə yɩ zɩbanənyɩna
18 Á mʋ̀ zɩnbʋŋa-ba, á cʋga!
Á mʋ̀ lilirən-ba, á súrə́ á yɩ́á, á ywàń!
19 Wàà nə yɩ liliu, də kʋ nə tà à tʋtʋnʋ tə?
Wàà nə yɩ zɩbʋŋʋ, ndə à tʋntʋnʋ tə nə,
à nə tʋn?
Wàà nə yɩ liliu, ndə lìù tə nə, ʋ nə nɩ bɩcan sìə́,
nə à yə̀ə́ ndə Ba-Yígúrə́-Jə-Tiu tʋtʋnʋ tə nə?
20 Á nɩ yìə̀n zənzən,
yá á wà kʋ nədʋ mama jɩn, á yuu wa.
Á zɩan súrí, yá á wà yoo mama nì.
21 Ba-Yígúrə́-Jə-Tiu yà pɩ̀à,
sə ʋ twá də ʋ cɩ́gá cwəŋə tə,
ʋ ma bɩrɩ ʋ nii yìə̀n tə nə jə dun,
tə ga jə fɩra nətʋ.
22 Yá nə̀ń kʋ nə,
ba yɩ lalʋʋ ba nə vɩrɩ ba wiən,
ba jon də dɩ̀àn!
Ba kʋa zanba gwàlán,
ba ma ja ba mama,
ba səgə bandii wa.
Ba vɩrɩ ba,
yá lìù mama wà ba jon!
Ba jon ba wiən,
yá lìù mama wà swɩ̀n, ʋ wʋ́:
«Pìrə́ á pa ba ba wiən!»
23 Á wàà nə wá guni ʋ zɩɩn,
ʋ cʋgʋ yìə̀n təntə?
Wàà nə wá zuri ʋ yɩra,
ʋ cʋgʋ, máŋá wa ka nə bɩ̀àn?
24 Wàà nə jɩn Zwakɔbə dwíí tə,
ʋ kə lɩ̀à tə jɩɩn wa,
ba nə jon ba wiən də dɩ̀àn,
ʋ ga ja Yɩzərayɛlə lɩ̀à,
ʋ kə lɩ̀à tə jɩɩn wa, ba nə vɩrɩ wiən?
Kʋ tà Ba-Yígúrə́-Jə-Tiu,
nə nə tʋn cʋna nə zɩgɩ ʋ nə naaa?
Ba wà sɛ̀ sə ba twá ʋ coŋi tə,
yá ba wà ʋ nii yìə̀n tə zìlí.
25 Kʋ mʋ̀ nə pɩn, Ba-Yígúrə́-Jə-Tiu
ma fwi ʋ lɩŋa tə nə pupwin,
Yɩzərayɛlə lɩ̀à yuu wa,
ʋ pa kʋ̀ʋ̀ nəfarʋ cʋ̀gʋ̀ ba.
Ʋ lɩŋa tə kwé ndə mən nə,
tə kɩkarɩ ba tɩa mama,
yá ba wà lwarɩ won tə nə pɩn, kʋ yɩ nətʋ.
Tə dí ba,
yá ba wà kʋ jələ, ndə cɩ́gá cɩ́gá yoo nə.