Zweremi də Rekabə sàń tə
35
1 Ba-Yígúrə́-Jə-Tiu swɩ̀n sʋ̀ràn tə tə Zweremi con, Zwida pɩ̀ʋ́ Zozɩasə bìú Yehoyakimə pàrɩ̀ tə máŋá wa, ʋ wʋ́: 2 «Vəli n ve də Rekabə sàń lɩ̀à tə. N wá ja ba n zʋ Ba-Yígúrə́-Jə-Tiu dìə̀ tə dibiu don wa, n pa ba divɛn, sə ba nyʋn.» 3 À vəli à ja Zweremi bìú Yazanɩa, ʋ nə yɩ Habasɩnɩa nàʋ́, də ʋ nubɩa, də ʋ bɩ̀á mama, də Rekabə sàń lɩ̀à tə mama, 4 à ja zʋ Ba-Yígúrə́-Jə-Tiu dìə̀ tə wa. À ja ba à zʋ Yigədalɩa bìú Hanan bɩ̀á dibiu tə wa. Hanan yà yɩ Yɩɩ tʋtʋnʋ. Dibiu təntə yà wulə Yɩɩ tʋ̀tʋ̀nán yun tɩ̀án dibiu tə yɩra, Swalumə bìú Maseya dibiu tə yuu con. Maseya yà yɩ Yɩɩ dìə̀ tə mimii nəcɩrʋ. 5 À tún wùrə́n, tə nii nə súə́ də divɛn, də wùrú zwɩɩn, Rekabə sàń lɩ̀à tə yáá con, à ga swɩ̀n ba con, à wʋ́: «Á nywɩan divɛn!»6 Yá ba le nə, ba wʋ́: «Nə ba divɛn nywɩn! Cɩ́gá, nə nɩbɛɛ Yonadabə, ʋ nə yɩ Rekabə bìú pɩn nəba kwìə̀ tə tə, ʋ wʋ́:
“Á wà mɛ sə á nyʋn divɛn də mama.
Á tətə wà mɛ sə á nyʋn divɛn,
á bɩ̀á də ma wà mɛ sə ba nyʋn divɛn!
7 Á wà mɛ sə á lwà dìì,
á wà mɛ sə á vàrà kárɩ́,
á wà mɛ sə á cwɛn divɛn tɩ̀án,
yá á wà mɛ sə á ja tə də tətə.
Yá kʋ dàń nə yɩ gansilə də̀ń á wá ya,
á lʋʋ wúlú mama wa.
Mə kʋ wá twá nətʋ,
á ma wànɩ́ á ja mɩdarɩ lʋʋ nii tə wa,
á nə twi, á twá á jə̀ə́ lá.”
8 Yá nə zìlí kʋ tə mama nii, nə nɩbɛɛ Yonadabə, ʋ nə yɩ Rekabə bìú nə pɩn nəba nii kʋ yuu wa. Kʋ mʋ̀ nə pɩn, nə ma ba divɛn nywɩn, nə lʋʋ wúlú tə mama wa. Nə mʋ̀, nə à yə̀ə́ nə kana, nə à yə̀ə́ nə bɩ̀á, nə à yə̀ə́ nə bwɩ̀ɩ́ ba divɛn nywɩn də mama. 9 Nə ba dìì lwè, sə nə ya tə wa, nə ma ba divɛn tɩ̀án kárɩ́, nə à yə̀ə́ mɩna kárɩ́ jə nə vàrɩ̀, 10 yá nə yɩ gansilə də̀ń nə wulə. Nə zìlí yìə̀n tə mama, nə nɩbɛɛ Yonadabə nə pɩn nəba nii tə yuu wa. 11 Yá máŋá tə Babɩlɔnə pɩ̀ʋ́ Nebukadənezarə nə twi ʋ ta lʋʋ nii tə, nə kúrí nə tì sə nə dəri nə va Zwerizalɛmə, sə nə wànɩ́ nə jɛ́n Kaləde tɩ̀án, də Siiri tɩ̀án kwatara tə yáá nə. Mə kʋ zɩgɩ nətʋ, nə ma jə̀ə́ Zwerizalɛmə nə.»
12 Ba-Yígúrə́-Jə-Tiu dàń swɩ̀n sʋ̀ràn tə tə Zweremi con, ʋ wʋ́: 13 «Vəli n swɩ̀n Zwida lʋʋ lɩ̀à tə, də Zwerizalɛmə tɩ̀án con, də ba nəŋə kʋ tə à mʋ̀ Ba-Yígúrə́-Jə-Tiu, kwatara Yɩɩ* tə nə yɩ Yɩzərayɛlə lɩ̀à Yɩɩ nə swɩ̀n: Á bá sɛ̀ kàrà, á ga zìlí à sʋ̀ràn tə nii naaa? À mʋ̀ Ba-Yígúrə́-Jə-Tiu nii sʋgʋ nə! 14 Rekabə bìú Yonadabə dwíí tə zìlí culu tə nii, ʋ nə tún ʋ pa ba. Ʋ dùə̀ súú ʋ dwíí tə nii nə, sə ba dàn ká nyʋn divɛn, yá ba zìlí ba nɩbɛɛ culu tə nii, də zə̀n mama, ba ba divɛn nywɩn. Yá à mʋ̀ Ba-Yígúrə́-Jə-Tiu cɩ́cágá á nii nə, də à bwɛ́, yá á wà à con tan. 15 À tʋn à tʋ̀tʋ̀nà tə mama, ba nə yɩ à nii sʋ̀sʋ̀nà á con, də à bwɛ́, sə ba swɩ̀n á con, ba wʋ́: “Á lìù mama yá ʋ wʋlʋŋʋ tʋ̀tʋ̀nán tə, á ga lwàń á tʋtʋnɛɛ kʋkwɩnan tə. Á dànà ká vwa á tɩ̀àn yɩa duən nə, á ma tʋn á pa tə, yá á dàń wá ya lʋʋ nii tə wa, à nə pɩn á mʋ̀ də á nɩbara-ba nə.” Yá á wà á zɩɩn guni á kə à con, á wà à con tan. 16 Cɩ́gá, Rekabə bìú Yonadabə dwíí tə zìlí yìə̀n tə nii, ba nɩbɛɛ nə pɩn ba nii tə yuu wa, yá lalʋʋ kʋ tə mʋ̀ ba à nii zìlí!»
17 Kʋ mʋ̀ nə pɩn, á nəŋə kʋ tə Ba-Yígúrə́-Jə-Tiu, kwatara Yɩɩ tə nə yɩ Yɩzərayɛlə lɩ̀à Yɩɩ nə swɩ̀n: «À wá pa lɛɛ tə mama, à nə swɩ̀n tə yoo, à zɩgɩ Zwida lʋʋ lɩ̀à tə, də Zwerizalɛmə tɩ̀án mama nə, yí ba. Cɩ́gá, à swɩ̀n ba con, yá ba wà à con tan, à bon ba, yá ba wà nə le.»
18 Yá Zweremi swɩ̀n Rekabə sàń lɩ̀à tə con, ʋ wʋ́: «Á nəŋə kʋ tə Ba-Yígúrə́-Jə-Tiu, kwatara Yɩɩ tə nə yɩ Yɩzərayɛlə lɩ̀à Yɩɩ nə swɩ̀n: “Á zìlí á nɩbɛɛ Yonadabə nii yìə̀n tə, á ga twá kʋ tə mama nə, ʋ nə bɩrɩ aba, sə á tʋn! 19 Kʋ mʋ̀ yɩrɩ, á nəŋə kʋ tə à mʋ̀ Ba-Yígúrə́-Jə-Tiu, kwatara Yɩɩ tə, à nə yɩ Yɩzərayɛlə lɩ̀à Yɩɩ nə swɩ̀n: Rekabə bìú Yonadabə bá kwɩ̀n bɛɛ nə, ʋ dwíí tə wa, ʋ nə wá ya à yáá con, ʋ tʋn ʋ pa nə.”»