Zweremi 33

Ba-Yígúrə́-Jə-Tiu kàn nii də ʋ wá pìí ʋ kwɛn Zwerizalɛmə

1 Ba-Yígúrə́-Jə-Tiu swɩ̀n Zweremi con nɛɛ bələ nii nə, də ʋ tə wulə pɩ̀ʋ́ sàń nəcɩra dəwoo tə wa. 2 Nə̀ń kʋ tə Ba-Yígúrə́-Jə-Tiu, Yɩɩ tə ʋ nə tʋŋa yìə̀n təntə nə swɩ̀n! Ʋ mʋ̀ Ba-Yígúrə́-Jə-Tiu nə tanɩ tə, ʋ pɩn tə tʋŋa. Ʋ mʋ̀ Yɩɩ tə, ʋ yɩrɩ nə yɩ Ba-Yígúrə́-Jə-Tiu swɩ̀n, ʋ wʋ́: 3 «Bon n kə à nə, yá à wá le mʋ́. À wá bɩrɩ mʋ́ yofaran, tə nə səgə, n nə yəri tə. 4 Cɩ́gá, nə̀ń kʋ tə à mʋ̀ Ba-Yígúrə́-Jə-Tiu, à nə yɩ Yɩzərayɛlə lɩ̀à Yɩɩ nə swɩ̀n: Tɩʋ kʋ tə dìì tə, də Zwida pɩ̀ʋ́ dìì tə ba nə gwɛrɩ, sə ba ma cɩ̀ Babɩlɔnə tɩ̀án kukurə nacanɩ lwiu yáá nə, də ba kwatara sɩ̀ʋ́ yáá nə, yɩ tʋtʋ. 5 Yá dìì təntə súə́ də lɩ̀à tə tɩga, ba nə nan sə ba ta Kaləde tɩ̀án tə. Tə súə́ də bara tə tɩga, à nə gʋa, à lɩŋa tə nə zaŋa, tə pupwin ba yuu wa yɩrɩ. À yáá kʋ́ʋ̀ tə̀lə́ də tɩʋ kʋ tə, ba wʋlʋŋʋ tʋ̀tʋ̀nán tə mama yɩrɩ.

6 «Yá à wá pìí à ywarɩ tɩʋ tə, à pa kʋ na yazurə. À wá ywarɩ kʋ lɩ̀à tə, à pa ba na sìə́ də yazurə zənzən. 7 À wá pa Zwida də Yɩzərayɛlə lɩ̀à tə, ba nə ja va yongaʋ, pìí ba bà, yá à wá pa ba pìí ba jə̀ń ba bwálɩ́ nə, ndə fuən nə. 8 À wá kwɛn ba yolwana tə mama, à lɩ, ba nə tʋn ba zɩgɩ à nə. À wá yá ba yolwana tə mama, tə nə pɩn ba tʋn cʋna ba zɩgɩ à nə, à pa tə kɛ̀ń. 9 Tɩʋ kʋ tə yɩrɩ tə wá ja fɩra, də pupwən, də dun kʋ pa nə, tɩa yuu dwíə́ tə mama wa, ba nə wá nì zəni tə mama, à nə tʋn Yɩzərayɛlə də Zwida lʋʋ lɩ̀à tə yɩra. Kʋ wá gwárɩ́ ba, ba ga vɩvaga, sìə́ tə də ywánɩ́ tə mama yɩrɩ, à nə pɩn Yɩzərayɛlə də Zwida lʋʋ lɩ̀à nə.»

10 Nə̀ń kʋ tə Ba-Yígúrə́-Jə-Tiu nə swɩ̀n: «Á swɩ̀n də bwálɩ́ kʋ tə yɩ dibwərən, lɩ̀à nə à yə̀ə́ vàná kʋ́ʋ̀ tə̀lə́ kʋ wa. Yá Zwida tɩan tə, də Zwerizalɛmə coŋi tə, lɩ̀à nə à yə̀ə́ vàná nə tə̀lə́ tə wa, á kʋ́ʋ̀ wá nì, 11 cànà diŋə zizigu, də pupwən cə̀rí, də kasweri gwaran. Á kʋ́ʋ̀ wá nì gwaran tə, lɩ̀à nə yàá dɩ, ba swɩ̀n, ba wʋ́:

Á bwɩa Ba-Yígúrə́-Jə-Tiu nə,

ʋ nə yɩ kwatara Yɩɩ!

Cɩ́gá, Ba-Yígúrə́-Jə-Tiu ziən,

yá ʋ wʋywaŋʋ* tə wulə wuuu, kʋ ba zwɛ̀!

Ba yàá nuŋə gwaran təntə, máŋá tə wa, ba nə ja jwii kənu jwəŋə* ba bà Ba-Yígúrə́-Jə-Tiu dìə̀ tə wa. Cɩ́gá, à wá pa lɩ̀à tə ba nə ja va yongaʋ, pìí ba bà, yá à wá pa ba pìí ba jə̀ń ba bwálɩ́ nə, ndə fuən nə.» Ba-Yígúrə́-Jə-Tiu nə swɩ̀n kʋ.

12 Nə̀ń kʋ tə Ba-Yígúrə́-Jə-Tiu, ʋ nə yɩ kwatara Yɩɩ nə swɩ̀n: «Bwálɩ́ kʋ tə wa, kʋ nə yɩ dibwərən, lɩ̀à nə à yə̀ə́ vàná nə tə̀lə́ lá, də kʋ tɩan tə mama wa, pətun kʋ́ʋ̀ wá ya lá, sə payɩra pa ba vàná pə̀ń lá. 13 Pɛɛn nagwanaa tɩan tə wa, də Swefela* nagwanaa tɩan tə wa, də Negɛbə* nagwanaa tɩan tə wa, də Bɛnzwamɛn nagwanaa tə wa, də Zwerizalɛmə nii tɩbii tə wa, də Zwida tɩan tə wa, vanmɩnɩ kʋ́ʋ̀ wá twá lìù tə nə gàlɩ̀ tə jɩɩn də̀ń tə kɛ̀ń.» Ba-Yígúrə́-Jə-Tiu nə swɩ̀n kʋ.

Yɩɩ bá pìí ʋ kwɩ̀án ʋ nikanɩ tə

14 «Nə̀ń máŋá bɩ̀àn, à nə wá tʋn nikanɩ nəzəŋu tə, à nə kàn à pa Yɩzərayɛlə də Zwida lʋʋ lɩ̀à tə nə, à pa kʋ nii sú. 15 Dɩan təntə nə yí máŋá tə wa, à wá pa ba lɩra bìú Davidə dwíí tə wa, ʋ nə yɩ Davidə nàʋ́ cɩ́gá cɩ́gá, yá ʋ wá tʋn yoo mama, kʋ twá cɩ́gá cwəŋə, də kʋ tə nə yɩ mənəmənə nə, lʋʋ nii tə wa. 16 Kʋ máŋá təntə wa, Zwida lʋʋ nii tə wá tɩnɩ kʋ tɩ̀àn, yá Zwerizalɛmə tɩ̀án wá ya sìə́ wa. Nə̀ń nətʋ tə ba nə wá bon Zwerizalɛmə: “Ba-Yígúrə́-Jə-Tiu yɩ nə cɩ́gá cwəŋə!”»

17 Cɩ́gá, nə̀ń kʋ tə Ba-Yígúrə́-Jə-Tiu nə swɩ̀n: «Lìù bá mùrì pɩ̀ʋ́ Davidə dwíí tə wa, sə ʋ jə̀ń Yɩzərayɛlə lɩ̀à padaʋ tə yuu, ʋ də́ pàrɩ̀. 18 Yá lɩ̀à bá mùrì Yɩɩ joŋwana tə də wa, ba nə yɩ Levi dwíí, sə ba ya à yáá con, ba fwa jwəŋə tə ba nə sʋ̀rɩ́, də ba sʋ̀rɩ́ zìlə́ wiən, də ba fwa jwəŋə ba pɩn nə, dɩɩn mama.»

19 Ba-Yígúrə́-Jə-Tiu swɩ̀n sʋ̀ràn tə tə Zweremi con, ʋ wʋ́: 20 «Nə̀ń kʋ tə à mʋ̀ Ba-Yígúrə́-Jə-Tiu nə swɩ̀n: Á nə wàá à nimarʋ tə à nə tún də tɩpʋrɩ, də à nimarʋ tə à nə tún də tɩtɩn, á kwɛ̀, kʋ pa tɩpʋrɩ də tɩtɩn kʋ́ʋ̀ ba tə máŋá wa twi, 21 à nimarʋ tə à nə tún də à tʋtʋnʋ Davidə də wá kwa, yá lìù kʋ́ʋ̀ bá ya ʋ dwíí tə wa, sə ʋ jə̀ń ʋ padaʋ tə yuu, ʋ də́ pàrɩ̀. Yá mə kʋ wá ya nətʋ də Yɩɩ joŋwana tə də, ba nə yɩ Levi dwíí, ba tʋŋa ba pɩn nə. 22 N nə yə̀ə́ ba nə wàrɩ̀ lanworu kacɩlacɛɛ tə, nə à yə̀ə́ mʋʋ nii kasɩlʋ ba gàlɩ̀ nətʋ, mə nətʋ nə à wá pa à tʋtʋnʋ Davidə dwíí tə, də Levi dwíí tə ba nə tʋŋa ba pɩn nə, pùlì.»

23 Ba-Yígúrə́-Jə-Tiu kʋ́ʋ̀ swɩ̀n sʋ̀ràn tə tə Zweremi con, ʋ wʋ́: 24 «N wà kʋ tə nì lalʋʋ tə nə swɩ̀n naaa? Ba swɩ̀n, ba wʋ́: “Dìì bələ^a tə Ba-Yígúrə́-Jə-Tiu yà nə kúrí, ʋ vɩga tə ʋ dʋgʋ!” Lɩ̀à tə nə swɩ̀n nətʋ tə, bɩrɩ də ba fʋfʋlɩ à lalʋʋ tə, yá ba kʋ́ʋ̀ ba ba jələ ndə dwíí nə tətə. 25 Dàń nə̀ń kʋ tə à mʋ̀ Ba-Yígúrə́-Jə-Tiu nə swɩ̀n: N nə yə̀ə́ à nə tún nimarʋ də tɩpʋrɩ də tɩtɩn, à ga pa nii lanworu də tɩa nə nətʋ, 26 mə nətʋ nə à bá vɩ Zwakɔbə dwíí tə, də à tʋtʋnʋ Davidə dwíí tə də, à dʋgʋ. À bá vɩ, sə à kúrí lɩ̀à Davidə dwíí tə wa máŋá mama, sə ba də́ pàrɩ̀ Abərahamə, də Yɩzakə, də Zwakɔbə dwíí tə yuu wa.

Cɩ́gá, à wá pa ba lɩ̀à tə, ba nə ja va yongaʋ, pìí ba bà, yá à wá dəri ba yinəgə.»