Zweremi 21

Ba-Yígúrə́-Jə-Tiu le pɩ̀ʋ́ Sedekɩasə

1 Ba-Yígúrə́-Jə-Tiu swɩ̀n sʋ̀ràn tə tə Zweremi con, máŋá tə pɩ̀ʋ́ Sedekɩasə nə tʋn Maləkɩya bìú Paswurə, də Maseya bìú Sofoni, ʋ nə yɩ Yɩɩ joŋwanʋ, sə ba swɩ̀n Zweremi con, ba wʋ́: 2 «Bon n kə Ba-Yígúrə́-Jə-Tiu nə, n pa nəba. Cɩ́gá, Babɩlɔnə pɩ̀ʋ́ Nebukadənezarə wulə ʋ tɛ nəba. Kʋ wàá də Ba-Yígúrə́-Jə-Tiu wá tʋn ʋ yomɩlʋ tə don nə yuu yɩrɩ, sə kʋ pa ʋ va yiŋʋnɩ, ʋ yá nəba.»

3 Zweremi le lɩ̀à tə ba nə tʋn tə, ʋ wʋ́: «Á vələ á swɩ̀n Sedekɩasə con, 4 də ʋ nə̀ń kʋ tə Ba-Yígúrə́-Jə-Tiu, ʋ nə yɩ Yɩzərayɛlə lɩ̀à Yɩɩ nə swɩ̀n: “À wá pa kwatarɩ zɩla tə nə wulə á jɩ̀àn wa, á ma tɛ Babɩlɔnə pɩ̀ʋ́, də Kaləde tɩ̀án tə, ba nə twi ba pú aba ba kə á tɩʋ tə wa, pìí tə ta tətə. Ba wulə á tɩʋ tə biritaŋʋ tə kwa, yá à wá pa ba zʋ kʋ wa. 5 À tətə wá te à jɩɩn, à ta à zɩgɩ á nə, də à vàn dɩ̀àn, sə á ma lwarɩ də à lɩŋa zàn á yuu wa, tə fʋrɩ, tə ga pupwin zənzən. 6 À wá mà tɩʋ kʋ tə tɩ̀án, də ba vàná mɛ, à pa tɩan yayɩpwarʋ gʋ ba zənzən. 7 Kʋ kwa nə, à wá kə Zwida pɩ̀ʋ́ Sedekɩasə, də ʋ tʋ̀tʋ̀nà tə, də lalʋʋ tə, də lɩ̀à tə kwatara sɩ̀ʋ́, də niən, də tɩan yayɩpwarʋ nə wà gwɩ, Babɩlɔnə pɩ̀ʋ́ Nebukadənezarə jɩɩn wa, də ba dʋŋa jɩɩn wa, də lɩ̀à tə nə pɩ̀à ba gʋrɩ jɩɩn wa. Nebukadənezarə wá goŋə ba bɩan də kwatara sɩ̀ʋ́, ʋ bá dəri ba yinəgə, ba yoo bá ja wá, ʋ bá yá ba ladʋa tətə mɩɩ lʋʋ wa. À mʋ̀ Ba-Yígúrə́-Jə-Tiu nii sʋgʋ nə!” »

8 Kʋ nə yɩ lalʋʋ tə mʋ̀, n wá swɩ̀n ba con, n wʋ́: «Nəŋə kʋ tə Ba-Yígúrə́-Jə-Tiu nə swɩ̀n: À tún mɩɩ cwəŋə, də tɩan cwəŋə á yáá con. 9 Lìù tə mama ʋ nə mɛn tɩʋ kʋ tə wa, kwatara sɩ̀ʋ́, nə à yə̀ə́ niən, nə à yə̀ə́ tɩan yayɩpwarʋ nə wá gʋ wá. Yá lìù tə ʋ nə nan ʋ pa ʋ tɩ̀àn Kaləde tɩ̀án tə nə, ba nə púə́ aba ba kə, ʋ wá ya mɩɩ wa, ʋ bá kwɩ̀n ʋ mɩɩ tə mʋ̀ nə. 10 Cɩ́gá, à viviri à yáá à kə tɩʋ kʋ tə con, sə à tʋn lwanɩ kʋ yɩra, à bá tʋn zəni kʋ yɩra. À wá kə kʋ Babɩlɔnə pɩ̀ʋ́ tə jɩɩn wa, ʋ ga wá sʋ̀rɩ́ mən kʋ nə. À mʋ̀ Ba-Yígúrə́-Jə-Tiu nii sʋgʋ nə!»

Kori tə nə pɩn Zwida pɩ̀ʋ́ dìə̀ tə yɩrɩ

11 Nə̀ń kori tə nə wulə Zwida pɩ̀ʋ́ dìə̀ lɩ̀à tə yɩrɩ:

«Á cʋga Ba-Yígúrə́-Jə-Tiu nii sʋgʋ,

12 Davidə dìə̀ lɩ̀à-ba!

Nəŋə kʋ tə Ba-Yígúrə́-Jə-Tiu nə swɩ̀n:

Á nə zàn jɩjʋ mama, sə á bʋ̀rɩ̀ bʋra,

á pa kʋ twá cɩ́gá cwəŋə nə, dɩɩn mama,

á ga jon lìù tə ba nə vɩrɩ,

lɩ̀à tə jɩɩn wa ba nə vɩrɩ wá.

Kʋ nə tà nətʋ, à lɩŋa tə wá pwin,

tə də́ ndə mən nə,

yá lìù mama bá wànɩ́ tə ʋ də̀ŋə̀,

á wʋlʋŋʋ tʋ̀tʋ̀nán tə yɩrɩ.

13 Nəŋə, á mʋ̀ nə nə à zɩga,

á mʋ̀ lɩ̀à tə nə wulə vara tə wa,

pɩ̀ràn yuu wa.

À mʋ̀ Ba-Yígúrə́-Jə-Tiu nii sʋgʋ nə!

Á mʋ̀ lɩ̀à tə á nə swɩ̀n, á wʋ́:

“Wàà nə wá bà ʋ ta ʋ zɩgɩ nə nə?

Wàà nə wàá nə sànɩ́ tə wa ʋ zwɩ?”

14 À wá zɩgɩ á nə,

kʋ mɛ də á tʋtʋnɛɛ lənə nə yɩ nətʋ.

À wá kə mən á pún tə nə,

tə ga wá də́ won tə mama nə kɩkarɩ aba.

À mʋ̀ Ba-Yígúrə́-Jə-Tiu nii sʋgʋ nə!»