Zweremi swɩ̀n Yɩɩ nii sʋ̀ràn bɩna sapʋa də batwa
25
1 Ba-Yígúrə́-Jə-Tiu swɩ̀n sʋgʋ kʋ tə Zweremi con, Zwida lalʋʋ tə mama yɩrɩ, Zozɩasə bìú Yehoyakimə, ʋ nə yɩ Zwida pɩ̀ʋ́, pàrɩ̀ tə banɩa nii bɩnɩ tə wa. Kʋ yɩn Babɩlɔnə pɩ̀ʋ́ Nebukadənezarə pàrɩ̀ təntən bɩnɩ tə wa. 2 Yɩɩ nii sʋ̀sʋ̀nʋ̀ Zweremi swɩ̀n Zwida lalʋʋ tə mama con, də Zwerizalɛmə tɩ̀án mama con, ʋ wʋ́: 3 «Kʋ nə zɩgɩ Zwida pɩ̀ʋ́ Zozɩasə, ʋ nə yɩ Amon bìú pàrɩ̀ tə fugə də batwa nii bɩnɩ tə nə, kʋ bà kʋ yí zə̀n kʋ tə, kʋ jə bɩna sapʋa də batwa, Ba-Yígúrə́-Jə-Tiu nə swɩ̀n ʋ sʋ̀ràn tə à con. Yá à də yàá jon tə, à swɩ̀n á con də à bwɛ́, yá á wà à con tan. 4 Ba-Yígúrə́-Jə-Tiu yàá tʋn ʋ tʋ̀tʋ̀nà tə, ba nə yɩ ʋ nii sʋ̀sʋ̀nà á con, də ʋ bwɛ́, yá á wà ba con tan, á wà á zɩɩn guni, á ma cʋgʋ ba sʋ̀ràn tə. 5 Ba swɩ̀n á con, ba wʋ́: “Á lìù mama yá ʋ tʋtʋnɛɛ kʋkwɩnan tə, də wʋlʋŋʋ tʋ̀tʋ̀nán tə, ʋ nə tʋŋa! Yá á dàń wá ya lʋʋ nii tə wa, Ba-Yígúrə́-Jə-Tiu nə pɩn á mʋ̀ də á nɩbara-ba nə, máŋá də máŋá mama wuuu. 6 Á dànà ká vwa á tɩ̀àn yɩa duən nə, sə á ma tʋn á pa tə, də á twɩ á nadwana yuu tə yáá con, á pɩn tə dun*. Á dànà ká fwa yɩa duən sə tə zɩ̀n ʋ lɩŋa, yá ʋ bá tʋn yolwan mama á yɩra. 7 Yá á wà ʋ sʋgʋ cʋgʋ. Ba-Yígúrə́-Jə-Tiu nii sʋgʋ nə! Kʋ tə nə dwə, á zɩ̀n ʋ lɩŋa də woŋwanan tə á nə fwa də á tətə jɩ̀àn, á ma kə lɛɛ á tɩ̀àn nə.”8 Kʋ mʋ̀ yɩrɩ, nəŋə kʋ tə Ba-Yígúrə́-Jə-Tiu, ʋ nə yɩ kwatara Yɩɩ nə swɩ̀n: “Á nə wà à sʋ̀ràn tə cʋgʋ yɩrɩ, 9 à wá tʋn à pa ba bon jɩzən saparʋ con lalʋʋ tə mama, də à tʋtʋnʋ Babɩlɔnə pɩ̀ʋ́ Nebukadənezarə, à pa ba bà ba zɩgɩ lʋʋ nii kʋ tə, də kʋ wa lɩ̀à tə nə, də dwíə́ tə mama nə, tə nə kɩkarɩ kʋ, sə ba cʋ̀gʋ̀ ba mɩ́ámɩ́án. Yá à wá pa ba lʋʋ nii tə jì dibwərən máŋá mama. Kʋ wá jì yokəlu də mʋmʋn won. À mʋ̀ Ba-Yígúrə́-Jə-Tiu nii sʋgʋ nə! 10 À wá pa ba cànà diŋə pupwən tə, də ba pupwən cə̀rí tə, də ba bwàlʋ́ bɛɛ nuŋi tə, də ba bwàlʋ́ kan nuŋi tə, də ba nʋŋʋ zizigu tə, də ba cànʋ́ poni tə nyʋn lá. 11 Lʋʋ nii kʋ tə mama wá jì dibwərən. Kʋ wá cʋ̀gʋ̀ mɩ́ámɩ́án, yá dwíə́ tə tə wá ya ywə́ŋə́, ba tʋn ba pa Babɩlɔnə pɩ̀ʋ́ nə, bɩna sapwɩtwa də fugə.
12 «Yá máŋá tə bɩna sapwɩtwa də fugə təntə nə wá zwɛ̀, à wá zɩgɩ Babɩlɔnə pɩ̀ʋ́ tə, də ʋ lʋʋ nii tə nə, ba yolwana tə yɩrɩ. Yá à wá pa Kaləde tɩ̀án lʋʋ nii tə cʋ̀gʋ̀, máŋá mama wuuu. À mʋ̀ Ba-Yígúrə́-Jə-Tiu nii sʋgʋ nə! 13 À wá pa yìə̀n tə mama, à nə swɩ̀n lʋʋ nii kʋ tə yuu wa, yí kʋ. Yìə̀n tə mama nə pʋ́pʋ́nɩ́ sagɩ kʋ tə wa, də tə tə Zweremi nə jon Yɩɩ nii wa ʋ swɩ̀n, tə nə zɩga dwíə́ tə mama nə, nii wá sú. 14 Cɩ́gá, lʋʋ níə́ tə nə jə dɩ̀àn zənzən, də pɛ̀gá nəfaran wá də́ dɩ̀àn ba də yuu wa, ba pa ba tʋn ba pa ba. Yá à dàń wá ŋwɩ́n ba tʋtʋnkʋkwɩnan tə, də ba yolwana tə mama jɩŋɩ ba yɩra.»
Bʋra divɛn wùrú zʋŋa tə yoo
15 Nə̀ń kʋ tə Ba-Yígúrə́-Jə-Tiu, ʋ nə yɩ Yɩzərayɛlə lɩ̀à Yɩɩ nə swɩ̀n à con: «Jon divɛn wùrú zʋŋa ka tə nə súə́ də à lɩŋa tə, à jɩɩn wa, n pa lʋʋ níə́ tə mama nə, à nə tʋn mʋ́ tə wa, ba nyʋn. 16 Ba wá nyʋn tə, ba bʋbʋnɩ, ba ga tətəli, máŋá tə wa, ba nə wá na kwatara sɩ̀ʋ́ tə, à nə wá tʋn ba titəŋi wa!»
17 À jon divɛn wùrú zʋŋa tə Ba-Yígúrə́-Jə-Tiu jɩɩn wa, yá à pɩn lʋʋ níə́ tə mama, Ba-Yígúrə́-Jə-Tiu nə tʋn nə ba con, nyʋn tə. 18 À sinti Zwerizalɛmə wa, də Zwida tɩan tə wa, à pa pɛ̀gá tə, də ba tʋ̀tʋ̀nán yun tɩ̀án tə nyʋn tə, yá à pɩn tɩan təntə jì dibwərən. À pɩn tə jì yokəlu, də mʋmʋn, də zɩra won, ndə kʋ nə yɩ nətʋ zə̀n.
19 Kʋ kwa nə, kʋ yɩ lʋʋ níə́ tə tə nə danɩ lá:
Kʋ yɩ Ezwipətə pɩ̀ʋ́ Farawon, də ʋ tʋ̀tʋ̀nán yun tɩ̀án tə, də ʋ lalʋʋ tə mama, 20 də dwíə́ yirə yirə tə nə wulə Ezwipətə wa,
də Usə lʋʋ nii pɛ̀gá tə mama, də Filisi lʋʋ nii pɛ̀gá tə mama nə wulə Aswəkelon nə, də Gaza nə, də Ekəron nə, də ba tə nə ga Aswədɔdə nə, 21 də Edomə tɩ̀án, də Mʋabə tɩ̀án, də Amon dwíí tə, 22 də Tirə pɛ̀gá tə mama, də Sidon pɛ̀gá tə mama, də mʋʋ titəŋi lʋʋ nii pɛ̀gá tə mama nə wulə mʋʋ kwa, 23 də Dedan tɩ̀án, də Tema tɩ̀án, də Buzə tɩ̀án, də dwíə́ tə mama nə fɩnɩ ba twanjərən, 24 də Arabi lʋʋ nii pɛ̀gá tə mama, də dwíə́ yirə yirə tə mama pɛ̀gá tə nə wulə kasɔɔ lanworu tə wa, 25 də Ziməri lʋʋ nii pɛ̀gá tə mama, də Elamə lʋʋ nii pɛ̀gá tə mama, də Medi lʋʋ nii pɛ̀gá tə mama, 26 də jɩzən saparʋ con pɛ̀gá tə mama, ba tə nə bwə́lə́, də ba tə nə ŋʋ́ná. Tɩa yuu payun tə mama pɛ̀gá mɛ sə ba nyʋn Ba-Yígúrə́-Jə-Tiu lɩŋa divɛn tə, yá Sweswakə pɩ̀ʋ́ dàń nə wá nyʋn tə, pɛ̀gá tə mama kwa nə.
27 Ba-Yígúrə́-Jə-Tiu kʋ́ʋ̀ swɩ̀n à con, sə à swɩ̀n ba con, à wʋ́: «Nəŋə kʋ tə Ba-Yígúrə́-Jə-Tiu, kwatara Yɩɩ* tə nə yɩ Yɩzərayɛlə lɩ̀à Yɩɩ nə swɩ̀n: Á nywɩan á sú, á ga tʋnɩ, sə á ga tʋ, yá á ba pìí á zaŋa kwatara sɩ̀ʋ́ tə yáá con, à nə wá tʋn á titəŋi wa!» 28 Ʋ tə swɩ̀n ʋ súrí lá, ʋ wʋ́: «Ba nə vɩga sə ba jon divɛn wùrú zʋŋa tə n jɩɩn wa, ba nyʋn, n wá swɩ̀n ba con, n wʋ́: Nəŋə kʋ tə Ba-Yígúrə́-Jə-Tiu, ʋ nə yɩ kwatara Yɩɩ nə swɩ̀n: Á nywɩan, á nywɩan! 29 Cɩ́gá, lɛɛ tə yɩ à wá dí yáá à kə tɩʋ tə nə, ba nə boŋə à yɩrɩ tə kʋ wa. Yá á mʋ̀ dàń bʋŋa də à wá jələ aba ndə lɩ̀à nə, ba nə wà yoo cʋ̀gʋ̀ naaa? Á də bá ya ndə lɩ̀à nə, ba nə wà yoo cʋ̀gʋ̀! Cɩ́gá, à bon kwatara sɩ̀ʋ́ à kə tɩa yuu ləzoni tə mama nə. À mʋ̀ Ba-Yígúrə́-Jə-Tiu, à nə yɩ kwatara Yɩɩ nii sʋgʋ nə!»
30 Ba-Yígúrə́-Jə-Tiu kʋ́ʋ̀ swɩ̀n à con, ʋ wʋ́: «N mʋ̀ dàń swɩ̀n à nii sʋ̀ràn təntə mama ba con, sə n tə ga swɩ̀n, n súrí lá, n wʋ́:
Ba-Yígúrə́-Jə-Tiu zɩgɩ lanworu wa, ʋ baa.
Ʋ zɩgɩ ʋ wúlú bwálɩ́ tə wa,
ʋ pa ba nì ʋ kori.
Ʋ baa də dɩ̀àn, ʋ bwálɩ́ tə yɩrɩ.
Ʋ mà cə̀rə́ ndə lɩ̀à nə,
ba nə wulə ba kàŋɩ̀ divɛn tɩ̀án bɩ̀á,
ʋ zɩgɩ tɩa yuu ləzoni tə mama nə.
31 Zizigu tə vəli kʋ yí tɩa tə yígúrə́.
Cɩ́gá, Ba-Yígúrə́-Jə-Tiu swɩ̀n ʋ zɩga lʋʋ dwíə́ tə nə,
ʋ wulə ʋ bʋ̀rɩ̀ lʋʋ ləzoni tə mɛ bʋra.
Ʋ pɩn ba gʋ wʋlʋnyɩna də kwatara sɩ̀ʋ́.
Ba-Yígúrə́-Jə-Tiu nii sʋgʋ nə!»
32 Nə̀ń kʋ tə Ba-Yígúrə́-Jə-Tiu, ʋ nə yɩ kwatara Yɩɩ, nə swɩ̀n:
«Nəŋə lɛɛ nə tə pwàrɩ́ lʋʋ níə́ də lʋʋ níə́,
yá dwavʋʋ nəfarʋ nyɩ́n kʋ zàn tɩa yígúrə́ wa,
kʋ bɩ̀àn.
33 Kʋ dɩɩn təntə nə, lɩ̀à tə Ba-Yígúrə́-Jə-Tiu nə wá gʋ, tɩga wá larɩ tɩa, kʋ nə zɩgɩ lʋʋ tə vàn don nə, kʋ va kʋ yí vàn tə don. Ba bá ja lúə́, ba bá pɛ̀ ba, ba gùrì libərə wa, ba wá pʋ, ba jì pùrú tɩa yuu wa.
34 Á bubwiə, payɩra-ba, á maga cə̀rí!
Á pə̀nə́ tɩa á bəbəli, á mʋ̀ lɩ̀à tə, á nə yɩ̀rɩ̀ vàná!
Cɩ́gá, máŋá yí, ba nə wá kə sɩ̀ʋ́ á də bɩan nə,
ba ga ca aba duən wa.
Á wá tʋ á lwa ndə wùrú nə, kʋ nə jə funə.
35 Yáá tɩ̀án tə bá na yuu yikwala bwálɩ́,
yá lɩ̀à tə nə yɩ̀rɩ̀ vàná tə bá wànɩ́ ba jɛ́n.
36 Á cʋga payɩra tə nə mà cə̀rí!
Á cʋga lɩ̀à tə nə yɩ̀rɩ̀ vàná tə bubwiə!
Cɩ́gá, Ba-Yígúrə́-Jə-Tiu wulə ʋ cʋ̀gà ba vàná gaʋ tə.
37 Ba-Yígúrə́-Jə-Tiu lɩŋa tə nə pupwin tə pɩn,
najɩra tə wa pupwən zizigu tə nyʋn lá.
38 Ba vɩga ba wúlú bwálɩ́ tə, ba dʋgʋ,
ndə gəbala nə vɩga kʋ yipaa bwálɩ́ nətʋ.
Cɩ́gá, Ba-Yígúrə́-Jə-Tiu lɩŋa nəfarʋ tə,
də kʋ̀ʋ̀ tə nə cʋ̀gʋ̀ cʋcʋran kapʋpʋ,
pɩn ba lʋʋ nii tə cʋ̀gʋ̀ mɩ́ámɩ́án.