Zweremi 27

Zweremi ken nɩan bɩan dàʋ̀ ʋ pàrà wa

1 Zwida pɩ̀ʋ́ Zozɩasə bìú Yehoyakimə pàrɩ̀ tə sinti wa, Ba-Yígúrə́-Jə-Tiu swɩ̀n sʋ̀ràn tə tə Zweremi con ʋ wʋ́: 2 «Nə̀ń kʋ tə à mʋ̀ Ba-Yígúrə́-Jə-Tiu nə swɩ̀n: Vwa nɩan bɩan daran də banzala, n kə n pàrà wa. 3 Ja tə n ma tʋn Edomə pɩ̀ʋ́ tʋntʋna tə, də Mʋabə pɩ̀ʋ́ tʋntʋna tə, də Amon dwíí tə pɩ̀ʋ́ tʋntʋna tə, də Tirə pɩ̀ʋ́ tʋntʋna tə, də Sidon pɩ̀ʋ́ tʋntʋna tə, ba nə twi Zwida pɩ̀ʋ́ Sedekɩasə con, Zwerizalɛmə nə. Pa ba lìù mama ja tə ʋ va ʋ pa ʋ pɩ̀ʋ́ nə. 4 Yá n dàń wá swɩ̀n à nii yìə̀n tə tə ba con, sə ba lìù mama ja va ʋ swɩ̀n ʋ pɩ̀ʋ́ con. N wá swɩ̀n, n wʋ́: Nəŋə kʋ tə Ba-Yígúrə́-Jə-Tiu, kwatara Yɩɩ* tə nə yɩ Yɩzərayɛlə lɩ̀à Yɩɩ nə swɩ̀n: Nəŋə kʋ tə á lìù mama nə wá swɩ̀n ʋ yuu-tiu con:

5 “Kʋ yɩ à mʋ̀ Ba-Yígúrə́-Jə-Tiu nə fwa tɩa tə, də ləzoni tə, də vàná tə nə wulə tɩa tə yuu wa, kʋ twá də à vàn dɩ̀àn nəfarʋ. Yá à pɩn tɩa tə lìù tə nə, à nə swə. 6 Sɩ́ʋ́n nə, à dàń ken lʋʋ níə́ təntə mama Babɩlɔnə pɩ̀ʋ́ Nebukadənezarə jɩɩn wa, ʋ nə yɩ à tʋtʋnʋ. Yá à tə pɩn wá ganaŋa tə də, sə tə tʋn tə pa wá. 7 Lʋʋ dwíə́ tə mama wá tʋn ba pa wá, yá ʋ kwa nə, ba wá tʋn ba pa ʋ bìú nə, yá ʋ bìú tə də kwa nə, ba wá tʋn ba pa ʋ nàʋ́ nə. Kʋ wá ya nətʋ, kʋ va kʋ yí máŋá tə, lʋʋ dwíə́ tə nə jə dɩ̀àn, də pɛ̀gá nəfaran nə wá bà ba də́ dɩ̀àn ʋ də lʋʋ nii tə yuu wa, ba pa Babɩlɔnə tɩ̀án tʋn ba pa ba.

8 Lʋʋ nii, nə à yə̀ə́ payuu nə vɩga sə kʋ tʋn kʋ pa Babɩlɔnə pɩ̀ʋ́ Nebukadənezarə nə, kʋ ga vɩ sə ʋ dɩ ʋ nɩan bɩan dàʋ̀ tə kʋ pàrà wa, à mʋ̀ tətə dàń nə wá zɩgɩ lʋʋ nii təntə nə, də kwatara sɩ̀ʋ́, də niən, də tɩan yayɩpwarʋ, kʋ va kʋ yí máŋá tə à nə wá twá də Nebukadənezarə jɩɩn, à gʋ ba mama, à zwɛ̀ mɩ́ámɩ́án. À mʋ̀ Ba-Yígúrə́-Jə-Tiu nii sʋgʋ nə!

9 Yá á mʋ̀ dànà ká cʋgʋ á Yɩɩ nii sʋ̀sʋ̀nà tə, nə à yə̀ə́ á vʋra tə, də ba tə nə gwìń á pandwɩa də̀ń ba bɩrɩ aba, də ba tə nə twarɩ mɩmɩnan, ba ma lwarɩ yìə̀n, ba maŋa ba bɩrɩ aba, nə à yə̀ə́ ba tə nə tʋŋa cɩrɩ yìə̀n. Ba mʋ̀ lɩ̀à təntə mama swɩ̀n də, á kʋ́ʋ̀ bá tʋn á pa Babɩlɔnə pɩ̀ʋ́ Nebukadənezarə nə. 10 Yá kʋ yɩ kʋ̀nkʋ̀n Yɩɩ nii sʋ̀ràn nə ba swɩ̀n á con, sə kʋ pa á va yiŋʋnɩ, á yá á lʋʋ nii tə. Cɩ́gá, à wá dɩŋa aba à lɩ lʋʋ nii tə wa, yá á wá tɩ.

11 Yá lʋʋ nii tə nə wá sɛ̀ sə Babɩlɔnə pɩ̀ʋ́ dɩ ʋ nɩan bɩan dàʋ̀ tə kʋ pàrà wa, kʋ ga sɛ̀ kʋ tʋn kʋ pa wá, à wá pa kʋ lʋʋ nii təntə lɩ̀à ya sìə́ wa, ba ya kʋ wa, ba vàrà kʋ.” À mʋ̀ Ba-Yígúrə́-Jə-Tiu nii sʋgʋ nə!»

12 Mə nətʋ tətə nə à swɩ̀n Zwida pɩ̀ʋ́ Sedekɩasə con, à wʋ́: «Kənə á bɩan Babɩlɔnə pɩ̀ʋ́ nɩan bɩan dàʋ̀ tə də̀ń nə, á ga tʋn á pa ʋ də ʋ lalʋʋ tə nə, yá á mɩɩ wá ya lʋʋ. 13 Bɛ̀ɛ̀ nə pɩn kwatara sɩ̀ʋ́, də niən, də tɩan yayɩpwarʋ ma mɛ sə tə gʋ n mʋ́ də n lalʋʋ tə, ndə Ba-Yígúrə́-Jə-Tiu nə swɩ̀n kʋ nətʋ lʋʋ nii tə con, kʋ nə wá vɩ sə kʋ tʋn kʋ pa Babɩlɔnə pɩ̀ʋ́ nə? 14 Á dànà ká cʋgʋ Yɩɩ nii sʋ̀sʋ̀nà tə sʋ̀ràn, ba nə swɩ̀n á con, ba wʋ́: “Á ba tʋn á pa Babɩlɔnə pɩ̀ʋ́ nə!” Cɩ́gá, Yɩɩ nii sʋ̀ràn tə ba nə swɩ̀n á con, yɩ kʋ̀nkʋ̀n. 15 Nəŋə kʋ tə Ba-Yígúrə́-Jə-Tiu nə swɩ̀n: “À wà ba tʋn, yá ba ga swɩ̀n kʋ̀nkʋ̀n yɩɩ nii sʋ̀ràn à yuu yɩrɩ, sə kʋ pa à dɩŋa aba à lɩ lʋʋ nii kʋ tə wa, sə á tɩ, á mʋ̀ də Yɩɩ nii sʋ̀sʋ̀nà tə nə swɩ̀n sʋ̀ràn təntə á con.”»

16 À swɩ̀n Yɩɩ joŋwana tə də lalʋʋ tə mama con, à wʋ́: «Nəŋə kʋ tə Ba-Yígúrə́-Jə-Tiu nə swɩ̀n: “Á dànà ká cʋgʋ á Yɩɩ nii sʋ̀sʋ̀nà tə sʋ̀ràn tə, ba nə swɩ̀n ba bɩrɩ aba, ba wʋ́: Nəŋə sɩ́ʋ́n nə, ba wá pìí ba ja Ba-Yígúrə́-Jə-Tiu dìə̀ tə waa zɩla tə, ba nan Babɩlɔnə ba bà! Cɩ́gá, Yɩɩ nii sʋ̀ràn tə ba nə swɩ̀n á con, yɩ kʋ̀nkʋ̀n. 17 Á dànà ká tan ba con, á tʋŋa á pa Babɩlɔnə pɩ̀ʋ́ nə, yá á mɩɩ wá ya lʋʋ. Bɛ̀ɛ̀ nə pɩn tɩfarʋ kʋ tə ma mɛ sə kʋ jì dibwərən?” 18 Ba nə yɩ Yɩɩ nii sʋ̀sʋ̀nà, yá Ba-Yígúrə́-Jə-Tiu sʋgʋ tə cɩ́gá wulə də ba, sə ba ja Ba-Yígúrə́-Jə-Tiu, ʋ nə yɩ kwatara Yɩɩ nadwan nə, sə ʋ pa zɩla tə nə ga ʋ dìə̀ tə wa, də Zwida pɩ̀ʋ́ dìə̀ tə wa, də Zwerizalɛmə wa, mɛn lá, tə dàn ká va Babɩlɔnə. 19 Cɩ́gá, nəŋə yoo tə Ba-Yígúrə́-Jə-Tiu, ʋ nə yɩ kwatara Yɩɩ nə jə, sə ʋ swɩ̀n ywəŋə tə, də kwarɩ nəfarʋ tə, də zɩlan tə, də zɩla tə duən nə ga tɩfarʋ tə wa, yuu wa. 20 Babɩlɔnə pɩ̀ʋ́ Nebukadənezarə yà wà zɩla təntə pɛ̀ ʋ ja vìí, máŋá tə wa, ʋ nə jɩn Zwida pɩ̀ʋ́ Yehoyakimə bìú Yekonɩa, də Zwida də Zwerizalɛmə pàbɩ̀á tə mama, ʋ nan Zwerizalɛmə, ʋ va Babɩlɔnə. 21 Nəŋə kʋ tə Ba-Yígúrə́-Jə-Tiu, kwatara Yɩɩ tə nə yɩ Yɩzərayɛlə lɩ̀à Yɩɩ nə swɩ̀n zɩla tə yuu wa, tə nə ga Ba-Yígúrə́-Jə-Tiu dìə̀ tə wa, də Zwida pɩ̀ʋ́ dìə̀ tə wa, də Zwerizalɛmə wa: 22 “Ba wá pɛ̀ tə mama, ba ja va Babɩlɔnə, yá tə wá ya lá, kʋ va kʋ yí máŋá tə, à nə wá ywàń tə yuu, à pa tə pìí tə bà bwálɩ́ kʋ tə wa.”

Ba-Yígúrə́-Jə-Tiu nii sʋgʋ nə!»