Ba vʋrɩ sə ba gʋ Zweremi
26
1 Zwida pɩ̀ʋ́ Zozɩasə bìú Yehoyakimə pàrɩ̀ tə sinti wa, Ba-Yígúrə́-Jə-Tiu swɩ̀n sʋ̀ràn tə tə Zweremi con, ʋ wʋ́: 2 «Nə̀ń kʋ tə à mʋ̀ Ba-Yígúrə́-Jə-Tiu nə swɩ̀n: Vəli n zɩgɩ à dìə̀ tə dəwoo tə wa, n swɩ̀n sʋ̀ràn tə mama à nə pɩn mʋ́ nii, sə n swɩ̀n lɩ̀à tə mama con, ba nə naŋa Zwida tɩan tə wa, ba twi ba twɩ ba nadwana yuu á yáá con, à dìə̀ tə wa, ba pɩn nə dun*. Dàn ká lɩ sʋgʋ nədʋ tətə tə nii nə, n dʋgʋ. 3 Kʋ wàá də ba wá cʋgʋ, ba lìù mama ga viviri ʋ kwa, ʋ ma sà ʋ tʋtʋnɛɛ kʋkwɩnan tə. Yá à dàń wá lwàń pubʋŋa, à kʋ́ʋ̀ bá pa càn tə, à yà nə bʋŋa sə à kə ba nə, ba wʋlʋŋʋ tʋ̀tʋ̀nán tə yɩrɩ, ba nə tʋŋa, yí ba. 4 N wá swɩ̀n ba con, n wʋ́: Nəŋə kʋ tə Ba-Yígúrə́-Jə-Tiu nə swɩ̀n: “Á nə ba à sʋgʋ cʋga, sə á twá à nii yìə̀n tə nə, à nə bɩrɩ aba, 5 á nə ba à tʋ̀tʋ̀nà tə sʋ̀ràn cʋga, ba ga yɩ à nii sʋ̀sʋ̀nà, à tʋŋa á con, də à bwɛ́, 6 yoo tə à nə ma tʋn à wúlú bwálɩ́ tə Silo nə, mə kʋ nə à wá tʋn à dìə̀ ka tə də yɩra. Yá à wá pa tɩʋ kʋ tə jì zɩra won, kʋ pa tɩa yuu dwíə́ tə mama nə.”»7 Yɩɩ joŋwana tə, də Yɩɩ nii sʋ̀sʋ̀nà tə, də lalʋʋ tə mama nì sʋ̀ràn təntə Zweremi nə swɩ̀n Ba-Yígúrə́-Jə-Tiu dìə̀ tə wa. 8 Yá máŋá tə Zweremi nə wulə sʋ̀ràn tə mama ʋ swɩ̀n ʋ zwɛ̀, Ba-Yígúrə́-Jə-Tiu yà nə pɩn wá nii, sə ʋ swɩ̀n lalʋʋ tə mama con, Yɩɩ joŋwana tə, də Yɩɩ nii sʋ̀sʋ̀nà tə, də lalʋʋ tə mama zàn ba ja wá, ba ga swɩ̀n, ba wʋ́: «Ʋ mɛ tɩan! Ʋ mɛ tɩan! 9 Bɛ̀ɛ̀ nə pɩn, n ma swɩ̀n Yɩɩ nii sʋ̀ràn, Ba-Yígúrə́-Jə-Tiu yuu yɩrɩ, n wʋ́: “Yɩɩ dìə̀ ka tə də wá ya ndə Yɩɩ wúlú bwálɩ́ tə nə, kʋ yà nə wulə Silo nə, yá tɩʋ kʋ tə wá cʋ̀gʋ̀, kʋ ga kwɩ̀n lɩ̀à nə, sə ba ya kʋ wa?”» Lalʋʋ tə mama twi ba kɩkarɩ Zweremi, Ba-Yígúrə́-Jə-Tiu dìə̀ tə wa.» 10 Máŋá tə wa, Zwida lʋʋ nii tʋ̀tʋ̀nán yun tɩ̀án tə nə nì yìə̀n təntə, ba nan padiə tə wa, ba va ba jə̀ə́ Ba-Yígúrə́-Jə-Tiu dìə̀ mimii tə nə, ba nə boŋə Mimii Nədʋn. 11 Yá Yɩɩ joŋwana tə, də Yɩɩ nii sʋ̀sʋ̀nà tə dàń swɩ̀n tʋ̀tʋ̀nán yun tɩ̀án tə, də lalʋʋ tə mama con, ba wʋ́: «Bɛɛ wa tə mɛ sə ba gʋ wá! Cɩ́gá, ʋ swɩ̀n ʋ zɩgɩ Zwerizalɛmə nə, yá á tətə zɩan nì ʋ sʋ̀ràn tə.»
12 Yá Zweremi swɩ̀n tʋ̀tʋ̀nán yun tɩ̀án tə, də lalʋʋ tə mama con, ʋ wʋ́: «Kʋ yɩ Ba-Yígúrə́-Jə-Tiu nə tʋn nə, ʋ pa à swɩ̀n sʋ̀ràn təntə, á nə nì, à zɩgɩ Yɩɩ dìə̀ tə, də tɩʋ kʋ tə nə. 13 Sɩ́ʋ́n nə, á dàń kwɩan á yʋa tə, də á tʋtʋnɛɛ tə, á ga cʋgʋ Ba-Yígúrə́-Jə-Tiu, ʋ nə yɩ á Yɩɩ kori, yá ʋ wá yá càn tə, ʋ yà nə swɩ̀n də ʋ wá kə á nə. 14 Kʋ nə yɩ à mʋ̀, à wulə á jɩɩn wa! Á jana nə á ma fwa kʋ tə á nə swə. 15 Yá á dàń nə lwara də, á nə gʋa nə, lìù tə nə wà yoo cʋ̀gʋ̀ jana yoo wá zɩn á mʋ̀, də tɩʋ kʋ tə, də lɩ̀à tə nə wulə kʋ wa. Cɩ́gá, Ba-Yígúrə́-Jə-Tiu cɩ́gá nə tʋn nə á con, sə à swɩ̀n sʋ̀ràn tə tə mama, á zɩan wa.»
16 Tʋ̀tʋ̀nán yun tɩ̀án tə, də lalʋʋ tə mama swɩ̀n Yɩɩ joŋwana tə, də Yɩɩ nii sʋ̀sʋ̀nà tə con, ba wʋ́: «Bɛɛ wà tə wà mɛ sə ba gʋ wá! Cɩ́gá, kʋ yɩ Ba-Yígúrə́-Jə-Tiu, ʋ nə yɩ nə Yɩɩ yuu yɩrɩ nə, ʋ swɩ̀n nə con.»
17 Yá lʋʋ nii tə yáá tɩ̀án tə wa lɩ̀à duən zàn, ba swɩ̀n lalʋʋ tə mama con, ba wʋ́: 18 «Miswe, ʋ nə yɩ Moreswɛtə tíú də yà swɩ̀n Yɩɩ nii sʋ̀ràn, Zwida pɩ̀ʋ́ Ezekɩasə máŋá tə wa. Yá ʋ yà swɩ̀n Zwida lalʋʋ tə mama con, ʋ wʋ́: Nəŋə kʋ tə Ba-Yígúrə́-Jə-Tiu, ʋ nə yɩ kwatara Yɩɩ nə swɩ̀n:
“ba wá gwìń Siyon tɩʋ tə, ndə kárá nə,
Zwerizalɛmə ga jì kapana púlí,
yá pún wá nan kʋ pú paan tə yuu nə,
Yɩɩ dìə̀ tə nə wulə ka yuu wa.” 19 Yá Zwida pɩ̀ʋ́ Ezekɩasə, də ʋ lʋʋ lɩ̀à tə mama gʋa Miswe naaa? Ezekiasə wà Ba-Yígúrə́-Jə-Tiu fən dəri naaa? Ʋ wà Ba-Yígúrə́-Jə-Tiu lòrì naaa? Yá Ba-Yígúrə́-Jə-Tiu yá càn tə, ʋ yà nə swɩ̀n də ʋ wá pa tə yí ba. Yá nə mʋ̀ dàń pɩ̀à nə tʋn yolwan nəfarʋ nətən, nə tɩ̀àn yɩra!»
Yehoyakimə pɩn ba gʋ Yɩɩ nii sʋ̀sʋ̀nʋ̀ Uriya
20 Bɛɛ don də yɩn lá, ʋ yɩrɩ nə yɩ Uriya, ʋ nə swɩ̀n Yɩɩ nii sʋ̀ràn, Ba-Yígúrə́-Jə-Tiu yuu yɩrɩ. Ʋ yà yɩ Swemaya bìú, ʋ ga yɩ Kiriyatə-Yarimə tíú. Ʋ də swɩ̀n Yɩɩ nii sʋ̀ràn, tə nə nyən də Zweremi sʋ̀ràn tə, ʋ zɩgɩ tɩʋ kʋ tə, də lʋʋ nii kʋ tə nə. 21 Pɩ̀ʋ́ Yehoyakimə, də ʋ babɩran tə mama, də ʋ tʋ̀tʋ̀nán yun tɩ̀án tə mama nì sʋ̀ràn təntə, yá pɩ̀ʋ́ tə dàń ya pɩ̀à sə ʋ gʋ Uriya. Uriya nə nì də pɩ̀ʋ́ tə pɩ̀à sə ʋ gʋ wá, fən zʋa wá, ʋ ga dəri ʋ va Ezwipətə. 22 Pɩ̀ʋ́ Yehoyakimə tʋn Akəbɔrə bìú Elənatan də ʋ lɩ̀à duən Ezwipətə nə. 23 Ba vəli ba lɩ Uriya Ezwipətə nə, ba ja bà ba pa pɩ̀ʋ́ Yehoyakimə nə. Yá Yehoyakimə gʋa Uriya də kwatara sɩ̀ʋ́, ʋ ga pa ba tì ʋ tɩgɩ tə, ba dɩlɩ lalʋʋ tə tɩga libəri wa. 24 Yá Swafan bìú Ahikamə cɩ̀gà Zweremi nə, sə lalʋʋ tə dàn ká ja wá, ba gʋ.