Zweremi 34

Yoo tə nə wá yí pɩ̀ʋ́ Sedekɩasə

1 Ba-Yígúrə́-Jə-Tiu swɩ̀n sʋ̀ràn tə tə Zweremi con, máŋá tə wa Babɩlɔnə pɩ̀ʋ́ Nebukadənezarə, də ʋ kwatara tə mama, də tɩa yuu payun tə mama, ʋ nə də́ pàrɩ̀ tə yuu wa, də lalʋʋ tə mama yà nə wulə ba tɛ kʋ̀ʋ̀ də Zwerizalɛmə, də kʋ nii tɩan tə mama. 2 Ʋ swɩ̀n, ʋ wʋ́: «Nə̀ń kʋ tə à mʋ̀ Ba-Yígúrə́-Jə-Tiu, à nə yɩ Yɩzərayɛlə lɩ̀à Yɩɩ nə swɩ̀n: Vəli n swɩ̀n Zwida pɩ̀ʋ́ Sedekɩasə con də, ʋ nə̀ń kʋ tə à mʋ̀ Ba-Yígúrə́-Jə-Tiu nə swɩ̀n: À wá kə tɩʋ kʋ tə Babɩlɔnə pɩ̀ʋ́ jɩɩn wa, yá ʋ wá sʋ̀rɩ́ kʋ mən. 3 Yá n də tətə bá jɛ́n ʋ jɩɩn wa. Ba wá ja mʋ́ ba kə ʋ jɩɩn wa. N wá zɩgɩ Babɩlɔnə pɩ̀ʋ́ yáá con, n tətə swɩ̀n də wá, nəpon nəpon, yá ʋ wá ja mʋ́ ʋ va Babɩlɔnə.

4 Yá də kʋ mɛ, Sedekɩasə, Zwida pɩ̀ʋ́, cʋgʋ Ba-Yígúrə́-Jə-Tiu sʋgʋ! Nə̀ń kʋ tə à mʋ̀ Ba-Yígúrə́-Jə-Tiu nə swɩ̀n n yuu wa: Kʋ tà kwatara sɩ̀ʋ́ nə wá gʋ mʋ́. 5 N yɩ n wá tɩ sìə́ wa. Ba wá sʋ̀rɩ́ wusinə ba pa n tɩgɩ tə nə, ndə ba nə sʋ̀rɩ́ wusinə ba pa pɛ̀gá tə duən tə tɩga tə nə nətʋ, ba nə yɩ n nɩbara-ba, ba nə dí n yáá ba də́ pàrɩ̀ tə. Ba wá kwi n lúə́, ba swɩ̀n, ba wʋ́: “Nə̀ń kʋ lɛɛ nyɩɛn nʋ̀ʋ̀, à nyɩna pɩ̀ʋ́!” Cɩ́gá, à mʋ̀ Ba-Yígúrə́-Jə-Tiu nə swɩ̀n kʋ, à mʋ̀ Ba-Yígúrə́-Jə-Tiu nii sʋgʋ nə!»

6 Yɩɩ nii sʋ̀sʋ̀nʋ̀ Zweremi vəli ʋ swɩ̀n sʋ̀ràn təntə mama Zwida pɩ̀ʋ́ Sedekɩasə con, Zwerizalɛmə nə. 7 Kʋ máŋá tə wa, də Babɩlɔnə pɩ̀ʋ́ kwatara tə yà wulə ba tɛ kʋ̀ʋ̀ də Zwerizalɛmə də Zwida tɩan tə mama, də Lakiswə də Azeka. Cɩ́gá, Zwida tɩan tə mama wa, tə nə lwə̀ tə kɩkarɩ də biritaŋʋ, Lakiswə də Azeka cɩcɩ dàń yà nə ga.

Ywə́ŋə́ tə nə tɩ ba tɩ̀àn, yá ba yun tɩ̀án pìí ba ja ba

8 Ba-Yígúrə́-Jə-Tiu swɩ̀n sʋgʋ kʋ tə Zweremi con, pɩ̀ʋ́ Sedekɩasə nə tún nimarʋ də Zwerizalɛmə lalʋʋ tə mama kwa nə, sə ʋ pa nii sə ywə́ŋə́ tə tɩnɩ ba tɩ̀àn. 9 Lìù mama yà mɛ sə ʋ yá ʋ ywə́ŋə́ tə nə yɩ Ebərə-ba dwíí, ba nə yɩ yonbara, nə à yə̀ə́ yonkana, sə ba tɩnɩ ba tɩ̀àn, lìù mama kʋ́ʋ̀ dàn ká ja ʋ nubiu Zwida dwíí lìù, ʋ pa ʋ tʋn yontʋtʋnan. 10 Tʋ̀tʋ̀nán yun tɩ̀án tə mama, də lalʋʋ tə mama nə ken nimarʋ tə sɛ̀, sə ba lìù mama yá ʋ yonbara də ʋ yonkana, sə ba tɩnɩ ba tɩ̀àn, ba kʋ́ʋ̀ dàn ká pa ba tʋn yontʋtʋnan. Ba sɛ̀ kʋ nətʋ tə, ba ga yá ywə́ŋə́ tə, ba pa ba vìí. 11 Yá kʋ kwa nə, ba pìí ba lwàń ba nii. Ba pìí ba ja yonbara tə də yonkana tə, ba yà nə yá ba pa ba tɩ ba tɩ̀àn, ba kalɩ ba kə yontʋtʋnan wa.

12 Yá Ba-Yígúrə́-Jə-Tiu dàń swɩ̀n sʋ̀ràn tə tə Zweremi con, ʋ wʋ́: 13 «Nə̀ń kʋ tə Ba-Yígúrə́-Jə-Tiu, ʋ nə yɩ Yɩzərayɛlə lɩ̀à Yɩɩ nə swɩ̀n: “À tún nimarʋ də á nɩbara-ba, máŋá tə wa, à nə lɩ ba Ezwipətə lʋʋ nii tə wa, yongaʋ tə wa, yá à swɩ̀n ba con, à wʋ́: 14 Bɩna barpɛ kwa nə, á lìù mama mɛ sə n yá n nubiu tə, ʋ nə yɩ Ebərə-ba dwíí lìù, ʋ yà nə yoli ʋ tɩ̀àn n yuu wa ndə yoŋu nə, sə ʋ tɩnɩ ʋ tɩ̀àn. Ʋ wá ya n yoŋu, ʋ tʋn ʋ pa mʋ́ bɩna bardʋ, kʋ kwa nə, n mɛ sə n yá wá, sə ʋ tɩnɩ ʋ tɩ̀àn^a.” Yá á nɩbara-ba wà à nii zìlí, ba wà ba zɩɩn guni ba kə à con. 15 Á mʋ̀ yà lwàń pubʋŋa zə̀n kʋ tə, á pìí á tʋn kʋ tə nə yɩ mənəmənə, à yáá con. Á lìù mama yà bòrì ʋ bɩrɩ, də ʋ yá ʋ yoŋu, ʋ nə yɩ ʋ nubiu, Ebərə-ba dwíí lìù, sə ʋ tɩnɩ ʋ tɩ̀àn. Yá á tún nimarʋ à yáá con, dìə̀ tə wa, á nə boŋə à yɩrɩ ka wa, á ma bòrì kʋ nətʋ tə. 16 Yá á pìí á lwàń á nii, kʋ pa á fʋfʋlɩ nə. Á lìù mama pìí ʋ ja yonbara tə, də yonkana tə, ʋ yà nə yá sə ba tɩnɩ ba tɩ̀àn, ʋ bà ʋ kalɩ ʋ kə yontʋtʋnan wa, ʋ pɩn ba tʋŋa ba pɩn wá.»

17 Kʋ mʋ̀ yɩrɩ, á nəŋə kʋ tə Ba-Yígúrə́-Jə-Tiu nə swɩ̀n: «Á lìù mama yà mɛ sə ʋ bòrì, də ʋ yá ʋ yoŋu, ʋ nə yɩ ʋ nubiu, Ebərə-ba dwíí lìù, sə ʋ tɩnɩ ʋ tɩ̀àn, yá á wà à nii zìlí. Kʋ mʋ̀ yɩrɩ, á nəŋə, à bòrì à zɩga á nə, də à pɩn nii kwatara sɩ̀ʋ́ nə, də tɩan yayɩpwarʋ nə, də niən nə, sə tə tɩnɩ tə tɩ̀àn á yuu wa. Yá à wá pa á jì bɩcapuri won, kʋ ywàŋʋ́ nə ba fɩra jə, á pa tɩa yuu payun tə mama nə. À mʋ̀ Ba-Yígúrə́-Jə-Tiu nii sʋgʋ nə!

18-19 Zwida lʋʋ nii də Zwerizalɛmə tʋ̀tʋ̀nán yun tɩ̀án tə, də pɩ̀ʋ́ sàń tʋ̀tʋ̀nà tə, də Yɩɩ joŋwana tə, də lʋʋ nii tə lalʋʋ tə mama gʋa nabiə, ba ma tún nimarʋ də nə. Ba zɩgɩ nabiə tə yupara wa, ba pwɛ̀ ka duən wa bələ, ba twá vànɩ́ kɩkaran bələ tə pwə́rə́ wa ba kɛ̀ń^b. Yá ba mʋ̀ lɩ̀à təntə cʋ̀gʋ̀ nimarʋ tə, ba yà nə tún à yáá con. Ba wà ba nikanɩ tə nii zìlí. 20 Kʋ mʋ̀ nə pɩn, à wá kə ba ba dʋŋa jɩɩn wa. À wá kə ba lɩ̀à tə nə pɩ̀à ba gʋrɩ jɩɩn wa, yá ba tɩga tə wá ya lanworu zuŋi, də tɩa yuu vàná wodiu. 21 À wá kə Zwida pɩ̀ʋ́ Sedekɩasə, də ʋ tʋ̀tʋ̀nán yun tɩ̀án tə, ba dʋŋa jɩɩn wa. À wá kə ba lɩ̀à tə nə pɩ̀à ba gʋrɩ jɩɩn wa. À wá kə ba Babɩlɔnə pɩ̀ʋ́ kwatara tə jɩɩn wa, ba nə pìí ba vìí, ba ga yá aba. 22 À wá pa nii, sə ba pìí ba bà tɩʋ kʋ tə nə. Ba wá ta kʋ ba də́, ba ga sʋ̀rɩ́ kʋ mən. Yá à wá pa Zwida lʋʋ nii tɩan tə cʋ̀gʋ̀ mɩ́ámɩ́án, lìù mama kʋ́ʋ̀ bá ya tə wa.» Ba-Yígúrə́-Jə-Tiu nii sʋgʋ nə!