Zweremi 29

Zweremi tʋn sagɩ lɩ̀à tə nə, ba nə ja va yongaʋ tə

1 Yɩɩ nii sʋ̀sʋ̀nʋ̀ Zweremi zɩgɩ Zwerizalɛmə nə, ʋ pʋ́pʋ́nɩ́ sagɩ, ʋ tʋn tɩʋ tɩ̀án tə gɩganɩ* tə nə, də Yɩɩ joŋwana tə nə, də Yɩɩ nii sʋ̀sʋ̀nà tə nə, də lalʋʋ tə mama nə, Babɩlɔnə pɩ̀ʋ́ Nebukadənezarə nə ja nan Zwerizalɛmə, ʋ va yongaʋ Babɩlɔnə nə. 2 Kʋ yɩn pɩ̀ʋ́ Yekonɩa, də pɩ̀ʋ́ nuu tə, də pɩ̀ʋ́ sàń tʋ̀tʋ̀nà tə, də Zwida də Zwerizalɛmə tʋ̀tʋ̀nán yun tɩ̀án tə, də lɩ̀à tə nə sə̀ dɛɛ, də ba tə nə fwa borən nə nan Zwerizalɛmə wa kwa nə. 3 Ʋ ken sagɩ tə Swafan bìú Eleyaza, də Hiləkiya bìú Gemarɩya jɩɩn wa, Zwida pɩ̀ʋ́ Sedekɩasə nə tʋn Babɩlɔnə nə, Babɩlɔnə pɩ̀ʋ́ Nebukadənezarə con. Zweremi pʋ́pʋ́nɩ́ sagɩ tə wa, ʋ wʋ́:

4 «Nə̀ń kʋ tə à mʋ̀ Ba-Yígúrə́-Jə-Tiu, kwatara Yɩɩ* tə nə yɩ Yɩzərayɛlə lɩ̀à Yɩɩ nə swɩ̀n lɩ̀à tə mama con, à nə pɩn ba ja nan Zwerizalɛmə, ba va yongaʋ Babɩlɔnə nə: 5 “Á lwiə dìì, á ya tə wa, á cwɩan tɩ̀án, á də́ tə lənə. 6 Á swiə kana, á lɩra bɩ̀á də bwɩ̀ɩ́, á swiə kana á pa á bɩ̀á nə, yá á ga pa á bwɩ̀ɩ́ bara nə ba swe, sə ba də lɩra bɩ̀á də bwɩ̀ɩ́. Á pùlə̀ zənzən bwálɩ́ tə wa, á nə wulə, á dànà ká mun. 7 Á fwa kʋ tə mama á nə wàá, sə sìə́* ya tɩʋ tə wa, à nə pɩn ba ja aba ba va yongaʋ tə. Á jana Ba-Yígúrə́-Jə-Tiu nadwan nə, kʋ tɩʋ tə yuu yɩrɩ. Cɩ́gá, kʋ nə wulə sìə́ wa, á də wá ya sìə́ wa.”

8 Cɩ́gá, nə̀ń kʋ tə Ba-Yígúrə́-Jə-Tiu, kwatara Yɩɩ tə nə yɩ Yɩzərayɛlə lɩ̀à Yɩɩ nə swɩ̀n: “Á dànà ká yá á pa Yɩɩ nii sʋ̀sʋ̀nà tə, də vʋra tə nə wulə á titəŋi wa, gɩgarɩ aba ba dʋgʋ. Á dànà ká jələ pandwɩa tə, á nə dwɛ̀! 9 Cɩ́gá, tə yɩ kʋ̀nkʋ̀n yɩɩ nii sʋ̀ràn ba swɩ̀n ba bɩrɩ aba, à yuu yɩrɩ. À wà ba tʋn.” Ba-Yígúrə́-Jə-Tiu nii sʋgʋ nə!

10 Yá á nəŋə kʋ tə Ba-Yígúrə́-Jə-Tiu nə kʋ́ʋ̀ swɩ̀n: “Máŋá tə wa Babɩlɔnə payuu tə nə wá də́ pàrɩ̀ bɩna sapwɩtwa də fugə kwa nə, à wá zàn à zɩgɩ kʋ nə, á yɩrɩ. Yá à wá pa à nikanɩ nəzəŋu tə nii sú kʋ pa aba, à ga pa á pìí á bà bwálɩ́ kʋ tə wa. 11 À mʋ̀ yə̀ə́ táná tə à nə tanɩ á yɩrɩ! Kʋ yɩ sìə́ tana, kʋ tà lɛɛ tana. Kʋ wá pa á ja yala, á jwɩan ga ya zəni. À mʋ̀ Ba-Yígúrə́-Jə-Tiu nii sʋgʋ nə! 12 Á dàń wá bon á kə à nə, á ga vìí, á wá ja à nadwan nə, yá à wá le aba. 13 Á wá twarɩ nə, yá á wá na nə, á nə wá twarɩ nə də á bɩcan mama yɩrɩ. 14 À wá yá à pa á na nə. À mʋ̀ Ba-Yígúrə́-Jə-Tiu nii sʋgʋ nə! À wá pa á lɩ̀à tə, ba nə ja va yongaʋ, pìí ba bà. À wá lɩ á mama, lʋʋ dwíə́ tə mama wa, də bwálá tə mama wa à nə dɩŋɩ aba à kə, yá à wá pa á pìí á bà duən yáá nə, bwálɩ́ kʋ tə wa, à nə pɩn ba ja aba ba nan lá, ba va yongaʋ.” Ba-Yígúrə́-Jə-Tiu nii sʋgʋ nə!

15 Yá á swɩ̀n á wʋ́: “Ba-Yígúrə́-Jə-Tiu lɩ ʋ nii sʋ̀sʋ̀nà, ʋ pa nəba Babɩlɔnə nə!”

16 Nəŋə kʋ tə Ba-Yígúrə́-Jə-Tiu nə swɩ̀n pɩ̀ʋ́ tə con, ʋ nə jə̀ə́ Davidə padaʋ tə yuu, də lalʋʋ tə mama con, ba nə jə̀ə́ tɩʋ təntə wa, də á nubɩa tə con, ba nə wà twá ba va yongaʋ tə də aba. 17 Ba-Yígúrə́-Jə-Tiu, ʋ nə yɩ kwatara Yɩɩ nə swɩ̀n: “Nəŋə, à tʋn kwatara sɩ̀ʋ́, də niən, də tɩan yayɩpwarʋ ba titəŋi wa, yá à wá pa ba ya ndə kapɩra nə pʋa, tə wàrɩ̀ tə də́, tə nə ba ziən yɩrɩ. 18 À wá pú ba kwa à dɩŋa də kwatara sɩ̀ʋ́, də niən, də tɩan yayɩpwarʋ. À wá pa ba jì bɩcapuri won, kʋ ywàŋʋ́ nə ba fɩra jə, ba pa tɩa yuu payun tə mama nə. Ba yoo wá ya yokəlu kʋ pa lɩ̀à nə, yá kʋ wá jì sirə, lɩ̀à nə ma fʋfʋlɩ duən, ba mʋŋa, də ba ma zɩrɩ zɩra, tɩa yuu dwíə́ tə mama wa, à nə dɩŋɩ ba à kə. 19 Cɩ́gá, ba wà à sʋ̀ràn tə cʋgʋ. À mʋ̀ Ba-Yígúrə́-Jə-Tiu nii sʋgʋ nə! À tʋn à tʋ̀tʋ̀nà tə, ba nə yɩ à nii sʋ̀sʋ̀nà ba con, də à bwɛ́, yá ba wà ba con tan. À mʋ̀ Ba-Yígúrə́-Jə-Tiu nii sʋgʋ nə!”

20 Yá á mʋ̀ dàń cʋga Ba-Yígúrə́-Jə-Tiu sʋgʋ, á mʋ̀ lɩ̀à tə mama, á nə yɩ ywə́ŋə́, à nə pɩn á nan Zwerizalɛmə á va Babɩlɔnə!

21 Nəŋə kʋ tə Ba-Yígúrə́-Jə-Tiu, kwatara Yɩɩ tə nə yɩ Yɩzərayɛlə lɩ̀à Yɩɩ nə swɩ̀n Akabə yuu wa, ʋ nə yɩ Kolaya bìú, də Sedekɩasə yuu wa, ʋ nə yɩ Maseya bìú, ba nə swɩ̀n Yɩɩ nii sʋ̀ràn á con, à yuu yɩrɩ, yá tə yɩ kʋ̀nkʋ̀n: “Nəŋə, à wá kə ba Babɩlɔnə pɩ̀ʋ́ Nebukadənezarə jɩɩn wa, yá ʋ wá gʋ ba, á yɩ́á yuu. 22 Ba wá tì yoo tə nə yí ba, ba ma fwa zɩra lɩ̀à tə mama wa, ba nə ja nan Zwida lʋʋ nii, ba va yongaʋ Babɩlɔnə nə, ba swɩ̀n, ba wʋ́: Ba-Yígúrə́-Jə-Tiu wá pa yoo tə nə yí Sedekɩasə də Akabə, yí n də. Cɩ́gá, Babɩlɔnə pɩ̀ʋ́ pɩn ba sʋ̀rɩ́ ba mən wa! 23 Cɩ́gá, ba cʋ̀gʋ̀ culu nəfarʋ Yɩzərayɛlə wa. Ba cwàrɩ̀ də ba jənduən kana, yá ba swɩ̀n Yɩɩ nii sʋ̀ràn à yuu yɩrɩ, tə nə yɩ kʋ̀nkʋ̀n, máŋá tə wa, à nə wà ba nii pɩn. À yə̀ə́ kʋ nətʋ tə, à yɩ kʋ dansɩa lìù.” Ba-Yígúrə́-Jə-Tiu nii sʋgʋ nə!»

Swemaya sagɩ tə yoo

24 Ba-Yígúrə́-Jə-Tiu, swɩ̀n Zweremi con, ʋ wʋ́: «N wá swɩ̀n Swemaya con, ʋ nə yɩ Nehelamə tíú, n wʋ́: 25 “Nə̀ń kʋ tə Ba-Yígúrə́-Jə-Tiu, kwatara Yɩɩ tə nə yɩ Yɩzərayɛlə lɩ̀à Yɩɩ nə swɩ̀n: N tʋn saga n tətə yɩrɩ yuu wa, Zwerizalɛmə lalʋʋ tə mama nə, də Sofoni nə, ʋ nə yɩ Yɩɩ joŋwanʋ Maseya bìú, də Yɩɩ joŋwana tə mama nə, n wʋ́: 26 Ba-Yígúrə́-Jə-Tiu tún mʋ́, sə n jon Yɩɩ joŋwanʋ Yehoyada yuu nə, n ya Yɩɩ joŋwanʋ, n ywàń lɩ̀à tə mama yuu nə, Yɩɩ dìə̀ tə wa, ba nə swɩ̀n nyɩnyansʋran, ba ga bʋŋa də tə yɩ Yɩɩ nii sʋ̀ràn, sə n ga vwa ba də banzala, də lugu bɩan kabaŋʋ, n zɩgɩ kanporu wa. 27 Yá bɛ̀ɛ̀ dàń nə pɩn n wà Zweremi mʋ̀, ʋ nə yɩ Anatɔtə tíú nə zɩgɩ, ʋ nə wʋ́ ʋ yɩ Yɩɩ nii sʋ̀sʋ̀nʋ̀, ʋ wulə á titəŋi wa? 28 Ʋ mʋ̀ lìù tə, ʋ nə tʋn ʋ swɩ̀n nə con Babɩlɔnə nə, ʋ wʋ́: Kʋ wá tɩ máŋá! Kʋ mʋ̀ yɩrɩ, á lwiə dìì, á ya tə wa, á ga cwɛn tɩ̀án, á də́ tə lənə!”»

29 Yɩɩ joŋwanʋ Sofoni kàrɩ̀ sagɩ təntə, Yɩɩ nii sʋ̀sʋ̀nʋ̀ Zweremi yáá con. 30 Yá Ba-Yígúrə́-Jə-Tiu swɩ̀n sʋ̀ràn tə tə Zweremi con, ʋ wʋ́: 31 «Tʋn n swɩ̀n kori kʋ tə lɩ̀à tə mama con, ba nə ja va yongaʋ, n wʋ́: “Nəŋə kʋ tə Ba-Yígúrə́-Jə-Tiu nə swɩ̀n Swemaya yuu wa, ʋ nə yɩ Nehelamə tíú: Swemaya nə swə ʋ swɩ̀n Yɩɩ nii sʋ̀ràn də, à mʋ̀ wà wá tʋn, yá ʋ pɩn á kə á waa kʋ̀nkʋ̀n yìə̀n nə.” 32 Nəŋə kʋ tə à mʋ̀ Ba-Yígúrə́-Jə-Tiu nə swɩ̀n: “À wá zɩgɩ Swemaya də ʋ dwíí nə, yá ba ladʋa tətə bá ga á titəŋi wa, sə ʋ na zəni tə, à nə wá tʋn à lalʋʋ tə yɩra. Cɩ́gá, ʋ yigu à lalʋʋ tə, ʋ pa ba zàn ba zɩgɩ à nə. À mʋ̀ Ba-Yígúrə́-Jə-Tiu nii sʋgʋ nə!”»