Zweremi
Zweremi sagɩ tə yuu wa sʋgʋ
Yɩɩ nii sʋ̀sʋ̀nʋ̀ Zweremi máŋá tə wa, də Asiiri tɩ̀án yà nə də́ dɩ̀àn Yɩzərayɛlə lʋʋ nii tə mama yuu wa. Yá Babɩlɔnə tɩ̀án ta ba, kʋ pa ba bwànɩ̀. Zwida pɩ̀ʋ́ Zozɩasə də dàń twá kʋ dwana nə, ʋ ma pìí ʋ jon Yɩzərayɛlə payuu nədwan tə vàn don. Yá Ezwipətə tɩ̀án gʋa wá, ba ga tún Yehoyakimə, sə ʋ də́ pàrɩ̀ tə ʋ yuu nə. Kʋ nə yí ndə bɩna 12 nə kwa nə, Babɩlɔnə pɩ̀ʋ́ Nebukadənezarə kwatara tə twi ba ta Zwerizalɛmə, yá ba jɩn lalʋʋ tə vàn don, də Yehoyakimə bìú Yehoyakinə, ba ja va yongaʋ, ba ga tún Sedekɩasə ba nɩbɛɛ Davidə padaʋ tə yuu wa. Sedekɩasə yà yɩ labwanʋ ʋ ga ba tɩntɩan yoo jə. Kʋ nətʋ tə pɩn ʋ yá ʋ pa ba gɩgarɩ wá, ba pa ʋ zàn ʋ zɩgɩ Babɩlɔnə tɩ̀án nə. Yá Babɩlɔnə tɩ̀án twi ba pú Zwerizalɛmə nə də kʋ̀ʋ̀, bɩnɩ pə́rɩ́, yá ba ta tɩʋ tə ba də́, ba ja pɩ̀ʋ́ Sedekɩasə, ba sʋ̀rɩ́ Yɩɩ dìə̀ tə, ba ga ja lalʋʋ tə ləzwəndʋn tə ba va yongaʋ. Zwida lʋʋ lɩ̀à gɩganɩ tə vəli ba kwálɩ́ ba yuu Ezwipətə nə, yá ba kalɩ Yɩɩ nii sʋ̀sʋ̀nʋ̀ Zweremi ba ja va lá. Mə lá nə ʋ tɩga.
Yɩɩ nii sʋ̀sʋ̀nʋ̀ Zweremi yà na yìə̀n kapʋpʋ, Yɩɩ nə twá yojanan təntə wa, ʋ ma dwì súú ʋ lalʋʋ tə nii nə, ba nə yɩ pwìí bələ tɩ̀án. Zweremi swɩ̀n ba con də ʋ bwɛ́, də cwəŋə nədʋ cɩcɩ nə wulə, ba nə wàá ba tì, sə ba ma jɛ́n cʋcʋran yáá nə: Ka mʋ̀ nə yɩ sə ba pìí ba bà Yɩɩ con, ba yá nimarʋ túŋú nə də Ezwipətə tɩ̀án, ba ga sɛ̀ bwànɩ̀, sə Babɩlɔnə tɩ̀án də́ dɩ̀àn ba yuu wa. Kʋ nətʋ tə pɩn ba jələ Zweremi ndə níə́ bələ tíú nə, yá ba fɩfɩn wá. Kʋ wà mwálɩ́ yɩn kʋ pa wá, sə ʋ sɛ̀ kʋ nətʋ tə, də ʋ nə swə ʋ jə sonu zənzən, ʋ pa ʋ lalʋʋ tə nə. Kʋ mʋ̀ nə pɩn máŋá don wa, ʋ yàá tʋŋa Yɩɩ tʋtʋŋɩ tə də ʋ ŋʋŋwɩn (11.18—12.6; 15.10-21; 17.14-18; 18.18-23; 20.7-18).
Zweremi yɩrɩ tə də̀ń nə yɩ, «Lìù tə Yɩɩ nə ken dun ʋ yuu wa». Ʋ swɩ̀n Yɩɩ nii sʋ̀ràn pɛ̀gá kapʋpʋ pàrɩ̀ máŋá wa, yá kʋ tə nə dwə, kʋ yɩn pɩ̀ʋ́ Zozɩasə pàrɩ̀ máŋá wa. Ʋ swɩ̀n Yɩɩ nii sʋ̀ràn kʋ bólí bɩna sapwɩlə. Yɩɩ pɩn ʋ jì ʋ nii sʋ̀sʋ̀nʋ̀ lʋʋ dwíə́ tə mama yɩrɩ (1.5). Zweremi sagɩ tə bɩrɩ də Yɩɩ tʋtʋnʋ nə yɩ pùə́ nədʋ tíú, Yɩɩ tʋtʋŋɩ tə nə swə kʋ cà nətʋ mama, ʋ wàá kʋ ʋ tʋŋa, də ʋ nə swə ʋ yɩ ʋ cɩcɩ, yá ba zɩga ʋ nə, ba fɩfɩn wá, ba ga pɩ̀à sə ba lɩ ʋ mɩɩ.
Sagɩ tə sʋyun
- Yɩɩ bon Zweremi sə ʋ ya ʋ nii sʋ̀sʋ̀nʋ̀ (1)
- Yɩɩ wá kə Zwida lʋʋ lɩ̀à də Zwerizalɛmə tɩ̀án càn wa (2—26)
- Zweremi swɩ̀n ʋ zɩga kʋ̀nkʋ̀n Yɩɩ nii sʋ̀sʋ̀nà tə nə (27—29)
- Yɩɩ ja ʋ lɩ̀à tə ʋ pìrí ʋ bɩ̀àn ʋ con (30—33)
- Zweremi Yɩɩ tʋtʋŋɩ tə nə yɩn nətʋ (34—38)
- Babɩlɔnə tɩ̀án cʋ̀gʋ̀ Zwerizalɛmə tɩʋ tə (39—42)
- Ba ja Zweremi ba va Ezwipətə lʋʋ nii (43—44)
- Yɩɩ swɩ̀n Zweremi dabɛɛ Barukə con (45)
- Yɩɩ wá cʋ̀gʋ̀ dwíə́ nəkaran tə (46—51)
- Nətʋ tə Babɩlɔnə tɩ̀án nə ta Zwerizalɛmə tɩʋ tə ba də́, ba ga cʋ̀gʋ̀ kʋ (52).