Zweremi 36

Yehoyakimə sʋ̀rɩ́ Zweremi Yɩɩ nii sʋ̀ràn sagɩ tə

1 Zwida pɩ̀ʋ́ Zozɩasə bìú Yehoyakimə pàrɩ̀ tə banɩa nii bɩnɩ tə wa, Ba-Yígúrə́-Jə-Tiu swɩ̀n sʋ̀ràn tə tə Zweremi con, ʋ wʋ́: 2 «Tì sagɩ, kʋ nə pipini ndə sàrá nə, n pʋ́pʋ́nɩ́ sʋ̀ràn tə mama, à nə swɩ̀n n con, Yɩzərayɛlə payuu tə, də Zwida payuu tə, də dwíə́ nəkaran* tə mama yuu wa, kʋ nə zɩgɩ máŋá tə wa, à nə sinti à swɩ̀n tə n con, pɩ̀ʋ́ Zozɩasə máŋá wa, kʋ bà kʋ yí zə̀n. 3 Kʋ wàá də Zwida lʋʋ lɩ̀à tə nə nì càn tə mama ŋwɛn, à nə pɩ̀à sə à kə ba nə, ba lìù mama wá dʋgʋ ʋ tʋtʋnɛɛ kʋkwɩnan tə, yá à dàń wá kwɛn ba yolwana tə də ba cʋna tə, à lɩ à də ba pwə́rə́ wa.»

4 Zweremi dàń bon Neriya bìú Barukə, ʋ swɩ̀n sʋ̀ràn tə mama, Ba-Yígúrə́-Jə-Tiu yà nə swɩ̀n ʋ con, yá Barukə dàń cʋga, ʋ ga pʋ́pʋ́nɩ́ tə, ʋ kəni sagɩ wa, kʋ nə pipini ndə sàrá nə.

5 Kʋ kwa nə, Zweremi pɩn nii kʋ tə Barukə nə, ʋ wʋ́: «Ba cɩ̀gà à nə, à wàrɩ̀ Ba-Yígúrə́-Jə-Tiu dìə̀ tə wa à vəli. 6 N tətə dàń vəli, n kàrɩ̀ Ba-Yígúrə́-Jə-Tiu sʋ̀ràn tə, à nə swɩ̀n, n ga cʋgʋ, n pʋ́pʋ́nɩ́ n kə sagɩ tə wa, n bɩrɩ lalʋʋ tə mama nə, Ba-Yígúrə́-Jə-Tiu dìə̀ tə wa, nivori dɩɩn nə. N wá kàrɩ̀ tə Zwida lʋʋ lɩ̀à tə də mama yáá con, ba nə nan Zwida tɩan tə wa, ba nə wulə, ba bà Ba-Yígúrə́-Jə-Tiu dìə̀ tə wa. 7 Kʋ wàá də ba wá ja Ba-Yígúrə́-Jə-Tiu taŋa nə, yá ba lìù mama wá dʋgʋ ʋ tʋtʋnɛɛ kʋkwɩnan tə! Cɩ́gá, Ba-Yígúrə́-Jə-Tiu lɩŋa zaŋa lalʋʋ kʋ tə yuu wa zənzən, tə pupwin.»

8 Neriya bìú Barukə tʋn yoo mama, kʋ twá ndə nətʋ nə, Yɩɩ nii sʋ̀sʋ̀nʋ̀ Zweremi yà nə bɩrɩ wá, sə ʋ tʋn. Ʋ kàrɩ̀ Ba-Yígúrə́-Jə-Tiu sʋ̀ràn tə nə wulə sagɩ tə wa, Ba-Yígúrə́-Jə-Tiu dìə̀ tə wa. 9 Zwida pɩ̀ʋ́ Zozɩasə bìú Yehoyakimə pàrɩ̀ tə bonu nii bɩnɩ tə wa, nʋgʋ nii cànà tə wa, ba bòrì ba kə Zwerizalɛmə tɩ̀án mama nə, də Zwida tɩan tə wa lɩ̀à tə mama nə, sə ba bà Zwerizalɛmə, ba fwa nivori Ba-Yígúrə́-Jə-Tiu yáá con. 10 Yá Barukə dàń kàrɩ̀ Zweremi sʋ̀ràn tə nə wulə sagɩ tə wa, lalʋʋ tə mama yáá con, Ba-Yígúrə́-Jə-Tiu dìə̀ tə wa. Ʋ yà wulə Swafan bìú Gemarɩya, ʋ nə pʋ́pʋ́nɩ́ saga, dibiu tə wa, kʋ nə wulə yuu con dəwoo tə wa, Ba-Yígúrə́-Jə-Tiu dìə̀ Mimii Nədʋn tə nii nə.

11 Máŋá tə wa Gemarɩya bìú Miswe, ʋ nə yɩ Swafan nàʋ́ nə nì Ba-Yígúrə́-Jə-Tiu sʋ̀ràn tə mama, tə nə wulə sagɩ tə wa, 12 ʋ vəli pɩ̀ʋ́ sàń, ʋ zʋ lìù tə nə pʋ́pʋ́nɩ́ saga tə biro wa. Tʋ̀tʋ̀nán yun tɩ̀án tə mama yà jə jə́rə́ lá nə: Kʋ yà yɩ Eliswama, ʋ nə pʋ́pʋ́nɩ́ saga, də Swemaya bìú Delaya, də Akəbɔrə bìú Elənatan, də Swafan bìú Gemarɩya, də Hananɩa bìú Sedekɩasə, də tʋ̀tʋ̀nán yun tɩ̀án tə duən tə mama. 13 Sʋ̀ràn tə mama Miswe nə nì, máŋá tə wa Barukə nə kàrɩ̀ sagɩ tə lalʋʋ tə yáá con, ʋ man tə mama ʋ bɩrɩ tʋ̀tʋ̀nán yun tɩ̀án tə nə.

14 Tʋ̀tʋ̀nán yun tɩ̀án tə mama dàń tʋn Netanɩa bìú Yewudi, ʋ nə yɩ Swelemɩya nàʋ́, ʋ ga yɩ Kuswi nanagɩ, sə ʋ swɩ̀n Barukə con, sə ʋ tì sagɩ tə, ʋ nə kàrɩ̀ lalʋʋ tə yáá con, ʋ ja bà. Neriya bìú Barukə ma tì sagɩ tə, ʋ ja va tʋ̀tʋ̀nán yun tɩ̀án tə con. 15 Ba swɩ̀n ʋ con, ba wʋ́: «Jə̀ń tɩa, n kàrɩ̀ sagɩ tə, n bɩrɩ nəba.»

Barukə ma kàrɩ̀ kʋ, ʋ bɩrɩ ba. 16 Máŋá tə tʋ̀tʋ̀nán yun tɩ̀án tə nə nì sʋ̀ràn təntə mama, ba zwɛ̀, fən zʋa ba, ba ga viviri ba ywàŋá duən. Yá ba swɩ̀n Barukə con, ba wʋ́: «Nə wá tún sʋ̀ràn tə tə mama, nə bɩrɩ pɩ̀ʋ́ tə nə.»

17 Ba bwe Barukə, ba wʋ́: «Nətə nə n fwa, n ma cʋgʋ, n ga pʋ́pʋ́nɩ́ sʋ̀ràn təntə mama, Zweremi nə swɩ̀n? Nə lòrì mʋ́ sə n man, n bɩrɩ nəba.» 18 Barukə le ba, ʋ wʋ́: «Kʋ yɩ ʋ swɩ̀n sʋ̀ràn təntə ʋ kə yɩɩ nə, yá à dàń cʋga, à ga pʋ́pʋ́nɩ́ tə à kəni sagɩ tə wa, də danbakwalʋ.»

19 Tʋ̀tʋ̀nán yun tɩ̀án tə dàń swɩ̀n Barukə con, ba wʋ́: «Vəli sə n də Zweremi səgə. Á dànà ká pa lìù mama lwarɩ bwálɩ́ tə á nə wulə!»

20 Kʋ kwa nə, ba tún sagɩ tə Eliswama, ʋ nə pʋ́pʋ́nɩ́ saga biro tə wa, ba ga zàn ba va pɩ̀ʋ́ sàń, ba tún sʋ̀ràn tə mama, ba bɩrɩ pɩ̀ʋ́ nə.

21 Pɩ̀ʋ́ tə tʋn Yewudi, ʋ pa ʋ va ʋ tì sagɩ tə, Eliswama, ʋ nə pʋ́pʋ́nɩ́ saga biro tə wa, ʋ ja bà. Yewudi kàrɩ̀ sagɩ tə, ʋ pa pɩ̀ʋ́ tə də tʋ̀tʋ̀nán yun tɩ̀án tə mama nə, ba yà nə zɩga, ba kɩkarɩ pɩ̀ʋ́ tə. 22 Kʋ yɩn nʋgʋ nii cànà tə wa, yá pɩ̀ʋ́ tə dàń yà jə̀ə́ ʋ waran máŋá padiə wa, kurəpotu ga zɩga ʋ yáá con də mən. 23 Yewudi nə kàrɩ̀ sagɩ tə vàn don ʋ zwɛ̀ mama, pɩ̀ʋ́ tə yàá goŋə kʋ bwálɩ́ tə, də lìù tə nə pʋ́pʋ́nɩ́ saga yufɩna tə, ʋ dɩ kurəpotu tə mən tə wa. Ʋ tʋn kʋ nətʋ, sagɩ tə mama kori kʋ də́ mən kʋ zwɛ̀, kurəpotu tə wa. 24 Yá pɩ̀ʋ́ tə də ʋ tʋ̀tʋ̀nà tə mama nə nì sʋ̀ràn təntə mama, fən wà ba zwɩ, ba ma wà ba gànàn cɩrɩ, sə kʋ bɩrɩ də pucʋnɩ zʋa ba. 25 Yá Elənatan, də Delaya, də Gemarɩya yà lòrì pɩ̀ʋ́ tə, sə ʋ dàn ká sʋ̀rɩ́ sagɩ tə, yá ʋ wá ba con tan. 26 Pɩ̀ʋ́ tə pɩn nii pabiu Yerameyɛlə nə, də Azəriyɛlə bìú Seraya nə, də Abədiyɛlə bìú Swelemɩya nə, sə ba ja Barukə, ʋ nə pʋ́pʋ́nɩ́ saga, də Yɩɩ nii sʋ̀sʋ̀nʋ̀ Zweremi. Yá Ba-Yígúrə́-Jə-Tiu jɩn Barukə də Zweremi ʋ səgə.

27 Pɩ̀ʋ́ tə nə sʋ̀rɩ́ sagɩ tə də kʋ wa sʋ̀ràn tə Zweremi nə swɩ̀n, Barukə ga cʋgʋ ʋ pʋ́pʋ́nɩ́ kwa nə, Ba-Yígúrə́-Jə-Tiu swɩ̀n sʋ̀ràn tə tə Zweremi con, ʋ wʋ́: 28 «Kʋ́ʋ̀ tì sagɩ don, n pʋ́pʋ́nɩ́ sʋ̀ràn tə mama, tə yà nə wulə təntən sagɩ tə wa, Zwida pɩ̀ʋ́ Yehoyakimə nə sʋ̀rɩ́, n kə kʋ wa. 29 Yá n wá swɩ̀n sʋ̀ràn tə tə, n zɩgɩ Zwida pɩ̀ʋ́ Yehoyakimə nə, n wʋ́:

Nə̀ń kʋ tə Ba-Yígúrə́-Jə-Tiu nə swɩ̀n: N sʋ̀rɩ́ sagɩ təntə, n ga caga Zweremi nii nə, n wʋ́: “Wàà nə gɩgarɩ mʋ́, ʋ pa n pʋ́pʋ́nɩ́ sʋ̀ràn təntə, n swɩ̀n də kʋ ba tʋ́tʋ̀ná jə, Babɩlɔnə pɩ̀ʋ́ wá bà, ʋ cʋ̀gʋ̀ lʋʋ nii kʋ tə, ʋ ga pa ləzoni də vàná mɛ nyʋn lá?” 30 Kʋ mʋ̀ yɩrɩ, nə̀ń kʋ tə à mʋ̀ Ba-Yígúrə́-Jə-Tiu nə swɩ̀n à zɩga Zwida pɩ̀ʋ́ Yehoyakimə nə: Ʋ dwíí tə wa lìù mama bá jə̀ń Davidə padaʋ tə yuu wa, ʋ də́ pàrɩ̀, ʋ kwa nə. Yá ʋ tətə Yehoyakimə tɩgɩ yɩ kʋ wá pə̀ń kàrá wa, yɩcaʋ bárɩ́ wa, də tɩtɩn waran wa. 31 À wá zɩgɩ ʋ də ʋ dwíí, də ʋ tʋ̀tʋ̀nà tə nə, ba yolwan tə yɩrɩ. À wá pa lɛɛ tə mama, à nə swɩ̀n tə yoo ba con, yá ba wá à con tan, yí ba də Zwerizalɛmə tɩ̀án, də Zwida lʋʋ lɩ̀à tə.»

32 Zweremi dàń tì sagɩ don, ʋ pa Neriya bìú Barukə nə, ʋ nə pʋ́pʋ́nɩ́ saga. Yá Barukə cʋgʋ, ʋ ga pʋ́pʋ́nɩ́ sʋ̀ràn tə mama Zweremi nə swɩ̀n, ʋ kə sagɩ təntə wa. Sʋ̀ràn təntə yà nə wulə təntən sagɩ tə wa, Zwida pɩ̀ʋ́ Yehoyakimə nə sʋ̀rɩ́. Yá Zweremi súrí sʋ̀ràn kapʋpʋ duən lá, tə nə nyən də sʋ̀ràn tə yà nə wulə təntən sagɩ tə wa.