22
1 Nə̀ń kʋ tə Ba-Yígúrə́-Jə-Tiu nə swɩ̀n: «Vəli Zwida pɩ̀ʋ́ dìə̀ wa, n swɩ̀n sʋgʋ kʋ tə lá nə. 2 N wá swɩ̀n, n wʋ́: “Cʋgʋ Ba-Yígúrə́-Jə-Tiu sʋgʋ, Zwida pɩ̀ʋ́, n nə jə̀ə́ Davidə padaʋ tə yuu wa, n mʋ́ də n tʋ̀tʋ̀nà tə, də n lalʋʋ tə, á nə zwɩ n padiə tə mimiən tə wa!” 3 Nə̀ń kʋ tə Ba-Yígúrə́-Jə-Tiu nə swɩ̀n: Á tʋŋa kʋ tə nə mɛ, á ga bʋ̀rɩ̀ bʋra, á pa ka twá cɩ́gá cwəŋə nə. Á joŋə lìù tə ba nə vɩrɩ, lɩ̀à tə jɩɩn wa ba nə vɩrɩ wá. Á dànà ká fɩfɩn vee, də bitarʋ, də kadənu. Á dànà ká tʋn dɩ̀àn lìù yɩra, yá á dànà ká lwá lìù tə nə wà yoo cʋ̀gʋ̀ jana, bwálɩ́ kʋ tə wa. 4 Cɩ́gá mama, á nə zìlí sʋgʋ kʋ tə nii, pɛ̀gá wá jə̀ń Davidə padaʋ tə yuu wa, ba twá padiə ka tə mimiən tə ba zwɩ, də ba dɩ̀ səsen, nə à yə̀ə́ ba jəni səsen kòrə̀n wa, ba ja jírí, ba mʋ̀, də ba tʋ̀tʋ̀nà, də ba lʋʋ lɩ̀à tə, máŋá mama. 5 Yá á nə wá sʋgʋ kʋ tə nii zìlí, à dùə̀ də à tətə, padiə ka tə wá jì diboo. À mʋ̀ Ba-Yígúrə́-Jə-Tiu nii sʋgʋ nə!»6 Cɩ́gá, nə̀ń kʋ tə Ba-Yígúrə́-Jə-Tiu nə swɩ̀n Zwida padiə tə yuu wa:
«À na də n ziən ndə Galadə pún tə nə,
nə à yə̀ə́ ndə Liban paan tə yupara nə,
yá də kʋ mɛ, à tə wá pa n jì ndə kasɔɔ lanworu nə,
à wá pa n jì ndə tɩʋ nə, lɩ̀à nə tə̀lə́ kʋ wa.
7 À wulə à kəni cʋcʋnyɩna duən yáá nə,
ba lìù mama nə jə ʋ kwatarɩ zɩla, tə yí wá,
sə ba ma cʋ̀gʋ̀ mʋ́.
Ba wá goŋə n sɩsaban* tɩ̀án nəzəŋə tə,
ba dɩ mən wa.
8 Lʋʋ níə́ kapʋpʋ lɩ̀à wá twá tɩʋ kʋ tə nii nə ba kɛ̀ń, yá ba wá swɩ̀n duən con, ba wʋ́: “Bɛ̀ɛ̀ nə pɩn Ba-Yígúrə́-Jə-Tiu ma tʋn yoo kʋ tə yiri tɩfarʋ kʋ tə yɩra?” 9 Yá ba dàń wá le ba, ba wʋ́: “Kʋ yɩ kʋ wa lɩ̀à tə nə vɩga Ba-Yígúrə́-Jə-Tiu, ʋ nə yɩ ba Yɩɩ nimarʋ* tə, ba ga pìí ba tʋ ba nadwana yuu, yɩa duən yáá con, ba pa tə dun*, ba ga tʋn ba pa tə yɩrɩ.” »
Yɩɩ swɩ̀n Zweremi con, sə ʋ kwi Swalumə yuu wa
10 Zwida lʋʋ lɩ̀à-ba,
á dànà ká kwi lìù tə nə, ʋ nə tɩgaa,
á dànà ká kwi yinəgə kwirə, ʋ yɩrɩ.
Á dàń nə kwie lìù tə nə, ba nə ja vìríb,
cɩ́gá, ʋ kʋ́ʋ̀ bá pìí ʋ bà,
ʋ kʋ́ʋ̀ ba pìí ʋ na lʋʋ nii tə,
ba nə lɩrɩ wá kʋ wa.
11 Cɩ́gá, nə̀ń kʋ tə Ba-Yígúrə́-Jə-Tiu nə swɩ̀n Zozɩasə bìú Swalumə yuu wa, ʋ nə yɩ Zwida pɩ̀ʋ́, ʋ yà nə də́ pàrɩ̀ ʋ nyɩna Zozɩasə yuu nə, ba ga lɩ wá bwálɩ́ kʋ tə wa: «Ʋ kʋ́ʋ̀ bá pìí ʋ bà. 12 Ʋ wá tɩ bwálɩ́ tə nə, ba nə ja wá ba va yongaʋ tə, yá ʋ kʋ́ʋ̀ bá pìí ʋ na lʋʋ nii kʋ tə.»
Ba-Yígúrə́-Jə-Tiu swɩ̀n ʋ zɩga Yehoyakimə nə
13 «Lɛɛ wá yí mʋ́, Yehoyakimə,
n mʋ̀ lìù tə nə ba cɩ́gá cwəŋə tì,
n ma lwə̀ n dìə̀,
n ga ba kʋ tə nə yɩ mənəmənə nə twá,
n ma lwə̀ n dəyuu dìì.
N pɩn lɩ̀à tʋŋa tʋtʋ,
n ga ba ba ŋwɩ́n.
14 N swɩ̀n də n wá lwà padiə nəfarʋ,
də ka dəyuu dìì, tə nə wala,
n pa ba lɩ təkuri tə yɩra,
n pa ba piri ka bírí də sɩsaban* daran,
n ga pa ba tùrì tə nəsɩan.
15 Kʋ yɩ n kúrí sɩsaban daran tə,
sə tə mʋ̀ nə bɩrɩ də n yɩ pɩ̀ʋ́ naaa?
N nyɩna yà ba də́, ʋ ga nywɩn,
ndə lɩ̀à tə duən mama nə naaa?
Yá ʋ yà bʋ̀rɩ̀ bʋra,
ʋ pɩn ka yanɩ mənəmənə,
ka ga tì cɩ́gá cwəŋə,
yá ʋ yà jə sìə́ ʋ yìə̀n mama wa.
16 Ʋ yà bʋ̀rɩ̀ labwanʋ də yinənyiən bʋra,
ʋ pɩn kʋ twá cɩ́gá cwəŋə nə,
yá ʋ yà jə sìə́, ʋ yìə̀n mama wa.
Kʋ tà lìù tə nə tʋŋa kʋ nətʋ tə nə yə̀ə́ nə naaa?
À mʋ̀ Ba-Yígúrə́-Jə-Tiu nii sʋgʋ nə!
17 Yá n mʋ́ yɩ́á də n pubʋŋa ba won don mama na,
də kʋ nə tà kʋ tə nə jə nywarɩ kʋ pa mʋ́ cɩcɩ.
Kʋ tə nə vwə n yuu nə,
yɩ sə n lwá lɩ̀à tə nə wà yoo cʋ̀gʋ̀ jana,
n ga fɩfɩn lɩ̀à, n kə càn ba nə zənzən.»
18 Kʋ mʋ̀ yɩrɩ, nə̀ń kʋ tə Ba-Yígúrə́-Jə-Tiu nə swɩ̀n Zozɩasə bìú Yehoyakimə, ʋ nə yɩ Zwida pɩ̀ʋ́ yuu wa:
«Ba bá kwi ʋ lúə́, ba swɩ̀n, ba wʋ́:
“Nə̀ń kʋ lɛɛ nyɩɛn nʋ̀ʋ̀, à nuu bìú!
Nə̀ń kʋ lɛɛ nyɩɛn nʋ̀ʋ̀, à nakʋa!”
Ba bá kwi ʋ lúə́, ba swɩ̀n, ba wʋ́:
“Nə̀ń kʋ lɛɛ nyɩɛn nʋ̀ʋ̀, à yuu-tiu!
Nə̀ń kʋ lɛɛ nyɩɛn nʋ̀ʋ̀, à nyɩna pɩ̀ʋ́!”
19 Ba wá gùrì wá ndə bɩ̀nà nə,
ba wá tùrì ʋ tɩgɩ tə,
ba ja nan ba dʋgʋ Zwerizalɛmə biritaŋʋ tə kwa.»
Kʋ yɩ cavɩra də fʋfʋlʋ kʋ pa Zwerizalɛmə nə
20 Zwerizalɛmə tɩ̀án-ba, á dɩa Liban pɛɛn tə yuu,
á bubwi!
Á dɩa Baswan pɛɛn tə yuu,
á bòrì á pa ba nì á kori!
Á zɩgɩ Abarimə pɛɛn tə yuu, á cə̀rí!
Cɩ́gá, á kwɩ̀n ba tə mama nə,
ba yà nə swə aba.
21 À yà dí yáá à swɩ̀n á con, máŋá tə wa,
yoo mama yà nə ba aba wʋwalɩ,
yá á swɩ̀n, á wʋ́:
“Kʋ tà nə yáá!”
Mə nətʋ nə á fwa máŋá mama.
Kʋ nə zɩgɩ á zandʋan mama,
á wà à sʋgʋ cʋgʋ.
22 Vʋʋ wá jàn á yun tɩ̀án tə mama,
ba nə yɩ ndə payɩra nə,
yá ba wá pɛ̀ lɩ̀à tə mama nə swə aba,
ba ja va yongaʋ.
Yá á dàń wá də́ cavɩra də fʋfʋlʋ,
yolwana tə mama yɩrɩ á nə tʋn.
23 N mʋ̀ lìù təc nə wulə Liban pún tə wa,
n nə lwə̀ n sàń sɩsaban tɩ̀án wa,
nə̀ń n nə wá nɩ́ nətʋ,
máŋá tə wa, càn nə wá yí mʋ́.
N wá də́ càn, ndə kan pùə́ nə yɩ̀, sə ʋ lɩra!
Ba-Yígúrə́-Jə-Tiu nii sʋgʋ, Konɩa yuu wa
24 Ba-Yígúrə́-Jə-Tiu swɩ̀n Yehoyakimə bìú Konɩad, ʋ nə yɩ Zwida pɩ̀ʋ́ con, ʋ wʋ́: «À mʋ̀ Ba-Yígúrə́-Jə-Tiu wulə! N nə swə n yɩ ndə jɩtuŋu jɩfɩlɩ nə, à jɩzən jɩɩn nə də, à tə wá van mʋ́ à fwèə́ lá nə. À mʋ̀ Ba-Yígúrə́-Jə-Tiu nii sʋgʋ nə! 25 À wá kə mʋ́ lɩ̀à tə jɩɩn wa, ba nə pɩ̀à n gʋrɩ, ba fən ga jə mʋ́. Ba mʋ̀ nə yɩ Babɩlɔnə pɩ̀ʋ́ Nebukadənezarə, də Kaləde tɩ̀án tə. 26 À wá dɩŋa n mʋ́ də n nuu tə nə lɩrɩ mʋ́, à kə lʋʋ nii don wa, ba nə wà aba lɩrɩ lá nə, yá mə lá nə á wá tɩ. 27 Á wá sóní sə á pìí á bà á lʋʋ nii tə wa, yá á bá wànɩ́.»
28 Lɩ̀à dàń wá bwe, ba wʋ́: «Ʋ mʋ̀ Konɩa təntə yɩ ndə nəkənə nə lwə, ka kʋ́ʋ̀ ba funə jə, kʋ pa ba kʋ́ʋ̀ ba ka pɩ̀à naaa? Bɛ̀ɛ̀ dàń nə pɩn ba ma dɩŋa ʋ də ʋ dwíí, ba lɩ ba kə lʋʋ nii wa, ba nə yəri?»
29 Ooo à lʋʋ lɩ̀à-ba, à lʋʋ lɩ̀à-ba, á cʋga Ba-Yígúrə́-Jə-Tiu nii sʋgʋ! 30 Nəŋə kʋ tə ʋ nə swɩ̀n: «Á pʋ́pʋ́ná bɛɛ wa tə yɩrɩ, ndə lìù nə, ʋ nə ba bìú jə, ndə lìù nə, ʋ tə nə wà won tʋn kʋ jì, ʋ lʋʋ wúlú mama wa. Cɩ́gá, ʋ dwíí tə wa lìù mama bá wànɩ́ ʋ jə̀ń Davidə padaʋ tə yuu wa, ʋ də́ pàrɩ̀ Zwida lʋʋ lɩ̀à tə yuu wa.