Zweremi nɩ kapɩra kəpuri bələ ʋ nɩʋn wa
24
1 Ba-Yígúrə́-Jə-Tiu pɩn à na kapɩra kəpuri bələ, Ba-Yígúrə́-Jə-Tiu dìə̀ tə yáá con. Kʋ yɩn Babɩlɔnə pɩ̀ʋ́ Nebukadənezarə nə jɩn Yehoyakimə bìú Konɩaa, ʋ yà nə yɩ Zwida pɩ̀ʋ́, də ʋ payuu tə tʋ̀tʋ̀nán yun tɩ̀án, də lɩ̀à tə nə sə̀ dɛɛ, də ba tə nə fwa bòrə̀n, ʋ ja nan Zwerizalɛmə, ʋ va yongaʋ Babɩlɔnə nə, kwa nə. 2 Kəpurə tə don yà jə kapɩra tə nə ziən zəni, ndə təntən kapɩra nə, ba nə pʋ̀rɩ́, yá kəpurə tə don tə yà yɩ kapɩra tə nə pʋa, tə cʋ̀gʋ̀ mɩ́ámɩ́án, nə wulə ka wa. Tə yà wàrɩ̀ tə də́, tə nə ba ziən yɩrɩ.3 Ba-Yígúrə́-Jə-Tiu bwe nə, ʋ wʋ́: «Bɛ̀ɛ̀ nə n na, Zweremi?» À le, à wʋ́: «À na kapɩra, tə duən ziən zəni, tə duən ga pʋ, tə cʋ̀gʋ̀ mɩ́ámɩ́án, tə wàrɩ̀ tə də́, tə nə ba ziən yɩrɩ.»
4 Ba-Yígúrə́-Jə-Tiu dàń swɩ̀n sʋ̀ràn tə tə à con, ʋ wʋ́: 5 «Nə̀ń kʋ tə à mʋ̀ Ba-Yígúrə́-Jə-Tiu, à nə yɩ Yɩzərayɛlə lɩ̀à Yɩɩ nə swɩ̀n: N nə yə̀ə́ kapɩra nəzəŋə tə ywàŋʋ́ nə jə fɩra nətʋ, mə nətʋ nə Zwida lʋʋ lɩ̀à tə, à nə pɩn ba ja nan bwálɩ́ kʋ tə wa, ba va yongaʋ Kaləde tɩ̀án lʋʋ nii wa, ywàŋʋ́ jə fɩra kʋ pa nə. 6 À ywàŋá ba də pubwanʋ, yá à wá pa ba pìí ba bà lʋʋ nii kʋ tə wa. À wá pa ba pìí ba lwà ba sànɩ́ tə, yá à kʋ́ʋ̀ bá gwɛrɩ tə. À wá pa ba dəkuu zʋ tɩa, yá à kʋ́ʋ̀ bá zɩ̀n ba. 7 À wá pa ba bɩcanɩ lwarɩ də à mʋ̀ nə yɩ Ba-Yígúrə́-Jə-Tiu. Ba wá ya à mʋ̀ lɩ̀à, yá à mʋ̀ nə wá ya ba Yɩɩ, də ba nə pìí ba bà à con, də ba bɩcanɩ mama.
8 Yá kʋ nə yɩ kapɩra tə mʋ̀ nə pʋa, tə cʋ̀gʋ̀ mɩ́ámɩ́án, tə wàrɩ̀ tə də́, tə nə ba ziən yɩrɩ, cɩ́gá, nə̀ń kʋ tə à mʋ̀ Ba-Yígúrə́-Jə-Tiu nə swɩ̀n: Mə nətʋ nə à wá tʋn Zwida pɩ̀ʋ́ Sedekɩasə, də ʋ tʋ̀tʋ̀nán yun tɩ̀án tə, də Zwerizalɛmə tɩ̀án gɩganɩ* tə, də lɩ̀à tə nə ga Zwida lʋʋ nii tə wa, də ba tə nə wulə Ezwipətə lʋʋ nii tə wa yɩra. 9 À wá pa ba jì bɩcapuri won, lɛɛ won, kʋ ywàŋʋ́ nə ba fɩra jə, kʋ pa tɩa yuu payun tə mama nə. À wá pa ba jì mɩmɩnʋ, sə lɩ̀à ma fʋfʋlɩ ba, də ba ma də́ bɩyɩrɩ ba yɩra, də ba ma mʋŋa ba, də ba ma zɩrɩ ba kəni ba nə, bwálá tə mama wa, à nə wá dɩŋa ba à kə. 10 À wá pa kwatara sɩ̀ʋ́, də niən, də tɩan yayɩpwarʋ tʋ ba wa, tə gʋ ba, kʋ va kʋ yí máŋá tə, ba mama nə wá nyʋn lʋʋ nii tə wa, à nə pɩn ba mʋ̀ də ba nɩbara-ba nə.