31
1 «Máŋá bɩ̀àn, à nə wá ya Yɩzərayɛlə dwíə́ tə mama Yɩɩ, yá ba wá ya à lɩ̀à. À mʋ̀ Ba-Yígúrə́-Jə-Tiu nii sʋgʋ nə!»Yɩzərayɛlə lɩ̀à tə gɩganɩ túrí yoo
2 Nəŋə kʋ tə Ba-Yígúrə́-Jə-Tiu nə swɩ̀n:
«À fwa pubwanʋ lalʋʋ tə gɩganɩ tə yɩra,
kwatara sɩ̀ʋ́ nə wà gwɩ, kasɔɔ lanworu tə wa.
Yá Yɩzərayɛlə lɩ̀à tə dàń wá wànɩ́ ba ya sìə́ wa.
3 Lalʋʋ tə yà swɩ̀n, ba wʋ́:
“Ba-Yígúrə́-Jə-Tiu bɩrɩ ʋ tɩ̀àn nəba fuən mama.”
Yá à le ba, à wʋ́:
“À swə aba də sonu kʋ nə ba yígúrə́ jə,
kʋ mʋ̀ nə pɩn, à cɩ̀ à wʋywaŋʋ* tə à tún á nə.”
4 À kʋ́ʋ̀ wá pìí à tún á mʋ̀ Yɩzərayɛlə lɩ̀à tə,
á nə yɩ ndə kacɩɩn nə, ʋ tə nə yəri bɛɛ,
yá á wá pìí á ya á bwálɩ́ nə!
Á kʋ́ʋ̀ wá tì á mənkori nəzəŋə tə,
á ja nan sárá tə nə sɛ də pupwən titəŋi wa.
5 Á kʋ́ʋ̀ wá cwɛn divɛn tɩ̀án,
Samari pɛɛn tə yuu wa,
yá lɩ̀à tə nə cwɛn tɩ̀án, wá pʋ̀rɩ́ tə lənə.
6 Cɩ́gá, máŋá bɩ̀àn,
tɩʋ nəcɩra tə nə wá bòrì Efərayimə pɛɛn tə yuu wa, ba wʋ́:
Á zaŋa nə va Sion,
Ba-Yígúrə́-Jə-Tiu con, ʋ nə yɩ nə Yɩɩ!»
7 Cɩ́gá, nə̀ń kʋ tə Ba-Yígúrə́-Jə-Tiu nə swɩ̀n:
«Á maga pupwən cə̀rí Zwakɔbə dwíí tə yuu nə!
Á maga wuwulə lʋʋ dwíə́ tə mama yuu-tiu tə yuu nə!
Á pɩan ba nì á bʋra, á nə bwɩ̀, á wʋ́:
“Ba-Yígúrə́-Jə-Tiu, jon n lalʋʋ tə,
kʋ nə yɩ Yɩzərayɛlə lɩ̀à gɩganɩ*!”
8 À pɩn ba pìí ba nan jɩzən saparʋ lʋʋ nii tə wa, ba bɩ̀àn,
à wá lɩ ba tɩa yígúrə́ wa, à kə duən yáá nə.
Kʋ nə yɩ liliu, nə à yə̀ə́ gwànʋ́,
kʋ nə yɩ kapuə,
nə à yə̀ə́ kan tə, ʋ pùə́ nə yɩ̀ sə ʋ lɩra,
ba mama wá ya duən yáá,
yá kʋ yɩ lɩ̀à kapʋpʋ nə pìí ba bɩ̀àn yəbə.
9 Ba pìí ba bɩ̀àn də ba kwi,
də ba lòrì nə,
yá à kwé ba.
À ja ba à tì cwəŋə tə nə ziən,
ba nə bá mà ba nɛɛ nə ka wa,
à ja va nacorən tə nii nə,
tə nə súə́ də nɩ́á.
Cɩ́gá, à yɩ Yɩzərayɛlə lɩ̀à nyɩna,
yá Efərayimə nə yɩ à bikwɩa.»
10 Á mʋ̀ dwíə́ nəkaran* tə,
á cʋga Ba-Yígúrə́-Jə-Tiu nii sʋgʋ,
á ga bòrì kʋ á bɩrɩ mʋʋ titəŋi lʋʋ níə́ tə wa, tə nə ŋʋ́ná!
Á swɩ̀n, á wʋ́:
«Lìù tə nə laga Yɩzərayɛlə lɩ̀à tə,
wá pìí ʋ kə ba duən yáá nə,
yá ʋ wá ywàń ba yuu,
ndə nayɩrʋ nə ywàŋá ʋ vàná yuu nətʋ.»
11 Cɩ́gá, Ba-Yígúrə́-Jə-Tiu jon Zwakɔbə dwíí tə,
ʋ lɩ ba dʋŋʋ jɩɩn wa, ʋ dɩ̀àn nə dwə ba.
12 Ba wá bà, ba mà pupwən cə̀rí
Siyon paan tə yuu wa.
Ba wá jwɛ zəni tə mama yɩrɩ,
Ba-Yígúrə́-Jə-Tiu nə wá tʋn ba yɩra:
Ʋ wá pa ba mɩna, də divɛn nədʋn,
də nʋga, də vanmɩnɩ, də vanfaran.
Ba wá ya ndə tɩ̀án kárá nə,
ba nə gàrɩ̀ ka nə,
yá ba kʋ́ʋ̀ bá bwànɩ́.
13 Yá kacɩan tə, ba tə nə yəri bɛɛ,
wá sa də pupwən,
ba də ləzwəndʋn tə, də bazʋnan tə mama.
À wá lwàń ba lúə́, à pa ka jì cànà diŋə,
yá à wá kòrì ba,
à poli ba pwìí, ba wʋwalʋ tə kwa nə.
14 À wá pa Yɩɩ joŋwana tə də́ vàná
tə nə jə nʋga, ba sú,
yá à wozəŋə wá bʋ́rɩ́ à lalʋʋ tə.
À mʋ̀ Ba-Yígúrə́-Jə-Tiu nii sʋgʋ nə!
15 Nə̀ń kʋ tə Ba-Yígúrə́-Jə-Tiu nə swɩ̀n:
«Ba nə̀ń bubwiə Rama tɩʋ wa,
kʋ yɩ kwirə də yinənsʋran.
Raswɛlə nə kwi ʋ bɩ̀á nə,
ʋ ba sɛ̀ sə lìù kòrì wá,
ʋ bɩ̀á tə mɩɩ nə kʋ́ʋ̀ tə̀lə́ lʋʋ wa yɩrɩ.»
16 Yá nə̀ń kʋ tə Ba-Yígúrə́-Jə-Tiu nə swɩ̀n:
«Dàn ká kwi, mʋ̀rɩ́ n yinɩa!
Cɩ́gá, à wá pa mʋ́ n kajaŋa tə ŋwɩ́rán.
N bɩ̀á tə wá pìí ba nan
ba dʋŋa lʋʋ nii wa, ba bà.
À mʋ̀ Ba-Yígúrə́-Jə-Tiu nii sʋgʋ nə!
17 Yala wulə n dwíí tə yɩrɩ,
n bɩ̀á wá pìí ba bà ba nyɩna sàń.
À mʋ̀ Ba-Yígúrə́-Jə-Tiu nii sʋgʋ nə!
18 À cɩ́gá nì də Efərayimə dwíí tə ŋʋŋwɩn,
ba swɩ̀n, ba wʋ́:
“N ken nəba càn wa,
yá nə sɛ̀, nə yá nə pa càn yí nəba,
ndə ba nə kəni càn navalʋ nə,
kʋ nə yəri vanan yáá zəni.
Ja nəba n pìí n bà n con, yá nə wá bà.
Cɩ́gá, n mʋ́ Ba-Yígúrə́-Jə-Tiu, nə yɩ nə Yɩɩ.
19 Cɩ́gá, nə yà viviri nə kwa nə ma sà mʋ́,
yá sɩ́ʋ́n nə, nə pùə́ cʋ̀gʋ̀ kʋ nətʋ tə yɩrɩ.
N pɩn nə lwarɩ nə cʋna tə,
yá nə dàń dɩŋɩ nə jɩfwɩ nə fɩfaga,
cavɩra zʋa nəba, kʋ pa nə fʋfʋlɩ.
Cɩ́gá, nə zɩŋa nə zandwan cavɩra nə yuu wa.”
20 Efərayimə nə yɩ à biswənə,
ʋ mʋ̀ nə à swə, à doni ba duən tə mama.
Kʋ mʋ̀ nə pɩn máŋá mama,
à nə swə à swɩ̀n à zɩga ʋ nə də,
ʋ yoo yàá jə nə,
à nə swə wá də à waa mama yɩrɩ.
Cɩ́gá, à dəri ʋ yinəgə zənzən.
À mʋ̀ Ba-Yígúrə́-Jə-Tiu nii sʋgʋ nə!»
21 Zɩ̀n n sanguli n zɩgɩ n cwəŋə nii nə,
tún n mɩmɩnan,
ywàń cwəŋə tə zəni,
cwəŋə tə, n nə vəli ka wa!
Pìí bà, Yɩzərayɛlə,
n nə yɩ ndə kacɩɩn nə, ʋ tə nə yəri bɛɛ,
Pìí bà tɩan tə tə wa, tə nə yɩ n mʋ̀ nyiən!
22 N tə wá ywan, kʋ dán kʋ mɛ nətə,
n mʋ̀ bʋ̀á tə, n nə yɩ zɩbanənyiən?
Cɩ́gá, Ba-Yígúrə́-Jə-Tiu fwa yodʋn, tɩa yuu wa:
Kan nə wá cara bɛɛ.
Nimarʋdʋn yoo
23 Nə̀ń kʋ tə Ba-Yígúrə́-Jə-Tiu, kwatara Yɩɩ* tə nə yɩ Yɩzərayɛlə lɩ̀à Yɩɩ nə swɩ̀n: «Máŋá tə wa, à nə wá pìí à ja Zwida lʋʋ lɩ̀à tə, ba nə ja va yongaʋ, à bà, ba kʋ́ʋ̀ wá swɩ̀n sʋ̀ràn tə tə, Zwida tɩan tə wa, ba wʋ́:
“Ba-Yígúrə́-Jə-Tiu wá fwa zəni n yɩra,
n mʋ̀ bwálɩ́ tə cɩ́gá cwəŋə nə wulə,
n mʋ̀ paan tə nə yɩ parɩ!”
24 Yá Zwida tɩbii lɩ̀à, də kʋ tɩfaran lɩ̀à, də kʋ vala, də kʋ lɩ̀à tə nə yɩ̀rɩ̀ vàná mɛ wá ya lʋʋ nii tə wa. 25 Cɩ́gá, à wá pa lɩ̀à tə nanyʋnɩ nə gwàrɩ̀, nyʋn nɩ́á ba sú, à ga pa dɩ̀àn ba tə nə, ba nə yarɩ. 26 Kʋ kwa nə, à zàn dwiən nə, yá à nɩ də à dwiən tə yɩn ywánɩ́.
27 Nə̀ń máŋá bɩ̀àn, à nə wá mɩ́n ləzoni də vàná, Yɩzərayɛlə də Zwida payun tə wa, ndə ba nə mɩ́n wodwii kárá wa nətʋ. À mʋ̀ Ba-Yígúrə́-Jə-Tiu nii sʋgʋ nə! 28 Yá à dàń wá ywàń ba yuu, sə ba lwà ba sànɩ́ tə, ba jə̀ń, ba dəkuu zʋ tɩa, ndə à yà nə fin à yɩ́á ba yuu wa, à pa dʋŋa gwɛrɩ ba sànɩ́ tə, ba yigu tə ba buburi duən yuu, ba cʋ̀gʋ̀, sə kʋ yɩ̀ ba nətʋ. À mʋ̀ Ba-Yígúrə́-Jə-Tiu nii sʋgʋ nə! 29 Yá lìù mama kʋ́ʋ̀ ba pìí ʋ swɩ̀n zwansɩsara ka tə, ʋ wʋ́:
“Nyɩna-ba nə dí divɛn tɩ̀án bigərən,
kʋ pa ba bɩ̀á yələ nyʋnɩ.”
30 Yá sɩ́ʋ́n nə, lìù mama dàń wá tɩ, ʋ tətə lwanɩ yɩrɩ. Lìù tə mama ʋ nə dí divɛn tɩ̀án bigərən, ʋ tətə yələ nə wá nyʋnɩ.
31 Á nəŋə máŋá bɩ̀àn, à nə wá tún nimarʋ nədʋn də Yɩzərayɛlə, də Zwida lʋʋ lɩ̀à tə. À mʋ̀ Ba-Yígúrə́-Jə-Tiu nii sʋgʋ nə! 32 Kʋ bá ya ndə nimarʋ tə nə, à nə tún də ba nɩbara-ba, máŋá tə wa, à nə jɩn ba jɩɩn nə, à van ba à lɩ Ezwipətə lʋʋ nii tə wa. Ba kwə kʋ nimarʋ təntə, yá à mʋ̀ yà nə yɩ ba karnyɩna. À mʋ̀ Ba-Yígúrə́-Jə-Tiu nii sʋgʋ nə! 33 Yá á dàń nəŋə nimarʋ tə, à nə wá tún də Yɩzərayɛlə lɩ̀à tə, kʋ máŋá təntə kwa nə: À wá pʋ́pʋ́nɩ́ à nii yìə̀n tə, à tún ba pubʋŋa wa, à ga bɩ̀rɩ̀ tə à tún ba bɩcanɩ wa. À wá ya ba Yɩɩ, yá ba də wá ya à lɩ̀à. À mʋ̀ Ba-Yígúrə́-Jə-Tiu nii sʋgʋ nə: 34 Ba lìù mama kʋ́ʋ̀ ba kàrɩ̀ ʋ jəndon, nə à yə̀ə́ ʋ nubiu, sə ba yəni à mʋ̀ Ba-Yígúrə́-Jə-Tiu. Cɩ́gá, ba mama wá lwarɩ nə, kʋ nə zɩgɩ ba wa nəmaa nə, kʋ va kʋ yí ba nəkwɩa. À mʋ̀ Ba-Yígúrə́-Jə-Tiu nii sʋgʋ nə! Cɩ́gá, à wá kwɛn ba yolwana tə à lɩ à mʋ̀ də ba pwə́rə́ wa, yá à kʋ́ʋ̀ ba pìí à bʋ́n ba cʋna yoo.»
35 Nəŋə kʋ tə Ba-Yígúrə́-Jə-Tiu,
ʋ mʋ̀ Yɩɩ tə, ʋ nə tún yɩcaʋ tə,
sə kʋ pɩ̀rɩ̀ tɩa tə tɩpʋrɩ wa,
ʋ ga pa nii cànà tə də kacɩlacɛ tə nə,
sə tə pɩ̀rɩ̀ tɩa tə tɩtɩn nə,
ʋ nə yàá gurə mʋʋ tə,
ʋ pa kʋ nakulə fʋ̀rɩ̀,
ʋ mʋ̀ Yɩɩ tə, ʋ yɩrɩ nə yɩ Ba-Yígúrə́-Jə-Tiu,
ʋ nə yɩ kwatara Yɩɩ, nə swɩ̀n:
36 «Wiən təntə nə twi,
tə kʋ́ʋ̀ ba tʋŋa ndə nətʋ tə nə,
à nə pɩn tə nii sə tə tʋn à yáá con,
mə kʋ máŋá təntə wa nə,
Yɩzərayɛlə dwíí tə də kʋ́ʋ̀ bá ya lʋʋ nii,
ba ya lʋʋ wa, à yáá con, máŋá mama wuuu.
À mʋ̀ Ba-Yígúrə́-Jə-Tiu nii sʋgʋ nə!»
37 Nəŋə kʋ tə Ba-Yígúrə́-Jə-Tiu nə swɩ̀n:
«Lìù nə wàá lanworu tə ʋ maŋa,
ʋ lwarɩ kʋ danɩ,
nə à yə̀ə́ ʋ nə wàá tɩa tə də̀ń lun ʋ lwarɩ,
kʋ máŋá tə wa, à wá vɩ Yɩzərayɛlə dwíí tə mama à dʋgʋ,
kʋ tə mama yɩrɩ ba nə tʋn.
À mʋ̀ Ba-Yígúrə́-Jə-Tiu nii sʋgʋ nə!
38 Nəŋə máŋá bɩ̀àn, ba nə wá pìí ba lwà Zwerizalɛmə tɩʋ tə ba pa à mʋ̀ Ba-Yígúrə́-Jə-Tiu nə. À mʋ̀ Ba-Yígúrə́-Jə-Tiu nii sʋgʋ nə! Ba wá lwà kʋ, kʋ nə zɩgɩ Hananeyɛlə dəyuu dìə̀ tə nə, kʋ va kʋ yí Nigwancɩn mimii tə. 39 Ba kʋ́ʋ̀ wá dɩlɩ dìlwə̀rə́ ŋwənə mənəmənə, ba ja twá Garɛbə paan tə yuu wa, ba gugoli ba va Gʋatə paan tə con. 40 Tɩga də jwəŋə tʋnan vara tə mama, də Sedəron nacoru tə nii tɩa tə mama, kʋ va kʋ yí Səsen mimii tə nigwancɩn tə nə wulə yɩɩ yipɩan con, wá ya Ba-Yígúrə́-Jə-Tiu cɩcɩ nyiən. Yá ba kʋ́ʋ̀ bá cʋ̀gʋ̀ bwálá təntə, nə à yə̀ə́ ba gwɛrɩ tə, abada.»