Pɩ̀ʋ́ Sedekɩasə tʋn lɩ̀à Zweremi con
37
1 Babɩlɔnə pɩ̀ʋ́ Nebukadənezarə tún Zozɩasə bìú Sedekɩasə, ʋ pa ʋ də́ pàrɩ̀ Zwida lʋʋ nii wa, Yehoyakimə bìú Konɩaa yuu nə. 2 Yá ʋ mʋ̀, nə à yə̀ə́ ʋ tʋ̀tʋ̀nà, nə à yə̀ə́ lʋʋ nii tə lalʋʋ wà Ba-Yígúrə́-Jə-Tiu sʋ̀ràn tə cʋgʋ, ʋ nə twá də Yɩɩ nii sʋ̀sʋ̀nʋ̀ Zweremi, ʋ ma swɩ̀n.3 Pɩ̀ʋ́ Sedekɩasə tʋn Swelemɩya bìú Yehukalə, də Yɩɩ joŋwanʋ* Maseya bìú Sofoni, sə ba swɩ̀n Yɩɩ nii sʋ̀sʋ̀nʋ̀ Zweremi con, ba wʋ́: «Lòrí Ba-Yígúrə́-Jə-Tiu, nə Yɩɩ tə, n pa nəba.»
4 Kʋ máŋá tə wa, də ba yà tə wà Zweremi bandiə wa ken. Ʋ yà tɩ ʋ tɩ̀àn, ʋ jírí lalʋʋ tə wa, də ʋ twi. 5 Kaləde tɩ̀án tə yà nə púə́ Zwerizalɛmə ba kə sə ba ta, nì də Farawon kwatara tə nan Ezwipətə, ba bɩ̀àn. Yá ŋwɛn təntə dàń pɩn, ba pìí ba va yiŋʋnɩ, ba yá Zwerizalɛmə. 6 Yá Ba-Yígúrə́-Jə-Tiu dàń swɩ̀n sʋ̀ràn tə tə, Yɩɩ nii sʋ̀sʋ̀nʋ̀ Zweremi con, ʋ wʋ́: 7 «Nə̀ń kʋ tə à mʋ̀ Ba-Yígúrə́-Jə-Tiu, à nə yɩ Yɩzərayɛlə lɩ̀à Yɩɩ nə swɩ̀n: Á pìrə́ á vu Zwida pɩ̀ʋ́ tə con, ʋ nə tʋn aba, sə á bwe nə, á swɩ̀n də Farawon kwatara tə yà nə nan, sə ba san á nə, pìí ba vələ ba lʋʋ nii wa, Ezwipətə nə. 8 Kaləde tɩ̀án tə dàń wá pìí ba bà, ba ta tɩʋ kʋ tə ba də́, ba ga dɩ mən kʋ nə. 9 Nə̀ń kʋ tə, à mʋ̀ Ba-Yígúrə́-Jə-Tiu nə swɩ̀n: Á dànà ká gɩgarɩ á tɩ̀àn, á swɩ̀n də Kaləde tɩ̀án tə wá va yiŋʋnɩ, ba ga yá aba! Cɩ́gá, ba bá vìí. 10 Yá á nə swə, á ta Kaləde tɩ̀án kwatara tə mama, ba nə tɛ kʋ̀ʋ̀ də aba, á də́, kʋ nə swə kʋ ga bara, á nə caŋɩ, ba lìù mama tə wá zàn ʋ gansili wa, ʋ nan, ʋ kə mən tɩʋ kʋ tə nə.»
Ba ken Zweremi bandiə wa
11 Máŋá tə wa Farawon kwatara tə yà nə pɩn Kaləde tɩ̀án kwatara tə va yiŋʋnɩ, ba yá Zwerizalɛmə tɩʋ tə, 12 Zweremi yà pɩ̀à ʋ nan Zwerizalɛmə wa, ʋ va Bɛnzwamɛn lʋʋ nii tə wa, ʋ jon ʋ tori lalʋʋ tə titəŋi wa. 13 Ʋ nə yí Bɛnzwamɛn mimii tə, tɩʋ nəcɩra tə yuu tíú, ʋ yɩrɩ nə yɩ Yiriya, ʋ nə yɩ Swelemɩya bìú, ʋ ga yɩ Hananɩa nàʋ́, ya wulə lá, yá ʋ zi Yɩɩ nii sʋ̀sʋ̀nʋ̀ Zweremi, ʋ ga swɩ̀n, ʋ wʋ́: «N yɩ n ja n tɩ̀àn n vələ, sə n kə Kaləde tɩ̀án tə jɩɩn wa!» 14 Zweremi ma le, ʋ wʋ́: «Kʋ yɩ kʋ̀nkʋ̀n! À tà à ja à tɩ̀àn à vələ, sə à kə Kaləde tɩ̀án tə jɩɩn wa.»
Yá Yiriya wà Zweremi sʋgʋ tə cʋgʋ. Ʋ zi wá ʋ ja va, ʋ pa tʋ̀tʋ̀nán yun tɩ̀án tə nə. 15 Tʋ̀tʋ̀nán yun tɩ̀án tə lɩŋa zàn Zweremi yuu wa, ba mà wá, ba ga kə wá bandiə wa, Zonatan, ʋ nə pʋ́pʋ́nɩ́ saga, dìə̀ wa. Cɩ́gá, ba yà ja ka ba ma fwa bandiə. 16 Mə kʋ zɩgɩ nətʋ, ba ma kə Zweremi dìə̀ wa nɩ́á gwàlʋ́ nəfarʋ* wa, kʋ də̀ń nə lu, ba nə ma fwa bandiə.
Yá Zweremi dàń yɩn lá, ʋ dán. 17 Pɩ̀ʋ́ Sedekɩasə tʋn, ʋ pa ba lɩ Zweremi, ba ja bà ʋ padiə tə wa, yá pɩ̀ʋ́ tə dàń bwe wá, ʋ də wá cɩcɩ pwə́rə́ wa, ʋ wʋ́: «Ba-Yígúrə́-Jə-Tiu wà mʋ́ kori pɩn, sə n pa nə naaa?» Zweremi le, ʋ wʋ́: «Kori wulə! Babɩlɔnə pɩ̀ʋ́ jɩɩn wá zʋ mʋ́.» 18 Yá Zweremi dàń bwe pɩ̀ʋ́ Sedekɩasə, ʋ wʋ́: «Bɛ̀ɛ̀ yolwan nə à tʋn à zɩgɩ n mʋ̀ də tʋ̀tʋ̀nán yun tɩ̀án tə, də lalʋʋ kʋ tə nə, kʋ pa á kə nə bandiə wa? 19 Á Yɩɩ nii sʋ̀sʋ̀nà tə nə swɩ̀n Yɩɩ nii yìə̀n á con, də Babɩlɔnə pɩ̀ʋ́ bá bà á nə, nə à yə̀ə́ lʋʋ nii kʋ tə nə, wulə yə̀n nə?
20 Sɩ́ʋ́n nə, à yuu-tiu, à nyɩna pɩ̀ʋ́, à lòrì mʋ́ sə n cʋgʋ à lòrí tə, à nə ja bà n yáá con! Dàn ká pa à pìí à va Zonatan, ʋ nə pʋ́pʋ́nɩ́ saga, dìə̀ tə wa, kʋ nə tà nətʋ, à wá tɩ.»
21 Pɩ̀ʋ́ Sedekɩasə pɩn nii, sə ba ywàń Zweremi yuu, pɩ̀ʋ́ sàń nəcɩra dəwoo tə wa, sə ba ga pa wá dipɛn wə̀rə́ cwəŋə dipɛn tə dipɛn kikilu nədʋ dɩɩn mama, kʋ va kʋ yí máŋá tə dipɛn nə wá zwɛ̀ tɩʋ tə wa mɩ́ámɩ́án. Mə kʋ zɩgɩ nətʋ, Zweremi ma mɛn pɩ̀ʋ́ sàń nəcɩra dəwoo tə wa.