Zweremi 38

Ba ken Zweremi nɩ́á gwàlʋ́* wa

1 Matan bìú Swefatɩya, də Paswəhurə bìú Gedalɩa, də Swelemɩya bìú Yukalə, də Maləkɩya bìú Paswəhurə, nì sʋ̀ràn tə Zweremi nə swɩ̀n lalʋʋ tə mama con, ʋ wʋ́: 2 «Nə̀ń kʋ tə Ba-Yígúrə́-Jə-Tiu nə swɩ̀n: Ʋ wʋ́ lìù tə nə wá mɛn tɩʋ kʋ tə wa, yɩ kwatara sɩ̀ʋ́, nə à yə̀ə́ niən, nə à yə̀ə́ tɩan yayɩpwarʋ nə wá gʋ. Yá lìù tə nə wá nan, ʋ va ʋ pa ʋ tɩ̀àn Kaləde tɩ̀án tə nə, kʋ tíú wá jon ʋ mɩɩ. Ʋ mɩɩ tə wá ya ʋ tori, ndə won nə, ʋ nə ta ʋ jon kʋ̀ʋ̀ wa, yá ʋ wá ya lʋʋ wa.»

3 Zweremi swɩ̀n, ʋ súrí lá, ʋ wʋ́: «Nə̀ń kʋ tə Ba-Yígúrə́-Jə-Tiu nə swɩ̀n: Ʋ wʋ́ tɩʋ kʋ tə cɩ́gá wá tʋ Babɩlɔnə pɩ̀ʋ́ kwatara tə jɩɩn wa, yá ba wá jon kʋ.»

4 Tʋ̀tʋ̀nán yun tɩ̀án tə swɩ̀n pɩ̀ʋ́ tə con, ba wʋ́: «Kʋ mɛ sə ba gʋ bɛɛ wà tə! Cɩ́gá, ʋ mʋ̀ nə pɩn kwatara tə nə ga tɩʋ tə wa, də lalʋʋ tə mama jɩ̀àn gwàrɩ̀, kʋ twá də sʋ̀ràn tə tə yiri, ʋ nə swɩ̀n. Bɛɛ wà tə ba lalʋʋ tə zəni pɩ̀à, kʋ yɩ ba cʋna nə ʋ pɩ̀à.» 5 Pɩ̀ʋ́ Sedekɩasə le, ʋ wʋ́: «Nə̀ń wá nə, ʋ wulə á jɩɩn wa. Cɩ́gá, də à yɩ pɩ̀ʋ́ tə mɛ, à wàrɩ̀ won mama nə à cɩ̀ á con.»

6 Ba dàń jɩn Zweremi, ba dɩ pɩ̀ʋ́ bìú Maləkɩya nɩ́á gwàlʋ́ tə wa, kʋ nə wulə pɩ̀ʋ́ sàń nəcɩra dəwoo tə wa. Ŋoni nə ba ma kə Zweremi nɩ́á gwàlʋ́ tə wa. Kʋ máŋá tə wa, də nɩ́á yà tə̀lə́ kʋ wa, yá tɩtaran ya nə wulə lá. Kʋ nətʋ tə dàń pɩn Zweremi mʋ̀rɩ̀ tɩtaran tə wa.

7 Yá Ebɛdə-Melɛkə, ʋ nə yɩ Kuswə^a tíú, ʋ nə yɩ pɩ̀ʋ́ sàń tʋtʋnʋ, ʋ wulə padiə tə wa, nì də ba dɩga Zweremi nɩ́á gwàlʋ́ tə wa. Pɩ̀ʋ́ tə ya jə̀ə́ Bɛnzwamɛn mimii tə nə. 8 Ebɛdə-Melɛkə dàń nan padiə tə wa, ʋ swɩ̀n sʋ̀ràn tə tə pɩ̀ʋ́ tə con, ʋ wʋ́: 9 «À nyɩna pɩ̀ʋ́, kʋ tə mama bara ba tə nə tʋn Yɩɩ nii sʋ̀sʋ̀nʋ̀ Zweremi yɩra, lwara zənzən. Ba dɩga wá nɩ́á gwàlʋ́ tə wa, yá niən wá gʋ wá bwálɩ́ təntə wa. Cɩ́gá, wodiu kʋ́ʋ̀ tə̀lə́ tɩʋ tə wa.»

10 Yá pɩ̀ʋ́ tə dàń pɩn nii kʋ tə Ebɛdə-Melɛkə nə, ʋ nə yɩ Kuswə tíú, ʋ wʋ́: «Ja bara fɩtwa yəbə, n súrí n tɩ̀àn nə, n ja va, sə á van Yɩɩ nii sʋ̀sʋ̀nʋ̀ Zweremi á lɩ nɩ́á gwàlʋ́ tə wa, də ʋ tə wà tɩ.»

11 Ebɛdə-Melɛkə dàń jɩn bara fɩtwa tə, ʋ súrí ʋ tɩ̀àn nə, ʋ ja va pɩ̀ʋ́ sàń tə wa. Ʋ zʋa dibiu tə wa, kʋ nə wulə jɩjə wiən dibiu tə də̀ń con, ʋ tì gangwɩran də gandwara, ʋ twá ŋoni nə, ʋ pa tə cú tə pa Zweremi nə, nɩ́á gwàlʋ́ tə wa. 12 Yá Ebɛdə-Melɛkə, ʋ nə yɩ Kuswə tíú, swɩ̀n Zweremi con, ʋ wʋ́: «Kə gangwɩran tə tə, də gandwara tə tə n vànà də̀ń, ŋoni tə yuu con.»

Yá Zweremi tʋn kʋ nətʋ. 13 Ba ja ŋoni tə ba ma vàn Zweremi ba lɩ nɩ́á gwàlʋ́ tə wa. Yá Zweremi dàń mɛn pɩ̀ʋ́ sàń nəcɩra dəwoo tə wa.

Pɩ̀ʋ́ Sedekɩasə də Zweremi talɩkwa viə

14 Pɩ̀ʋ́ Sedekɩasə pɩn ba va ba ja Yɩɩ nii sʋ̀sʋ̀nʋ̀ Zweremi, ba ja bà ʋ con, Ba-Yígúrə́-Jə-Tiu dìə̀ tə batwa nii mimii tə nə. Pɩ̀ʋ́ tə swɩ̀n Zweremi con, ʋ wʋ́: «À wá bwe mʋ́ yoo nədʋ: Dàn ká səgə nə yoo mama!» 15 Zweremi le pɩ̀ʋ́ Sedekɩasə, ʋ wʋ́: «À nə swɩ̀n kʋ tə, à nə mɛ sə à swɩ̀n n con, cɩ́gá mama, n wá gʋ nə. Yá à nə pɩn mʋ́ kwìə̀ də, n bá tan à con.»

16 Yá pɩ̀ʋ́ Sedekɩasə dàń səgə ʋ kàn nii də Zweremi, ʋ wʋ́: «À dùə̀, Ba-Yígúrə́-Jə-Tiu wulə, ʋ mʋ̀ ga nə pɩn nəba mɩɩ! À bá gʋ mʋ́, à ma bá kə mʋ́ lɩ̀à ba tə jɩɩn wa, ba nə pɩ̀à sə ba lɩ n mɩɩ.»

17 Zweremi dàń le pɩ̀ʋ́ Sedekɩasə, ʋ wʋ́: «Nə̀ń kʋ tə Ba-Yígúrə́-Jə-Tiu, kwatara Yɩɩ tə nə yɩ Yɩzərayɛlə lɩ̀à Yɩɩ nə swɩ̀n, ʋ wʋ́ n nə nan n kə n tɩ̀àn Babɩlɔnə pɩ̀ʋ́ tʋ̀tʋ̀nán yun tɩ̀án tə jɩɩn wa, n wá jon n mɩɩ tə, n kə lʋʋ wa, n mʋ̀ də n dìə̀ lɩ̀à tə mama, yá ba bá dɩ mən tɩʋ kʋ tə nə. 18 Yá n nə vɩga sə n nan, n kə n tɩ̀àn Babɩlɔnə pɩ̀ʋ́ tʋ̀tʋ̀nán yun tɩ̀án tə jɩɩn wa, tɩʋ kʋ tə wá tʋ Kaləde tɩ̀án tə jɩɩn wa, ba wá dɩ mən kʋ nə, yá n tətə ba yitwajɩan jə, ba jɩɩn wa.» 19 Pɩ̀ʋ́ Sedekɩasə swɩ̀n Zweremi con, ʋ wʋ́: «Zwida lʋʋ lɩ̀à tə nə ken ba tɩ̀àn Kaləde tɩ̀án jɩɩn wa tə fən jə nə. Kʋ wàá sə ba ja nə, ba kə Kaləde tɩ̀án tə jɩɩn wa, sə ba fʋfʋlɩ nə.»

20 Zweremi le, ʋ wʋ́: «Ɔn ɔn, ba bá kə mʋ́ ba jɩɩn wa. Cʋgʋ Ba-Yígúrə́-Jə-Tiu kori, sʋgʋ tə wa à nə swɩ̀n n con, yá yoo mama wá ya zəni kʋ pa mʋ́, n ga wá jon n mɩɩ, n kə lʋʋ wa. 21 Yá n nə vɩga sə n nan, nə̀ń sʋgʋ tə, Ba-Yígúrə́-Jə-Tiu nə bɩrɩ nə: Ʋ wʋ́ 22 ba wá ja kana tə mama nə ga Zwida pɩ̀ʋ́ dìə̀ tə wa, ba va Babɩlɔnə tɩ̀án tʋ̀tʋ̀nán yun tɩ̀án tə con, yá kana tə wá swɩ̀n Zwida pɩ̀ʋ́ tə yoo, ba wʋ́:

“N yɩ ba gɩgarɩ ba dʋgʋ,

ba dɩ dɩ̀àn n yuu wa,

ba mʋ̀ lɩ̀à tə yà nə swɩ̀n sìə́ yoo də mʋ́.

Máŋá tə wa, n nɛɛ nə mʋ̀rɩ̀ tɩtaran wa,

ba dəri ba yá mʋ́.”

23 Cɩ́gá, ba wá ja n kana tə mama, də n bɩ̀á tə mama ba va Kaləde tɩ̀án tə con, yá n də ba yitwajɩan jə ba jɩɩn wa. Babɩlɔnə pɩ̀ʋ́ jɩɩn wá zʋ mʋ́, yá ʋ wá dɩ mən tɩʋ kʋ tə nə.»

24 Sedekɩasə swɩ̀n Zweremi con, ʋ wʋ́: «Dàn ká pa lìù mama lwarɩ sʋ̀ràn tə tə wa sʋgʋ nədʋ tətə, yá n bá tɩ. 25 Tʋ̀tʋ̀nán yun tɩ̀án tə nə nì də à ve də mʋ́, ba nə twi ba swɩ̀n n con, ba wʋ́: “Swɩ̀n kʋ tə n nə swɩ̀n pɩ̀ʋ́ con, də kʋ tə pɩ̀ʋ́ nə swɩ̀n n con, n bɩrɩ nəba, dàn ká səgə nəba yoo mama, yá nə ba gʋ mʋ́”, 26 n wá le ba n wʋ́: “À yɩ à lòrì pɩ̀ʋ́, sə ʋ dàn ká pa à pìí à va Zonatan dìə̀ wa, kʋ nə tà kʋ mʋ̀, à wá tɩ lá nə.” »

27 Tʋ̀tʋ̀nán yun tɩ̀án tə mama twi ba bwe Zweremi, yá ʋ le ba də sʋ̀ràn tə tətə, pɩ̀ʋ́ tə nə pɩn wá nii, sə ʋ ma le ba. Ba viviri ba vìí sənbwen. Cɩ́gá, lìù mama yà wà yoo tə nì. 28 Zweremi mɛn pɩ̀ʋ́ sàń nəcɩra dəwoo tə wa, kʋ va kʋ yí dɩɩn tə, ba nə ta Zwerizalɛmə ba də́. Yá nə̀ń nətʋ tə ba nə ta Zwerizalɛmə ba də́...