Yáá tɩ̀án kʋkwɩnan, də pɩ̀ʋ́ tə nə yɩ jonu yoo
23
1 «Lɛɛ wá yí à lalʋʋ tə yáá tɩ̀án tə nə yɩ ndə payɩra nə, yá ba laga lalʋʋ tə duən yáá nə, ba pɩn ba jɛ́n. À mʋ̀ Ba-Yígúrə́-Jə-Tiu nii sʋgʋ nə!» 2 Kʋ mʋ̀ yɩrɩ, nə̀ń kʋ tə Ba-Yígúrə́-Jə-Tiu, ʋ nə yɩ Yɩzərayɛlə lɩ̀à Yɩɩ nə swɩ̀n yáá tɩ̀án tə yuu wa, ba nə ywàŋá à lalʋʋ tə yuu ndə payɩra nə: «Á yá à lalʋʋ tə, á pa ba laga duən yáá nə, ndə pee nə, á dɩŋɩ ba á dʋgʋ, á wà ba yuu ywàń. Kʋ mʋ̀ yɩrɩ, à də wá zɩgɩ á nə, á wʋlʋŋʋ tʋ̀tʋ̀nán tə yɩrɩ. À mʋ̀ Ba-Yígúrə́-Jə-Tiu nii sʋgʋ nə!3 À tətə wá lɩ à lalʋʋ tə gɩganɩ* tə lʋʋ níə́ tə mama wa, à yà nə dɩŋɩ ba à kə, à ja pìí à bà duən yáá. À wá ja ba à pìí à bà, à kə ba lʋʋ nii wa, ndə pee nə, ba nə ken patuu wa, yá ba wá lɩra bɩ̀á, ba ga pùlì zənzən. 4 À wá tún yáá tɩ̀án, ba nə yɩ cɩ́gá tɩ̀án, sə ba ywàń ba yuu, ndə payɩra nə, yá fən kʋ́ʋ̀ ba ja ba, sə ba vɩvaga. Ladʋa tətə bá mùrì ba nii nə. À mʋ̀ Ba-Yígúrə́-Jə-Tiu nii sʋgʋ nə!»
5 «Máŋá bɩ̀àn,
à wá pa ba lɩra Davidə nàʋ́ cɩ́gá cɩ́gá.
Ʋ wá ya pɩ̀ʋ́ nəzəŋu,
ʋ wá bʋ̀rɩ̀ bʋra lʋʋ nii tə wa,
kʋ twá cɩ́gá cwəŋə,
də kʋ tə nə yɩ mənəmənə nə.
À mʋ̀ Ba-Yígúrə́-Jə-Tiu nii sʋgʋ nə!
6 Máŋá tə wa, ʋ nə wá də́ pàrɩ̀,
Zwida payuu tə wá tɩnɩ kʋ tɩ̀àn,
Yɩzərayɛlə lɩ̀à tə ga wá ya sìə́ wa.
Nə̀ń yɩrɩ tə ba nə wá pa wá:
“Ba-Yígúrə́-Jə-Tiu yɩ nə cɩ́gá tíú.”
7 Kʋ mʋ̀ nə pɩn, máŋá bɩ̀àn, ba nə kʋ́ʋ̀ bá dù durə, ba swɩ̀n, ba wʋ́: “Ba-Yígúrə́-Jə-Tiu wulə! Ʋ mʋ̀ nə pɩn Yɩzərayɛlə lɩ̀à tə nan Ezwipətə lʋʋ nii tə wa!” À mʋ̀ Ba-Yígúrə́-Jə-Tiu nii sʋgʋ nə! 8 Yá ba dàń nə wá dù, ba wʋ́: “Ba-Yígúrə́-Jə-Tiu wulə! Ʋ mʋ̀ Yɩɩ tə, ʋ nə dɩŋɩ Yɩzərayɛlə dwíí tə ʋ kə jɩzən saparʋ con lʋʋ níə́ tə wa, də lʋʋ níə́ tə duən tə mama wa, yá ʋ ga pìí ʋ ja ba ʋ nan lá ʋ bà, sə ba pìí ba ya ba tətə lʋʋ nii wa.”»
Kʋkʋn Yɩɩ nii sʋ̀sʋ̀nà tə yoo
9 Nə̀ń kʋ tə nə swɩ̀n Yɩɩ nii sʋ̀sʋ̀nà tə yuu wa:
À pùə́ cʋ̀gʋ̀ zənzən,
à nandaran tə mama ga vɩvaga.
À yɩ ndə lìù nə, ʋ nə nyʋan sana ʋ sú,
nə à yə̀ə́ ndə lìù nə, divɛn nə bʋbʋnɩ,
Ba-Yígúrə́-Jə-Tiu də ʋ sʋ̀ràn tə yɩrɩ,
tə nə yɩ parɩ.
10 «Lʋʋ nii tə súə́ də lɩ̀à ba nə cwàrɩ̀a.
Lʋʋ nii tə wulə lúə́ pucʋnɩ wa,
vàná gaʋ mama kʋa, lʋʋ nii tə wa,
zɩra tə yɩrɩ, tə nə wulə lɩ̀à tə yuu wa.
Ba jə yawala, ba ma tʋŋa lwanɩ,
ba ga jə wʋdɩʋ, ba ma tʋŋa kʋ tə nə ba ziən.»
11 Ba-Yígúrə́-Jə-Tiu swɩ̀n, ʋ wʋ́:
«Yɩɩ nii sʋ̀sʋ̀nà tə də Yɩɩ joŋwana tə mɛ
ken ba tɩ̀àn durən yìə̀n wa.
À nɩ ba wʋlʋŋʋ tʋ̀tʋ̀nán tə à dìə̀ tə də tətə wa.
À mʋ̀ Ba-Yígúrə́-Jə-Tiu nii sʋgʋ nə!
12 Kʋ mʋ̀ nə pɩn, ba cwəŋə wá ya sɩsɩrʋ də yikunu,
yá ba wá bwɩn duən yikunu tə wa,
ba sɩrɩ ba tʋ tɩa.
Cɩ́gá, à wá pa lɛɛ yí ba,
bɩnɩ tə nə, à nə wá zɩgɩ ba nə.»
Ba-Yígúrə́-Jə-Tiu nii sʋgʋ nə!
Yɩɩ nii sʋ̀sʋ̀nà tə lwanɩ dwə Samari Yɩɩ nii sʋ̀sʋ̀nà tə
13 Ba-Yígúrə́-Jə-Tiu swɩ̀n, ʋ wʋ́:
«À nɩ yobalwaran Samari Yɩɩ nii sʋ̀sʋ̀nà tə con,
tə nə cʋ̀gʋ̀ à pùə́ nə zənzən.
Ba yɩ woŋwanʋ Baalə nii yìə̀n nə ba swɩ̀n,
ba ma jɛ́n Yɩzərayɛlə lɩ̀à tə nə yɩ à lɩ̀à.
14 Yá à nɩ yobalwaran Zwerizalɛmə Yɩɩ nii sʋ̀sʋ̀nà tə con,
tə nə pɩn ba yɩ ndə ba cwàrɩ̀.
Ba wulə kʋkʋn yìə̀n wa,
ba daŋa lɩ̀à tə nə tʋŋa yolwana jɩɩn,
ba ga cɩ̀ lìù mama nə,
ʋ dàn ká viviri ʋ kwa,
ʋ ma sà ʋ wʋlʋŋʋ tʋ̀tʋ̀nán.
Ba yɩ ndə Sodɔmə tɩ̀án nə, à yáá con,
yá Zwerizalɛmə tɩ̀án də yɩ ndə Gomɔrə tɩ̀án nə.»
15 Kʋ mʋ̀ yɩrɩ, nəŋə kʋ tə Ba-Yígúrə́-Jə-Tiu,
ʋ nə yɩ kwatara Yɩɩ nə swɩ̀n,
ba mʋ̀ Yɩɩ nii sʋ̀sʋ̀nà tə con:
«À wá pa ba dɩŋa kala,
ba ga nyʋn nɩ́á, fwanan nə wulə tə wa.
Cɩ́gá, kʋ yɩ kʋ twá də Zwerizalɛmə Yɩɩ nii sʋ̀sʋ̀nà tə,
durən yìə̀n ma sú lʋʋ nii tə mama.»
Kʋkʋn Yɩɩ nii sʋ̀sʋ̀nà yoo
16 Nə̀ń kʋ tə Ba-Yígúrə́-Jə-Tiu, ʋ nə yɩ kwatara Yɩɩ, nə swɩ̀n:
«Á dànà ká cʋgʋ sʋ̀ràn tə,
Yɩɩ nii sʋ̀sʋ̀nà tə nə swɩ̀n á con,
tə yɩ kʋ̀nkʋ̀n ba kʋ̀nɩ̀ ba bɩrɩ aba.
Tə yɩ ba tətə pubʋŋa yìə̀n nə ba maŋa ba bɩrɩ aba,
tə wà à mʋ̀ Ba-Yígúrə́-Jə-Tiu nii wa nan.
17 Ba sɩnɩ ba swɩ̀n lɩ̀à tə nə fʋfʋlɩ à sʋgʋ tə con, ba wʋ́:
“Ba-Yígúrə́-Jə-Tiu swɩ̀n, ʋ wʋ́,
á wá na sìə́!”
Yá ba swɩ̀n ba tə con ba nə twá
ba zɩbaniu tʋtʋnkʋkwɩnan tə nə,
ba wʋ́: “Lɛɛ bá yí aba!”
18 Yá ba wàà tətə nə twá ʋ jə̀ń
à mʋ̀ Ba-Yígúrə́-Jə-Tiu sawara púlí wa,
ʋ na, ʋ ga nì à sʋgʋ tə?
Ba wàà nə cʋgʋ à sʋgʋ tə,
ʋ ga nì kʋ də̀ń?»
19 Nəŋə Ba-Yígúrə́-Jə-Tiu dwavʋʋ nə, kʋ bɩ̀àn:
Kʋ yɩ ʋ lɩŋa tə nə fʋrɩ,
ndə dwavʋʋ nəfarʋ nə,
yá ʋ wá fwi tə wʋlʋnyɩna yuu wa.
20 Ba-Yígúrə́-Jə-Tiu lɩŋa tə bá tʋ,
də ʋ nə wà kʋ tə ʋ nə tanɩ sə ʋ tʋn tə tʋn,
ʋ pa kʋ nii sú.
Dɩɩn don nə, á wá nì kʋ də̀ń.
21 Ba-Yígúrə́-Jə-Tiu swɩ̀n, ʋ wʋ́:
«À mʋ̀ wà Yɩɩ nii sʋ̀sʋ̀nà təntə tʋn,
yá ba ga dəri.
À wà yoo mama ba con swɩ̀n,
yá ba ga swɩ̀n Yɩɩ nii sʋ̀ràn.
22 Ba yà nə twá ba jə̀ń à sawara púlí tə wa,
ba yà wá wànɩ́ ba swɩ̀n à sʋ̀ràn tə,
ba pa à lalʋʋ tə nì tə də̀ń,
ba ga pa ba viviri ba kwa
ba ma sà ba tʋtʋnɛɛ kʋkwɩnan tə,
də ba wʋlʋŋʋ tʋ̀tʋ̀nán tə.»
Ba-Yígúrə́-Jə-Tiu wulə bwálɩ́ mama nə
23 « À yɩ Yɩɩ tə à nə wulə bwálɩ́ nədʋ cɩcɩ nə naaa?
À tà Yɩɩ tə à nə wulə bwálɩ́ mama nə naaa?
À mʋ̀ Ba-Yígúrə́-Jə-Tiu nii sʋgʋ nə!
24 Lìù wàá à yáá nə ʋ səgə,
ʋ pɩn à wàrɩ̀ wá à nɩ naaa?
À mʋ̀ Ba-Yígúrə́-Jə-Tiu nii sʋgʋ nə!
Bwálɩ́ wulə lanworu wa, nə à yə̀ə́ tɩa yuu wa,
à mʋ̀ Ba-Yígúrə́-Jə-Tiu nə tə̀lə́ lá naaa?»
Ba-Yígúrə́-Jə-Tiu nii sʋgʋ nə!
Pwɩa wulə gaʋ də mɩbiu pwə́rə́ wa
25 «À mʋ̀ Ba-Yígúrə́-Jə-Tiu nì kʋ tə Yɩɩ nii sʋ̀sʋ̀nà tə nə swɩ̀n. Tə yɩ kʋ̀nkʋ̀n Yɩɩ nii sʋ̀ràn nə ba swɩ̀n à yuu yɩrɩ, ba wʋ́: “À dwɛ̀ pandwɩa! Yɩɩ pɩn à na won à pandwɩa wa!” 26 Yɩɩ nii sʋ̀sʋ̀nà təntə wá sóní ka swɩ̀n kʋ̀nkʋ̀n Yɩɩ nii sʋ̀ràn, kʋ dán kʋ mɛ nətə? Ba wá twá ba tətə pubʋŋa gɩgara nə, ba ma swɩ̀n kʋ̀nkʋ̀n Yɩɩ nii sʋ̀ràn, kʋ dán kʋ mɛ nətə? 27 Ba bʋŋa sə ba twá ba pandwɩa tə nə, ba nə maŋa ba bɩrɩ duən nə, ba ma pa à lalʋʋ tə swɛ̀ɛ́ à yɩrɩ tə, ndə ba nɩbara-ba nə swɛ̀ɛ́ à yɩrɩ, ba ga pìí ba boŋə ba kəni woŋwanʋ Baalə nə nətʋ. 28 Yɩɩ nii sʋ̀sʋ̀nʋ̀ tə ʋ nə dwɛ̀ pandwɩa, sə ʋ man ʋ pandwɩa tə ʋ bɩrɩ! Yá ʋ tə à nə swɩ̀n à nii sʋ̀ràn ʋ con, mɛ sə ʋ twá à nii nə, ʋ swɩ̀n tə ʋ bɩrɩ, ndə kʋ nə mɛ nətʋ!
Pwɩa tə̀lə́ wopuli də mɩbiu pwə́rə́ wa naaa?
À mʋ̀ Ba-Yígúrə́-Jə-Tiu nii sʋgʋ nə!
29 À sʋgʋ tə tà ndə mən nə naaa?
Kʋ tà ndə hama nə,
kʋ nə lwe pɩ̀ʋ̀ naaa?
À mʋ̀ Ba-Yígúrə́-Jə-Tiu nii sʋgʋ nə!
30 Kʋ mʋ̀ nə pɩn, à zɩga Yɩɩ nii sʋ̀sʋ̀nà tə nə, ba nə ŋwɩ̀n à sʋ̀ràn tə duən con. À mʋ̀ Ba-Yígúrə́-Jə-Tiu nii sʋgʋ nə! 31 Awoo, à zɩga ba mʋ̀ Yɩɩ nii sʋ̀sʋ̀nà tə nə, ba nə ja ba tətə pubʋŋa ba ma swɩ̀n Yɩɩ nii sʋgʋ. À mʋ̀ Ba-Yígúrə́-Jə-Tiu nii sʋgʋ nə! 32 À zɩga Yɩɩ nii sʋ̀sʋ̀nà tə nə, ba nə twá kʋ̀nkʋ̀n pandwɩa nə, ba ma swɩ̀n Yɩɩ nii sʋgʋ. À mʋ̀ Ba-Yígúrə́-Jə-Tiu nii sʋgʋ nə! Ba maŋa ba pandwɩa ba bɩrɩ, ba ma gɩgarɩ à lalʋʋ tə ba dʋga, də ba kʋ̀nkʋ̀n sʋ̀ràn tə nə yɩ fafalɩ sʋ̀ràn. À mʋ̀ wà ba tʋn, à wà ba nii pɩn, yá ba ba sáŋʋ́ mama jə ba pa lalʋʋ kʋ tə nə. À mʋ̀ Ba-Yígúrə́-Jə-Tiu nii sʋgʋ nə!»
Ba-Yígúrə́-Jə-Tiu nii sʋgʋ tə yɩ yojanʋ naaa?
33 Ba-Yígúrə́-Jə-Tiu swɩ̀n Zweremi con, ʋ wʋ́: «Lalʋʋ kʋ tə, nə à yə̀ə́ Yɩɩ nii sʋ̀sʋ̀nʋ̀, nə à yə̀ə́ Yɩɩ joŋwanʋ mama nə bwe mʋ́, ʋ wʋ́: “Bɛ̀ɛ̀ yojanʋ nə Ba-Yígúrə́-Jə-Tiu ma zɩŋa nəba?” N wá swɩ̀n kʋ yojanʋ tə n bɩrɩ ba, n wʋ́: “Á mʋ̀ nə yɩ kʋ yojanʋ tə, yá à wá vɩ aba à dʋgʋ!” À mʋ̀ Ba-Yígúrə́-Jə-Tiu nii sʋgʋ nə! 34 Yá Yɩɩ nii sʋ̀sʋ̀nʋ̀ tə, nə à yə̀ə́ Yɩɩ joŋwanʋ tə, nə à yə̀ə́ lalʋʋ tə wa lìù tə nə wá swɩ̀n də Ba-Yígúrə́-Jə-Tiu ja yojanʋ ʋ ma zɩn wá, à wá zɩgɩ kʋ tíú də ʋ dìə̀ lɩ̀à nə. 35 Á dàń nə wá bwe duən, á wʋ́: “Ba-Yígúrə́-Jə-Tiu le, ʋ wʋ́ bɛ̀ɛ̀? Bɛ̀ɛ̀ nə Ba-Yígúrə́-Jə-Tiu swɩ̀n?” 36 Yá á kʋ́ʋ̀ dànà ká swɩ̀n də Ba-Yígúrə́-Jə-Tiu ja yojanʋ ʋ ma zɩn aba. Lìù mama nii sʋgʋ dàń nə wá ya ʋ tətə yojanʋ, kʋ pa ʋ tɩ̀àn nə. Cɩ́gá, á nə swɩ̀n nətʋ, kʋ yɩ à mʋ̀ Ba-Yígúrə́-Jə-Tiu, à nə yɩ kwatara Yɩɩ, à ga yɩ á Yɩɩ tə à nə nəŋə sʋ̀ràn tə nə á viviri. 37 N wá bwe Yɩɩ nii sʋ̀sʋ̀nʋ̀ tə, n wʋ́: “Ba-Yígúrə́-Jə-Tiu le mʋ́, ʋ wʋ́ bɛ̀ɛ̀? Bɛ̀ɛ̀ nə Ba-Yígúrə́-Jə-Tiu swɩ̀n?” 38 Yá də à nə dùə̀ súú á nii nə tə mɛ, á tə nə swɩ̀n də Ba-Yígúrə́-Jə-Tiu ja yojanʋ ʋ ma zɩn aba, á nəŋə kʋ tə, à mʋ̀ Ba-Yígúrə́-Jə-Tiu nə swɩ̀n, kʋ sʋgʋ təntə yɩrɩ, á nə swɩ̀n: 39 À wá zɩn aba, à ja va à dʋgʋ mɩ́ámɩ́án. À wá vɩ á mʋ̀ də tɩʋ tə mɛ, à yà nə pɩn á mʋ̀ də á nɩbara-ba nə, à dʋgʋ yiŋʋnɩ də nə. 40 À wá kə cavɩra nəfarʋ á nə, tə nə ba zwɛ̀, tə nə wá pa lɩ̀à fʋfʋlɩ aba, máŋá mama.»