Zweremi də Yɩɩ nii sʋ̀sʋ̀nʋ̀ Hananɩa
28
1 Bɩnɩ təntə tətə wa, Zwida pɩ̀ʋ́ Sedekɩasə pàrɩ̀ tə sinti wa, banɩa nii bɩnɩ tə bonu nii cànà tə wa, Azurə bìú Hananɩa, ʋ nə yɩ Yɩɩ nii sʋ̀sʋ̀nʋ̀, ʋ wulə Gabawon nə, swɩ̀n à con, Ba-Yígúrə́-Jə-Tiu dìə̀ tə wa, Yɩɩ joŋwana tə, də lalʋʋ tə mama yáá con, ʋ wʋ́: 2 «Nə̀ń kʋ tə Ba-Yígúrə́-Jə-Tiu, kwatara Yɩɩ* tə nə yɩ Yɩzərayɛlə lɩ̀à Yɩɩ nə swɩ̀n: “À wá nyʋnyʋgʋ Babɩlɔnə pɩ̀ʋ́ nɩan bɩan dàʋ̀ tə, ʋ nə dɩga á pàrà wa! 3 Yəbə də bɩna bələ, à wá pa Ba-Yígúrə́-Jə-Tiu dìə̀ zɩla tə mama pìí tə bà bwálɩ́ kʋ tə wa, Babɩlɔnə pɩ̀ʋ́ Nebukadənezarə nə pɛ̀ tə, ʋ ja va Babɩlɔnə. 4 Yá à wá pa Yehoyakimə bìú Yekonɩa, ʋ nə yɩ Zwida pɩ̀ʋ́, də Zwida lʋʋ lɩ̀à tə mama, ba nə ja va yongaʋ Babɩlɔnə nə, pìí ba bà bwálɩ́ kʋ tə wa. Cɩ́gá, à wá nyʋnyʋgʋ Babɩlɔnə pɩ̀ʋ́ nɩan bɩan dàʋ̀ tə.” Ba-Yígúrə́-Jə-Tiu nii sʋgʋ nə!»5 Yɩɩ nii sʋ̀sʋ̀nʋ̀ Zweremi le Yɩɩ nii sʋ̀sʋ̀nʋ̀ Hananɩa, Yɩɩ joŋwana tə yáá con, də lalʋʋ tə mama yáá con, ba yà nə zɩga Ba-Yígúrə́-Jə-Tiu dìə̀ tə wa. 6 Yɩɩ nii sʋ̀sʋ̀nʋ̀ Zweremi swɩ̀n, ʋ wʋ́: «Amɩna! Ba-Yígúrə́-Jə-Tiu wá tʋn kʋ nətʋ! Ba-Yígúrə́-Jə-Tiu wá pa ʋ nii sʋ̀ràn tə n nə swɩ̀n tə nii sú. Yá ʋ ga pa Ba-Yígúrə́-Jə-Tiu dìə̀ zɩla tə, də lɩ̀à tə mama ba nə ja va yongaʋ Babɩlɔnə nə, pìí ba bà bwálɩ́ kʋ tə wa! 7 Yá à dàń nə lòrì mʋ́, sə n cʋgʋ sʋgʋ kʋ tə, à nə swɩ̀n à kəni n zɩan wa, də lalʋʋ tə mama zɩan wa: 8 Yɩɩ nii sʋ̀sʋ̀nà tə nə dí à mʋ̀ də n mʋ̀ mɛ yáá ba ya lá, kʋ máŋá nə ba yigə, ba swɩ̀n Yɩɩ nii sʋ̀ràn ba ma zɩgɩ lʋʋ níə́ kapʋpʋ, də payun nəfaran nə. Ba swɩ̀n kʋ̀ʋ̀, də lɛɛ, də tɩan yayɩpwarʋ yoo, tə nə wá yí bwálá təntə tɩ̀án. 9 Yá Yɩɩ nii sʋ̀sʋ̀nʋ̀ nə swɩ̀n sìə́ yoo Yɩɩ nii sʋ̀ràn wa, kʋ yɩ Yɩɩ nii sʋ̀ràn tə ʋ nə swɩ̀n nii nə súə́ nə, ba wá lwarɩ də ʋ cɩ́gá yɩ Yɩɩ nii sʋ̀sʋ̀nʋ̀, Ba-Yígúrə́-Jə-Tiu nə tʋn.» 10 Yá Yɩɩ nii sʋ̀sʋ̀nʋ̀ Hananɩa dàń lɩ nɩan bɩan dàʋ̀ tə, Yɩɩ nii sʋ̀sʋ̀nʋ̀ Zweremi pàrà wa, ʋ nyʋnyʋgʋ. 11 Yá Hananɩa dàń swɩ̀n lalʋʋ tə mama yɩ́á wa, ba yà nə wulə lá, ʋ wʋ́: «Nəŋə kʋ tə Ba-Yígúrə́-Jə-Tiu nə swɩ̀n: “Yəbə də bɩna bələ nii nə, mə nətʋ nə, à wá nyʋnyʋgʋ nɩan bɩan dàʋ̀ tə, Babɩlɔnə pɩ̀ʋ́ Nebukadənezarə nə dɩga lʋʋ dwíə́ tə mama pàrà wa.”»
Yá Yɩɩ nii sʋ̀sʋ̀nʋ̀ Zweremi tì ʋ cwəŋə ʋ vìí.
12 Yɩɩ nii sʋ̀sʋ̀nʋ̀ Hananɩa nə nyʋnyʋgʋ nɩan bɩan dàʋ̀ tə yà nə wulə Yɩɩ nii sʋsʋ̀nʋ̀ Zweremi pàrà wa kwa nə, Ba-Yígúrə́-Jə-Tiu swɩ̀n sʋ̀ràn tə tə Zweremi con, ʋ wʋ́: 13 «Vəli n swɩ̀n Hananɩa con, n wʋ́: Nə̀ń kʋ tə Ba-Yígúrə́-Jə-Tiu nə swɩ̀n: “N wàá nɩan bɩan daran n nyʋnyʋga! Kʋ mʋ̀ yɩrɩ, n wá lwàń tə yuu nə də lurən.” 14 Cɩ́gá, nə̀ń kʋ tə Ba-Yígúrə́-Jə-Tiu, kwatara Yɩɩ tə nə yɩ Yɩzərayɛlə lɩ̀à Yɩɩ, nə swɩ̀n: “À wá dɩ nɩan bɩan won, kʋ nə yɩ lugu lʋʋ dwíə́ tə mama pàrà wa, sə ba tʋn ba pa Babɩlɔnə pɩ̀ʋ́ Nebukadənezarə nə, yá ba wá tʋn ba pa wá. À ken gaʋ vàná də tətə ʋ jɩɩn wa.”»
15 Yá Yɩɩ nii sʋ̀sʋ̀nʋ̀ Zweremi swɩ̀n Yɩɩ nii sʋ̀sʋ̀nʋ̀ Hananɩa con, ʋ wʋ́: «Cʋgʋ, Hananɩa! Ba-Yígúrə́-Jə-Tiu wà mʋ́ tʋn, yá n ga yigu lalʋʋ kʋ tə, n pa ba kə ba waa kʋ̀nkʋ̀n nə. 16 Kʋ mʋ̀ yɩrɩ, nə̀ń kʋ tə Ba-Yígúrə́-Jə-Tiu nə swɩ̀n: “Nə̀ń, à wá dɩŋa mʋ́ à lɩ lʋʋ nii tə wa, yá n wá tɩ bɩnɩ kʋ tə tətə wa. Cɩ́gá, n sʋ̀ràn tə pɩn lalʋʋ tə vɩ à mʋ̀ Ba-Yígúrə́-Jə-Tiu nii.”»
17 Yá Yɩɩ nii sʋ̀sʋ̀nʋ̀ Hananɩa cɩ́gá tɩga kʋ bɩnɩ təntə barpɛ nii cànà tə wa.