Paswurə vwə Zweremi yoŋi nə
20
1 Yɩmɛrə bìú Paswurə, ʋ nə yɩ Yɩɩ joŋwanʋ, ʋ ga yɩ lɩ̀à tə nə ywàŋá Ba-Yígúrə́-Jə-Tiu dìə̀ tə yuu nə yáá tíú, nì Yɩɩ nii yìə̀n təntə, Zweremi nə swɩ̀n. 2 Yá Paswurə mà Yɩɩ nii sʋ̀sʋ̀nʋ̀ Zweremi, ʋ ja ʋ vwa yoŋi nə, Bɛnzwamɛn dwíí baan con mimii tə nə, Ba-Yígúrə́-Jə-Tiu dìə̀ tə wa. 3 Yá kʋ tɩpʋrɩ nə, Paswurə nə twi sə ʋ kʋ̀rɩ̀ Zweremi ʋ dʋgʋ, Zweremi swɩ̀n ʋ con, ʋ wʋ́: «Ba-Yígúrə́-Jə-Tiu kʋ́ʋ̀ bá bon mʋ́ Paswurə, ʋ dàń yɩ ʋ boŋə mʋ́ “Bwálɩ́-mama-fən!” 4 Cɩ́gá, nə̀ń kʋ tə Ba-Yígúrə́-Jə-Tiu nə swɩ̀n: “À wá kə mʋ́ fən jɩɩn wa, n də n dabara tə mama. Ba dʋŋa kwatara sɩ̀ʋ́ wá dɩ ba tɩa, yá n yɩ́á wá na kʋ nətʋ tə. À wá kə Zwida lalʋʋ tə də mama Babɩlɔnə pɩ̀ʋ́ jɩɩn wa, ʋ ja va yongaʋ, Babɩlɔnə nə, yá ʋ wá gʋ ba də kwatara sɩ̀ʋ́. 5 À wá kə tɩʋ kʋ tə tɩ̀án jɩjə wiən tə mama, də won tə mama ba nə tʋn ba na, də ba wiən tə mama nə jə funə, də Zwida pɛ̀gá tə jɩjə wiən tə mama ba dʋŋa jɩɩn wa, sə tə ya wiən ba dʋŋa nə ta ba jon kʋ̀ʋ̀ wa. Ba wá lɩ tə, ba zɩn ba ja va Babɩlɔnə. 6 Yá n tətə Paswurə, də n dìə̀ lɩ̀à mama wá va yongaʋ. N wá va Babɩlɔnə, yá mə lá nə n wá tɩ, ba gùrì mʋ́, n mʋ́ də n dabara tə mama, n nə swɩ̀n kʋkʋn Yɩɩ nii sʋ̀ràn ba con.”»Zweremi ŋʋŋwɩn Yɩɩ con
7 Ba-Yígúrə́-Jə-Tiu, n swɩ̀n n ja nə,
yá à yá à pa n swɩ̀n n ja nə.
N jɩn nə, yá n dí dɩ̀àn à yuu wa.
Yá dɩɩn mama, à dàń yɩ ba fʋfʋlɩ,
lɩ̀à tə mama ga mʋŋa nə.
8 Cɩ́gá, máŋá mama à nə wá swɩ̀n,
kʋ yɩ kálʋ́, sə à baa à kə yɩɩ nə,
à swɩ̀n à bɩrɩ də kʋ yɩ,
«ka tʋn dɩ̀àn duən yɩra, də cʋcʋran!»
Cɩ́gá, dɩɩn mama, ba fʋfʋlɩ nə,
də ba mʋŋa nə,
n mʋ̀ Ba-Yígúrə́-Jə-Tiu nii sʋ̀ràn tə yɩrɩ,
à nə swɩ̀n.
9 À nə swɩ̀n, à wʋ́:
«À kʋ́ʋ̀ ba swɩ̀n Ba-Yígúrə́-Jə-Tiu yoo,
à kʋ́ʋ̀ ba swɩ̀n ʋ yuu yɩrɩ,»
ʋ sʋgʋ tə yàá yɩ ndə mən nə,
tə nə kwe à bɩcan wa, tə də́ nə.
Kʋ wulə à kurən tə wa,
à yàá kə dɩ̀àn mama, sə à dàn ká swɩ̀n kʋ,
yá à wàrɩ̀.
10 À nə̀ń də lɩ̀à zənzən swɩ̀n à lwanɩ yoo,
ba dɩga yɩrɩ ba pa nə,
ba boŋə nə “Bwálɩ́-mama-fən”.
Ba duən yàá swɩ̀n, ba wʋ́:
«Á gwìə́n ʋ də̀ń!»
Ba duən də ga swɩ̀n, ba wʋ́:
«Awoo, nə gwìə́n ʋ də̀ń!»
À dabara də tətə dànɩ̀ à tʋrɩ,
ba pɩ̀à yoo sə ba ma ja nə,
yá, ba swɩ̀n ba wʋ́:
«Nə wá ja ʋ də̀ń nə,
yá nə wá də́ dɩ̀àn ʋ yuu wa,
nə ga fwi nə lɩŋa ʋ yuu wa!»
11 Yá Ba-Yígúrə́-Jə-Tiu wulə də nə,
ndə kwatarʋ babɩʋ nə.
Kʋ mʋ̀ nə pɩn, lɩ̀à tə nə fɩfɩn nə,
wá mà ba nɛɛ, ba tʋ,
ba bá də́ dɩ̀àn.
Ba wá də́ cavɩra zənzən,
ba nə wà nə wànɩ́ yɩrɩ.
Tə wá ya cavɩra máŋá mama,
lìù mama nə bá swɛ̀ɛ́ tə yoo.
12 Ba-Yígúrə́-Jə-Tiu, n nə yɩ kwatara Yɩɩ,
n yàá mɩ̀àn cɩ́gá tíú,
n lwarɩ ʋ pubʋŋa də ʋ bɩcan nə yɩ nətʋ.
À wá na nətʋ tə n nə wá fwi n lɩŋa ba yuu wa.
Cɩ́gá, n mʋ́ jɩɩn wa nə, à yá à yoo tə.
13 Á nuŋə á ma bʋ Ba-Yígúrə́-Jə-Tiu nə!
Cɩ́gá, ʋ joŋə labwanʋ mɩɩ,
lɩ̀à tə jɩɩn wa, ba nə tʋŋa lwanɩ.
14 Zɩra wulə dɩɩn tə ba nə lɩrɩ nə yuu wa!
Yɩɩ dàn ká fwa zəni dɩɩn tə yuu wa,
à nuu nə lɩrɩ nə!
15 Zɩra wulə bɛɛ tə yuu wa,
ʋ nə pɩn ŋwɛn nəywaŋʋ tə à nyɩna nə,
ʋ swɩ̀n, ʋ wʋ́:
«N kan tə lɩrɩ bibɛɛ»,
kʋ pa à nyɩna sú də pupwən!
16 Yɩɩ wá pa ʋ mʋ̀ bɛɛ təntə ya ndə tɩan tə nə,
Ba-Yígúrə́-Jə-Tiu nə buburi duən yuu,
ʋ ga wà tə yinəgə dəri!
Yɩɩ wá pa ʋ nì bubwiə jɩjʋ nə,
ʋ ga nì kʋ̀ʋ̀ cə̀rí yɩcakʋrʋ wa!
17 Bɛ̀ɛ̀ nə pɩn Yɩɩ wà nə gwɩ à nuu wa,
sə à nuu pùə́ tə yà jì à libəri?
Yá à dàń yà wá mɛn ʋ pùə́ tə wa!
18 Bɛ̀ɛ̀ nə pɩn à nan à nuu pùə́ wa,
sə à na càn də pucʋnɩ?
Kʋ yɩ sə à gúrí à mɩɩ tə cavɩra wa naaa?