Yɩzərayɛlə payuu tə wá pìí kʋ tɩnɩ kʋ tɩ̀àn
30
1 Ba-Yígúrə́-Jə-Tiu swɩ̀n sʋ̀ràn tə tə Zweremi con, ʋ wʋ́: 2 «Nə̀ń kʋ tə à mʋ̀ Ba-Yígúrə́-Jə-Tiu, à nə yɩ Yɩzərayɛlə lɩ̀à Yɩɩ nə swɩ̀n: Pʋ́pʋ́nɩ́ sʋ̀ràn tə mama, à nə swɩ̀n n con, n kə sagɩ wa. 3 Nə̀ń máŋá bɩ̀àn, à nə wá pa Yɩzərayɛlə də Zwida lʋʋ lɩ̀à tə, ba nə yɩ à mʋ̀ lɩ̀à, ba ja va yongaʋ, pìí ba bà. À mʋ̀ Ba-Yígúrə́-Jə-Tiu nii sʋgʋ nə! À wá pa ba pìí ba bà lʋʋ nii tə wa, à nə pɩn ba nɩbara-ba nə, yá ba wá jon kʋ ba tɩnɩ. À mʋ̀ Ba-Yígúrə́-Jə-Tiu nə swɩ̀n kʋ!»4 Yá nə̀ń sʋ̀ràn tə, Ba-Yígúrə́-Jə-Tiu nə swɩ̀n Yɩzərayɛlə də Zwida lʋʋ níə́ tə yuu wa:
5 Ʋ swɩ̀n, ʋ wʋ́:
«Nə nə̀ń gigiru zizigu,
kʋ yɩ bɩcapuri, kʋ tà sìə́.
6 Á bwiə duən á jə́n,
bɛɛ yàá ja pùə́, ʋ lɩra naaa?
Bɛ̀ɛ̀ dàń nə pɩn, à na bara tə mama,
ba tàà ba tàŋɩ́ nə,
ndə kan pùə́ nə yɩ̀, sə ʋ lɩra?
Bɛ̀ɛ̀ nə pɩn ba yɛ́ɛ́ mama kʋ̀, tə pɩ̀rɩ̀?
7 Nə̀ń kʋ lɛɛ nyɩɛn nʋ̀ʋ̀!
Cɩ́gá, kʋ dɩɩn tə yɩ dɩfarʋ,
dɩɩn don mama tà ndə kʋ nə.
Kʋ yɩ jɩgwarʋ máŋá, kʋ pa Zwakɔbə dwíí tə nə!
Yá ba wá jon ba tɩ̀àn, won mama bá yí ba.»
8 Ba-Yígúrə́-Jə-Tiu swɩ̀n, ʋ súrí lá, ʋ wʋ́: «Kʋ dɩɩn təntə nə, à wá nyʋnyʋgʋ nɩan bɩan dàʋ̀ tə nə wulə ba pàrà wa, à ga karɩ banzala tə nə vwə ba, yá ba kʋ bá tʋn ndə ywə́ŋə́ nə, ba pa vərə nə. À mʋ̀ Ba-Yígúrə́-Jə-Tiu, à nə yɩ kwatara Yɩɩ nii sʋgʋ nə! 9 Yá ba dàń wá tʋn ba pa à mʋ̀ Ba-Yígúrə́-Jə-Tiu nə, à nə yɩ ba Yɩɩ. Ba mʋ̀ yɩrɩ nə, à wá pìí à tún Davidə, sə ʋ ya ba pɩ̀ʋ́, ba tʋn ba pa wá.»
10 Ba-Yígúrə́-Jə-Tiu swɩ̀n Zwakɔbə dwíí tə con, ʋ wʋ́:
«Yá á mʋ̀, à tʋtʋnʋ Zwakɔbə dwíí tə,
dànà ká pa fən ja aba,
á dànà ká pa á jɩ̀àn gwàrɩ̀, Yɩzərayɛlə lɩ̀à-ba!
À mʋ̀ Ba-Yígúrə́-Jə-Tiu nii sʋgʋ nə!
Cɩ́gá, à wá jon aba lʋʋ níə́ tə nə ŋʋ́ná jɩɩn wa,
à wá jon á dwíí tə lʋʋ nii tə jɩɩn wa,
ba nə yɩ kʋ ywə́ŋə́.
Zwakɔbə dwíí tə wá pìí ba bà,
yá ba wá ya sìə́ wa,
ba jə̀ń də yazurə,
lìù mama ga kʋ́ʋ̀ bá wʋwalɩ ba.
11 Cɩ́gá, à wulə də aba, sə à jon aba.
À mʋ̀ Ba-Yígúrə́-Jə-Tiu nii sʋgʋ nə!
À wá cʋ̀gʋ̀ lʋʋ dwíə́ tə mama mɩ́ámɩ́án,
à nə laga aba duən yáá nə, à kə tə wa.
Yá à bá cʋ̀gʋ̀ á mʋ̀ mɩ́ámɩ́án,
à dàń nə wá pá aba à kə cwəŋə wa,
ndə kʋ nə mɛ nətʋ.
À wàrɩ̀ aba à yá ndə lɩ̀à nə,
ba nə wà yoo cʋ̀gʋ̀!»
12 Nə̀ń kʋ tə Ba-Yígúrə́-Jə-Tiu nə swɩ̀n Zwerizalɛmə tɩ̀án con:
«Cʋcʋran wàrɩ̀ tə zwɛ̀, á titəŋi wa,
á nʋran tə wàrɩ̀ tə zuri.
13 Lìù mama ba á jɩrɩmʋ zɩga,
sə ʋ ywarɩ á nʋran tə,
á nʋran tə ba tɩ̀ʋ́ jə.
14 Lɩ̀à tə mama yà nə swə aba, swɛ̀ɛ́ á yoo,
ba kʋ́ʋ̀ ba á nɛɛ twarɩ.
Cɩ́gá, à mà aba, ndə dʋŋʋ nə mà nətʋ.
À pá aba à kə cwəŋə wa də wʋdɩʋ,
á yolwana kapʋpʋ tə yɩrɩ,
á cʋna tə nə lwara zənzən yɩrɩ.
15 Bɛ̀ɛ̀ nə pɩn á ŋʋŋwɩn,
ba nə caŋɩ aba,
kʋ pa á yacara wàrɩ̀ tə zwɛ̀ yɩrɩ?
Kʋ yɩ á yolwana kapʋpʋ tə yɩrɩ,
á cʋna tə nə lwara zənzən yɩrɩ nə,
à tʋn kʋ nətʋ tə á yɩra.
16 Kʋ mʋ̀ nə pɩn,
à dàń wá cʋ̀gʋ̀ lɩ̀à tə mama,
ba yà nə cʋ̀gà aba,
yá ba wá ja á dʋŋa tə mama, ba va yongaʋ.
À wá cʋ̀gʋ̀ lɩ̀à tə,
ba yà nə tʋŋa cʋcʋran à yɩra,
à ga wá yá, à pa ba vɩrɩ lɩ̀à tə mama,
ba yà nə vɩrɩ aba.
17 Cɩ́gá, ba boŋə aba “Ba vɩga ba dʋgʋ”,
á mʋ̀ Siyon* tɩ̀án, lìù mama nə ba aba pɩ̀à.
Yá à mʋ̀ wá pìí à ywarɩ á nʋran tə,
à pa á yɩra zuri.
À mʋ̀ Ba-Yígúrə́-Jə-Tiu nii sʋgʋ nə!»
18 Nəŋə kʋ tə Ba-Yígúrə́-Jə-Tiu nə swɩ̀n:
«À wá pa Zwakɔbə dwíí tə,
ba nə ja va yongaʋ, pìí ba bà, ba sànɩ́ tə wa,
à ga wá dəri ba sànɩ́ tə yinəgə.
Ba dàń wá pìí ba lwà tɩʋ tə, kʋ dibwərən tə yuu wa,
yá ba wá pìí ba lwà dizəŋə tə, ba zɩgɩ tə dí yáá bwálɩ́ nə.
19 Ba pupwən gwaran,
də ba cànà diŋə zizigu naŋa.
À wá pa ba pùlì zənzən,
yá ba kʋ́ʋ̀ bá mun mama.
À wá pa ba ja dun,
yá ba kʋ́ʋ̀ bá fʋfʋlɩ ba.
20 Ba bɩ̀á wá ya ndə ba yà nə yɩ nətʋ, fuən nə,
ba púlí tə ga wá zɩgɩ à yáá con,
yá à wá zàn à zɩgɩ lɩ̀à tə mama nə,
ba nə fɩfɩn ba.
21 Ba pɩ̀ʋ́ wá nan ba tətə wa,
yá ba tətə wa lìù don nə wá ya ba yáá tíú.
À wá pa ʋ bólí à yɩra,
yá ʋ wá bà ʋ yí à yɩra.
Cɩ́gá, wàà nə wá sɛ̀ ʋ yí à yɩra,
sə ʋ kwɩ̀n ʋ mɩɩ nə?
À mʋ̀ Ba-Yígúrə́-Jə-Tiu nii sʋgʋ nə!
22 Á kʋ́ʋ̀ wá ya à lɩ̀à,
yá à də wá ya á Yɩɩ.»
23 Nəŋə Ba-Yígúrə́-Jə-Tiu dwavʋʋ nə, kʋ bɩ̀àn:
Kʋ yɩ ʋ lɩŋa tə nə fʋrɩ,
ndə dwavʋʋ nəfarʋ nə,
yá ʋ wá fwi tə wʋlʋnyɩna yuu wa.
24 Ba-Yígúrə́-Jə-Tiu lɩŋa tə nə pupwin,
bá pìí tə kə tə kwa,
kʋ va kʋ yí máŋá tə,
ʋ nə wá tʋn ʋ pubʋŋa yoo mama,
ʋ pa kʋ nii sú.
Dɩɩn don nə, á wá nì kʋ də̀ń.