Zweremi 32

Zweremi jon kárá ʋ yə̀

1 Ba-Yígúrə́-Jə-Tiu swɩ̀n sʋ̀ràn tə tə Zweremi con, Zwida pɩ̀ʋ́ Sedekɩasə pàrɩ̀ tə bələ nii bɩnɩ tə wa. Kʋ yɩn Babɩlɔnə pɩ̀ʋ́ Nebukadənezarə pàrɩ̀ tə fugə də nana nii bɩnɩ tə wa. 2 Babɩlɔnə pɩ̀ʋ́ kwatara tə yà púə́ Zwerizalɛmə ba kə, ba tɛ. Pɩ̀ʋ́ Sedekɩasə yà pɩn ba sun Zweremi mʋ̀ bandiə dəwoo tə wa, ka nə wulə Zwida pɩ̀ʋ́ sàń tə wa. 3 Zwida pɩ̀ʋ́ Sedekɩasə yà pɩn ba ja Zweremi ba sun bandiə wa, ʋ ga caga ʋ nii nə, ʋ wʋ́: «Bɛ̀ɛ̀ nə pɩn n ma swɩ̀n Yɩɩ nii sʋ̀ràn, n wʋ́ Ba-Yígúrə́-Jə-Tiu swɩ̀n, ʋ wʋ́: “À wá kə tɩʋ kʋ tə Babɩlɔnə tɩ̀án jɩɩn wa, yá ba wá tɩnɩ kʋ. 4 Zwida pɩ̀ʋ́ Sedekɩasə də tətə bá jɛ́n Kaləde tɩ̀án tə jɩɩn wa. À cɩ́gá wá kə wá Babɩlɔnə pɩ̀ʋ́ jɩɩn wa, yá ʋ wá zɩgɩ Babɩlɔnə pɩ̀ʋ́ yáá con, ʋ tətə swɩ̀n də wá, nəpon nəpon. 5 Babɩlɔnə pɩ̀ʋ́ wá ja Sedekɩasə, ʋ va Babɩlɔnə, yá ʋ wá mɛn lá, kʋ va kʋ yí máŋá tə, à nə wá viviri à yáá, à kə ʋ con. À mʋ̀ Ba-Yígúrə́-Jə-Tiu nii sʋgʋ nə! Á nə ta kʋ̀ʋ̀ də Kaləde tɩ̀án tə, á bá də́ dɩ̀àn ba yuu wa.”»

6 Yá Zweremi swɩ̀n də Ba-Yígúrə́-Jə-Tiu swɩ̀n sʋ̀ràn tə tə ʋ con, ʋ wʋ́: 7 «Nə̀ń n nɩbarɩ Swalumə bìú Hanameyɛlə wá bà ʋ lòrì mʋ́, sə n jon ʋ kárá tə nə wulə Anatɔtə nə, n yə̀. Cɩ́gá, n jə cwəŋə, sə n jon ka n yə̀, n nə yɩ ʋ dwíí tíú yɩrɩ.»

8 Yá à nɩbarɩ bìú Hanameyɛlə dàń twi à con, bandiə dəwoo tə wa, ndə Ba-Yígúrə́-Jə-Tiu nə swɩ̀n kʋ à con nətʋ. Hanameyɛlə swɩ̀n à con, ʋ wʋ́: «Jon à kárá tə nə wulə Anatɔtə nə, Bɛnzwamɛn nagwanaa tə wa, n yə̀. Cɩ́gá, n jə cwəŋə, sə n jon ka n yə̀, n nə yɩ à dwíí tíú yɩrɩ.»

Yá à dàń lwarɩ də kʋ cɩ́gá yɩ Ba-Yígúrə́-Jə-Tiu nə swɩ̀n à con.

9 À ma jon à nɩbarɩ bìú Hanameyɛlə kárá tə nə wulə Anatɔtə nə, à yə̀, à ŋwɩ́n ka kwənə à pa wá, wárʋ́ səbilurən* fugə də barpɛ. 10 À pʋ́pʋ́nɩ́ saga bələ, tə nə bɩrɩ də à jon kárá tə à yə̀. À koni kʋ don nii, à tún à jɩɩn kʋ yuu wa, dansɩa lɩ̀à yáá con, à ga kəri səbiu tə, səkəri yuu wa. 11 Kʋ kwa nə, à tì yəə dansɩa sagɩ tə, à nə koni kʋ nii, à ga tún à jɩɩn kʋ yuu wa, ndə Yɩɩ nii yìə̀n tə nə bɩrɩ, sə kʋ tʋn nətʋ, də sagɩ tə, kʋ nii nə wà koni, 12 à pa Neriya bìú Barukə nə, ʋ nə yɩ Maseya nàʋ́. Kʋ yɩn à nɩbarɩ bìú Hanameyɛlə yɩ́á wa, də dansɩa lɩ̀à tə yɩ́á wa, ba nə tún ba jɩ̀àn yəə dansɩa sagɩ tə yuu wa, də Zwida lʋʋ lɩ̀à tə mama yɩ́á wa, ba ya nə wulə bandiə dəwoo tə wa. 13 À pɩn nii kʋ tə Barukə nə, ba yɩ́á wa, à wʋ́: 14 «Nə̀ń kʋ tə Ba-Yígúrə́-Jə-Tiu, kwatara Yɩɩ tə nə yɩ Yɩzərayɛlə lɩ̀à Yɩɩ nə swɩ̀n: “Tì yəə dansɩa saga tətə, kʋ tə kʋ nii nə koni, à ga tún à jɩɩn kʋ yuu wa, də kʋ tə kʋ nii nə wà koni, n kə daʋ kwàrá wa, sə tə wànɩ́ tə tún, tə dán.”

15 Cɩ́gá, nə̀ń kʋ tə Ba-Yígúrə́-Jə-Tiu, kwatara Yɩɩ tə nə yɩ Yɩzərayɛlə lɩ̀à Yɩɩ nə swɩ̀n: “Máŋá don wa, ba kʋ́ʋ̀ wá yə dìì, də kárɩ́, də divɛn tɩ̀án kárɩ́ lʋʋ nii kʋ tə wa.”»

Zweremi yɩjʋnɩ yoo

16 À nə pɩn yəə dansɩa sagɩ tə Neriya bìú Barukə nə kwa nə, à fwa yɩjʋnɩ kʋ tə Ba-Yígúrə́-Jə-Tiu con, à wʋ́: 17 «Aaa! Yuu-Tiu Ba-Yígúrə́-Jə-Tiu, n mʋ̀ nə fwa lanworu də tɩa, kʋ twá də n vàn dɩ̀àn nəfarʋ tə. Yoo mama ba mʋ́ gwárɩ́! 18 N yàá fwa pubwanʋ lɩ̀à yɩra, kʋ va kʋ yí ba dwíí tə dəkurən mʋ̀rʋ̀ nii nyiən. Yá n yàá ŋwɩ́n nyɩna-ba cʋna jɩŋɩ ba bɩ̀á yɩra, ba tɩan kwa nə. N yɩ Yɩɩ tə, n nə wulə tə mɛ yuu wa, n ga jə dɩ̀àn zənzən. N yɩrɩ nə yɩ Ba-Yígúrə́-Jə-Tiu, kwatara Yɩɩ. 19 N yàá tanɩ yoo mama də wʋbʋŋa, n ga tʋŋa tʋtʋnfaran. N yɩ́á cəə ləzoni tʋtʋnɛɛ tə mama yuu, sə n ŋwɩ́n kʋ tə nə mɛ də lìù mama yʋa, n pa wá, kʋ mɛ də ʋ tʋtʋnɛɛ lənə.

20 N tʋn dɩ̀àn mɩmɩnan də yomɩlan Ezwipətə lʋʋ nii wa, n ma bɩrɩ kʋ tə n nə yɩ, yá də zə̀n mama, n tə tʋŋa tə Yɩzərayɛlə wa, də tɩa yuu ləzoni tə mama wa. Yá n yɩrɩ dàń nan, ndə ba nə na kʋ nətʋ zə̀n. 21 N ja n jɩɩn dɩ̀àn nəfarʋ tə, də n vagoo tə, n ma tʋn dɩ̀àn mɩmɩnan, də yomɩlan, də yogwaran, də fən nəfarʋ, n ma lɩ Yɩzərayɛlə lalʋʋ tə, ba nə yɩ n mʋ̀ lɩ̀à, Ezwipətə lʋʋ nii tə wa. 22 N pɩn ba lʋʋ nii kʋ tə, n yà nə dùə̀ də n wá pa kʋ ba nɩbara-ba nə. Kʋ yɩ lʋʋ nii, nayɩla də tʋ̀ràn nə súə́ lá, tə pàlɩ̀. 23 Ba twi ba jon kʋ ba tɩnɩ. Yá ba wà n sʋgʋ cʋgʋ, ba wà n nii yìə̀n tə nə twá. Ba vɩga sə ba tʋn yìə̀n tə n bɩrɩ ba, sə ba tʋn. Kʋ mʋ̀ nə pɩn, n ma pa lɛɛ tə tə mama yí ba.

24 Nə̀ń dʋŋa tə nə, ba wulə ba lwə̀ kukurə nacana tɩʋ tə biritaŋʋ tə yɩra, sə ba ja zʋ ba ta kʋ. Kwatara sɩ̀ʋ́, də niən, də tɩan yayɩpwaran wá pa Kaləde tɩ̀án tə jɩɩn zʋ tɩʋ tə, ba nə wulə ba tɛ. Yoo tə n nə swɩ̀n tə cɩ́gá twi, ndə n nə na kʋ nətʋ. 25 Tɩʋ tə zʋa Kaləde tɩ̀án jɩɩn kʋ zwɛ̀, yá də kʋ mɛ, n mʋ̀ Yuu-Tiu Ba-Yígúrə́-Jə-Tiu swɩ̀n à con, n wʋ́: “Yə̀ kárá, n ŋwɩ́n ka kwənə n pa, dansɩa lɩ̀à yáá con!”»

Ba-Yígúrə́-Jə-Tiu le Zweremi yɩjʋnɩ tə

26 Ba-Yígúrə́-Jə-Tiu swɩ̀n sʋ̀ràn tə tə Zweremi con, ʋ wʋ́: 27 «À mʋ̀ Ba-Yígúrə́-Jə-Tiu yɩ won tə mama nə nəŋə Yɩɩ. Won tə̀lə́ à nə wàrɩ̀ à tʋŋa. 28 Kʋ mʋ̀ yɩrɩ, nə̀ń kʋ tə à mʋ̀ Ba-Yígúrə́-Jə-Tiu nə swɩ̀n: À ken tɩʋ kʋ tə Kaləde tɩ̀án tə jɩɩn wa. À ken kʋ Babɩlɔnə pɩ̀ʋ́ Nebukadənezarə jɩɩn wa, yá ʋ wá jon kʋ ʋ tɩnɩ. 29 Kaləde tɩ̀án tə nə wulə ba tɛ tɩ̀ʋ́ tə, wá zʋ kʋ wa, yá ba wá dɩ mən kʋ nə, kʋ də́ kʋ cʋ̀gʋ̀. Ba wá sʋ̀rɩ́ dìì tə, Zwerizalɛmə tɩ̀án nə sʋ̀rɩ́ wusinə tə dəyun wa, ba pa woŋwanʋ Baalə* nə, ba ga fwa divɛn jwəŋə ba pa yɩa duən nə, ba ma zɩ̀n à lɩŋa.

30 Cɩ́gá, Yɩzərayɛlə də Zwida lʋʋ lɩ̀à tə zandʋan mama, kʋ yɩ kʋ tə nə lwara à yáá con nə, ba tʋŋa. Yɩzərayɛlə lɩ̀à yɩ ba zə́n ba ja ba tʋtʋnɛɛ tə ba ma zɩ̀n à lɩŋa. À mʋ̀ Ba-Yígúrə́-Jə-Tiu nii sʋgʋ nə! 31 Cɩ́gá, Zwerizalɛmə tɩʋ tə pɩn à lɩŋa zaŋa, tə pupwin kʋ yuu wa zənzən, kʋ nə zɩgɩ dɩɩn tə ba nə lwə̀ kʋ, kʋ bà kʋ yí zə̀n. Kʋ mʋ̀ nə pɩn, à kʋ́ʋ̀ ba pɩ̀à sə à na kʋ, à yáá con, 32 lwanɩ tə mama yɩrɩ Yɩzərayɛlə də Zwida lʋʋ lɩ̀à tə nə tʋn. Ba də pɛ̀gá tə, də ba tʋ̀tʋ̀nán yun tɩ̀án tə, də ba Yɩɩ joŋwana tə, də ba Yɩɩ nii sʋ̀sʋ̀nà tə, də Zwida lʋʋ lɩ̀à tə, də Zwerizalɛmə tɩ̀án tʋn cʋna, ba ma zɩ̀n à lɩŋa tə. 33 Ba viviri ba kwa, ba ma sà nə, ba wà ba yáá à con ken. À kàrɩ̀ ba də à bwɛ́, yá ba wà à sʋgʋ cʋgʋ, sə ba dàń nə ma joŋə à kwìə̀. 34 Kʋ tə nə dwə, ba ja ba wolwana tə ba zʋ ba tún dìə̀ tə wa, ba nə boŋə à yɩrɩ ka wa, ba pa ka jì durən won. 35 Ba lwə̀ jwəŋə dədwələn* ba pa ba woŋwanʋ Baalə nə, Bɛn-Hinomə vara tə wa, ba ma sʋ̀rɩ́ ba bɩ̀á də ba bwɩ̀ɩ́ mən wa, ba ma fwa jwəŋə ba pɩn woŋwanʋ Mɔlɔkə* nə. Kʋ yɩ yoo tə, à yà nə wà ba nii pɩn, sə ba tʋn, kʋ yoo ga wà à pubʋŋa wa twi də tətə, sə à pa ba tʋn yobalwarʋ nətən yiri, sə kʋ pa Zwida lʋʋ lɩ̀à tʋn cʋna.»

36 Yá Ba-Yígúrə́-Jə-Tiu swɩ̀n Zweremi con, ʋ wʋ́: «Sɩ́ʋ́n nə, dàń nə̀ń yoo tə à mʋ̀ Ba-Yígúrə́-Jə-Tiu, à nə yɩ Yɩzərayɛlə lɩ̀à Yɩɩ nə swɩ̀n tɩʋ kʋ tə yuu wa, n nə swɩ̀n kʋ yoo, də kwatara sɩ̀ʋ́, də niən, də tɩan yayɩpwaran wá pa Babɩlɔnə pɩ̀ʋ́ jɩɩn zʋ kʋ: 37 À pùə́ yà cʋ̀gʋ̀ ba yuu wa zənzən, à lɩŋa ga zàn, tə pupwin ba yuu wa, kʋ pa à dɩŋa ba à kə lʋʋ níə́ kapʋpʋ wa. Yá nə̀ń, à wá pìí à lɩ ba lʋʋ níə́ tə mama wa, à yà nə dɩŋɩ ba à kə, à ja bà duən yáá, bwálɩ́ kʋ tə wa, yá à wá pa ba ya lá də sìə́. 38 Ba wá ya à mʋ̀ lɩ̀à, yá à mʋ̀ nə wá ya ba Yɩɩ. 39 À wá pa ba ja bɩcan nədʋ, də yʋa nədʋ, sə kʋ pa ba dəri à fən, máŋá mama wuuu, ba ga də́ ywánɩ́, ba mʋ̀ də ba bɩ̀á tə mɛ, ba nə wá ya lʋʋ wa, ba tɩan kwa nə. 40 À wá tún nimarʋ nədʋn də ba, kʋ nə wá ya lá, máŋá mama wuuu, yá à kʋ́ʋ̀ bá pìí à yá ba. À wá fwa zəni ba yɩra, à ga kə à fən ba bɩcanɩ wa, sə ba kʋ́ʋ̀ dàn ká pìí ba yá nə. 41 À wá ja pupwən, sə à fwa zəni ba yɩra, à ga wá pa ba jə̀ń lʋʋ nii kʋ tə wa, ba dəkuu zʋ tɩa. À wá tʋn kʋ nətʋ tə, də à waa mama, də à pubʋŋa mama. 42 Cɩ́gá, nə̀ń kʋ tə à mʋ̀ Ba-Yígúrə́-Jə-Tiu nə swɩ̀n: Nətʋ tə à nə pɩn lɛɛ nəfarʋ kʋ tə mama yí lalʋʋ kʋ tə, mə nətʋ nə à wá tʋn zəni tə də mama, à nə swɩ̀n də à wá tʋn ba yɩra. 43 Ba wá yə̀ kárɩ́ lʋʋ nii kʋ tə wa, á nə swɩ̀n də kʋ cʋ̀gʋ̀ mɩ́ámɩ́án, ləzwənə nə à yə̀ə́ vànɩ́ tə̀lə́ kʋ wa, yá kʋ zʋa Kaləde tɩ̀án tə jɩɩn. 44 Ba wá ja səbiu ba ma yə̀ kárɩ́, ba pʋ́pʋ́nɩ́ tə yəə dansɩa saga, ba tún jɩ̀àn tə yuu wa, dansɩa lɩ̀à yáá con, Bɛnzwamɛn nagwanaa tə wa, də Zwerizalɛmə nii tɩbii tə wa, də Zwida tɩan tə wa, də pɛɛn nagwanaa tɩan tə wa, də Swefela* nagwanaa tɩan tə wa, də Negɛbə nagwanaa tɩan tə wa. Cɩ́gá, à wá pa ba lɩ̀à tə, ba nə ja va yongaʋ, pìí ba bà. À mʋ̀ Ba-Yígúrə́-Jə-Tiu nii sʋgʋ nə!»